ದಾಳಿ ಮಾಡಿದ ವ್ಯಾಘ್ರನನ್ನೇ ಒಗ್ಗಟ್ಟಾಗಿ ಹೆದರಿಸಿ ಓಡಿಸಿದ ಹಸುಗಳು, ಸಿಸಿಟಿವಿಯಲ್ಲಿ ಅಪರೂಪದ ದೃಶ್ಯ ಸೆರೆ

ಭೋಪಾಲ್: ತಮ್ಮ ಗುಂಪಿನ ಹಸುವೊಂದರ ಮೇಲೆ ದಾಳಿ ಮಾಡಿದ್ದ ಹುಲಿಯನ್ನು ಎಲ್ಲಾ ಹಸುಗಳು ಒಗ್ಗೂಡಿ ಹೆದರಿ ಓಡಿಸಿರುವ ಅಪರೂಪದ ಘಟನೆ ಮಧ್ಯ ಪ್ರದೇಶದಲ್ಲಿ ನಡೆದಿದೆ.

ಮಧ್ಯ ಪ್ರದೇಶದ ರಾಜಧಾನಿ ಭೋಪಾಲ್ ನ ಕೆರ್ವಾದಲ್ಲಿನ ಫಾರ್ಮ್ ನಲ್ಲಿ ಈ ಘಟನೆ ನಡೆದಿದ್ದು, ಇಡೀ ದೃಶ್ಯ ಅಲ್ಲಿ ಅಳವಡಿಸಲಾಗಿದ್ದ ಸಿಸಿಟಿವಿಯಲ್ಲಿ ಸೆರೆಯಾಗಿದೆ.

ಈ ಘಟನೆ ಇದೇ ಭಾನುವಾರ ರಾತ್ರಿ ನಡೆದಿದ್ದು, ಅಗು ಹೇಗೋ ಫಾರ್ಮ್ ಹೌಸ್ ನ ಕಾಂಪೌಂಡ್ ಒಳಗೆ ಪ್ರವೇಶ ಮಾಡಿರುವ ಹುಲಿ, ಅಲ್ಲಿಯೇ ಮೇಯುತ್ತಿದ್ದ ಹಸುಗಳ ಗುಂಪಿನತ್ತ ಧಾವಿಸಿದೆ. ಈ ವೇಳೆ ಅಲ್ಲಿಯೇ ಕುಳಿತು ಹಲ್ಲು ಮೇಯುತ್ತಿದ್ದ ಒಂಟಿ ಹಸವನ್ನು ಗುರಿಯಾಗಿಸಿಕೊಂಡು ದಾಳಿ ಮಾಡಿ ಅದರ ಕುತ್ತಿಗೆ ಹಿಡಿದಿದೆ.

ಇದನ್ನೂ ಓದಿ: ಸೀಟಿಗಾಗಿ ಜುಟ್ಟು ಹಿಡಿದು ಬಡಿದಾಡಿಕೊಂಡ ನೀರೆಯರು: ಬಸ್ ನಲ್ಲಿ ನಾರಿ 'ಶಕ್ತಿ' ಅನಾವರಣ; ವಿಡಿಯೋ ವೈರಲ್

ಹಸುವಿನ ಚೀರಾಟ ಕೇಳುತ್ತಲೇ ಅಲ್ಲಿಯೇ ಇದ್ದ ಇತರೆ ಹಸುಗಳೆಲ್ಲಾ ಒಗ್ಗೂಡಿ ಹುಲಿಯತ್ತ ಧಾವಿಸಿದೆ. ಹಸುಗಳ ಗುಂಪು ಮತ್ತು ಅವುಗಳ ಕೂಗನ್ನು ಕೇಳಿ ಭಯಗೊಂಡ ಹುಲಿ ಕೊಂಚ ಹೊತ್ತು ಹಸುವನ್ನು ಬಿಡಲಿಲ್ಲವಾದರೂ ಈ ವೇಳೆ ಗುಂಪಿನಲ್ಲಿದ್ದ ಹಸುವೊಂದು ಹುಲಿಗೆ ತಿವಿಯಲು ಮುಂದೆ ಬಂದಿದೆ. ಆಗ ಭಯಗೊಂಡ ಹುಲಿ ಪಕ್ಕಕ್ಕೆ ಹಾರಿ ಹಸುಗಳಿಂದ ದೂರ ಹೋಗಿದೆ. ಈ ವೇಳೆ ಹುಲಿ ಬಾಯಿಗೆ ತುತ್ತಾಗ ಬೇಕಿದ್ದ ಹಸು ಕೂಡಲೇ ಮೇಲೆದ್ದು ಅಲ್ಲಿಂದ ಪಾರಾಗಿದೆ. 

ಇತ್ತ ಹಸುಗಳ ಗುಂಪನ್ನು ನೋಡಿದ ಹುಲಿ ಬೇರೆ ದಾರಿ ಇಲ್ಲದೇ ಅಲ್ಲಿಂದ ಹೊರಟು ಹೋಗಿದೆ. ಈ ಇಡೀ ದೃಶ್ಯ ಫಾರ್ಮ್ ನಲ್ಲಿ ಅಳವಡಿಸಲಾಗಿದ್ದ ಸಿಸಿಟಿವಿಯಲ್ಲಿ ಸೆರೆಯಾಗಿದೆ.

ಇದನ್ನೂ ಓದಿ: ಅದು ಹುಲ್ಲಲ್ಲಾ...: ಹಾವು ಜಗಿಯುತ್ತಿರುವ ಜಿಂಕೆ, ಅರಣ್ಯಾಧಿಕಾರಿಗಳೇ ಹೌಹಾರುವಂತೆ ಮಾಡಿದ Viral Video

ಸುಮಾರು 76 ಎಕರೆ ಪ್ರದೇಶದಲ್ಲಿರುವ ಈ ಫಾರ್ಮ್ ನಲ್ಲಿ ಅದರ ಮಾಲೀಕ ಸುಮಾರು 50 ಸಿಸಿಟಿವಿ ಕ್ಯಾಮೆರಾಗಳನ್ನು ಅಳವಡಿಸಿದ್ದಾನೆ. ಈ ಹಸುವಿನ ಫಾರ್ಮ್ ಗೆ ಹುಲಿ ನುಗ್ಗುತ್ತಿರುವುದು ಕಳೆದ 6 ತಿಂಗಳಲ್ಲಿ 5ನೇ ಬಾರಿಯಂತೆ. ಇದು ಹುಲಿಗಳು ಅಡ್ಡಾಡುವ ಪ್ರದೇಶವಾಗಿದ್ದು, 14 ಅಡಿ ಎತ್ತರೆದ ಫೆನ್ಸಿಂಗ್ ಹಾಕಿದ್ದರೂ ಹುಲಿಗಳು ಫಾರ್ಮ್ ಪ್ರವೇಶಿಸುತ್ತಿವೆ. ಕೆಲ ಭಾಗದಲ್ಲಿ ಫೆನ್ಸಿಂಗ್ ಹಾಳಾಗಿದ್ದು ಅವುಗಳನ್ನು ದುರಸ್ತಿ ಮಾಡಬೇಕಿದೆ. ಇಂತಹ ಪ್ರದೇಶಗಳಿಂದಲೇ ಹುಲಿಗಳು ಪ್ರವೇಶ ಮಾಡುತ್ತಿರಬಹುದು ಎಂದು ಮಾಲೀಕರು ಶಂಕಿಸಿದ್ದಾರೆ.