ಹೈದರಾಬಾದ್: ಭೀಕರ ರಸ್ತೆ ಅಪಘಾತ; ಟ್ರಕ್ ಕೆಳಗೆ ಸಿಲುಕಿ ಅಪ್ರಾಪ್ತ ಬೈಕ್ ಸವಾರ ಸಾವು!

ಹೈದರಾಬಾದ್: ಅಪ್ರಾಪ್ತ ಬಾಲಕ (14) ತನ್ನ ಸ್ನೇಹಿತನೊಂದಿಗೆ ಬೈಕ್ ಚಾಲನೆ ಮಾಡುತ್ತಿದ್ದಾಗ ರಸ್ತೆ ಅಪಘಾತ ಉಂಟಾಗಿ ಟ್ರಕ್ ಕೆಳಗೆ ಸಿಲುಕಿ ಸಾವನ್ನಪ್ಪಿರುವ ಘಟನೆ ಹೈದರಾಬಾದ್ ನಲ್ಲಿ ವರದಿಯಾಗಿದೆ. 

ಸೈಬರಾಬಾದ್ ನ ಮೆಡ್ಚಲ್ ನ ಎನ್ ಹೆಚ್ 44 ನಲ್ಲಿ ಈ ಅಪಘಾತ ನಡೆದಿದ್ದು, ಉಪಹಾರ ತರುವುದಕ್ಕಾಗಿ ಇಬ್ಬರು ಯುವಕರು ಬೈಕ್ ನಲ್ಲಿ ಹೋಗುತ್ತಿದ್ದಾಗ ಅಪಘಾತ ಸಂಭವಿಸಿದೆ.

ಈ ಭೀಕರ ರಸ್ತೆ ಅಪಘಾತದ ದೃಶ್ಯಗಳು ಸರ್ಕಾರಿ ಐಟಿಐ ಬಳಿಯ ಸಿಸಿಟಿವಿ ಕ್ಯಾಮರಾಗಳಲ್ಲಿ ದಾಖಲಾಗಿದ್ದು, ಬೈಕ್ ಚಾಲನೆ ಮಾಡುತ್ತಿದ್ದ ದುಂಡಿಗಲ್ಲ ನರಸಿಂಹ (14) ಬೃಹತ್ ಕಂಟೈನರ್ ಟ್ರಕ್ ನ್ನು ಹಿಂದಿಕ್ಕಲು ಹೋಗಿ, ಬೈಕ್ ನ ನಿಯಂತ್ರಣ ಕಳೆದುಕೊಂಡು ಕೆಳಗೆ ಬಿದ್ದು, ಕಂಟೈನರ್ ಕೆಳಗೆ ಸಿಲುಕಿಕೊಂಡಿದ್ದಾನೆ.  ಆತನ ಸ್ನೇಹಿತ ಬಾಲ (15) ತೀವ್ರವಾಗಿ ಗಾಯಗೊಂಡಿದ್ದಾನೆ

ಮೃತ ಯುವಕರು ಆಥ್ವೆಲಿ ಗ್ರಾಮದವರಾಗಿದ್ದು, ಬೈಕ್ ಚಾಲಕ ಹೆಲ್ಮೆಟ್ ನ್ನು ಧರಿಸಿರಲಿಲ್ಲ ಎಂದು ಪೊಲೀಸರು ತಿಳಿಸಿದ್ದಾರೆ. ಐಪಿಸಿ ಸೆಕ್ಷನ್ 304 ರ ಅಡಿಯಲ್ಲಿ ಬಾಲಕರಿಗೆ ಬೈಕ್ ನೀಡಿದ್ದ ಜಿ ಶ್ರವಣ್ ಕುಮಾರ್ ವಿರುದ್ಧವೂ ದೂರು ದಾಖಲಾಗಿದೆ.