ನವದೆಹಲಿ: ಮಾಯಾವತಿಯವರ ತಾಯಿ ರಾಮ ರತಿ ನಿಧನ

ನವದೆಹಲಿ: ಬಿಎಸ್ ಪಿ ಅಧ್ಯಕ್ಷೆ ಮಾಯಾವತಿ ಅವರ ತಾಯಿ ರಾಮ ರತಿ ಅವರು ಹೃದಯ ಸಮಸ್ಯೆಯಿಂದ ದೆಹಲಿಯಲ್ಲಿ ಶನಿವಾರ ನಿಧನರಾಗಿದ್ದಾರೆ.  ರಾಮ ರತಿ ಅವರಿಗೆ 92 ವರ್ಷ ವಯಸ್ಸಾಗಿತ್ತು ಅವರು ಕೆಲ ದಿನಗಳಿಂದ ಚಿಕಿತ್ಸೆ ಪಡೆಯುತ್ತಿದ್ದ ರಾಷ್ಟ್ರ ರಾಜಧಾನಿಯ ಆಸ್ಪತ್ರೆಯೊಂದರಲ್ಲಿ ನಿಧನರಾಗಿರುವುದಾಗಿ ಬಹುಜನ ಸಮಾಜ ಪಕ್ಷ(ಬಿಎಸ್ ಪಿ) ತಿಳಿಸಿದೆ. 

ತಾಯಿಯ ನಿಧನದ ಸುದ್ದಿ ತಿಳಿಯುತ್ತಿದ್ದಂತೆ ಮಾಯಾವತಿ ದೆಹಲಿಗೆ ತೆರಳಿದ್ದಾರೆ. ಭಾನುವಾರ ದೆಹಲಿಯಲ್ಲಿ ಅಂತ್ಯ ಕ್ರಿಯೆ ನಡೆಯಲಿದೆ ಎಂದು ಹೇಳಲಾಗಿದೆ.

ಪಕ್ಷದ ಅಧ್ಯಕ್ಷರ ತಾಯಿ ನಿಧನಕ್ಕೆ ಬಿಎಸ್ ಪಿ ಮುಖಂಡರು ಹಾಗೂ ಕಾರ್ಯಕರ್ತರು ಸಂತಾಪ ಸೂಚಿಸಿದ್ದಾರೆ.  ಕಳೆದ ವರ್ಷವಷ್ಟೇ  ಮಾಯಾವತಿ ಅವರ ತಂದೆ ಪ್ರಭುದಯಾಳ್ ನಿಧನರಾಗಿದ್ದರು ಎಂದು ಬಿಎಸ್ ಪಿ  ಪಕ್ಷ ತಿಳಿಸಿದೆ.