ಲಾಕ್'ಡೌನ್ ನಿಂದಾಗಿ ಸಾಕಷ್ಟು ಹೇಳಲಾಗದಂತಹ ಸಂಕಷ್ಟಗಳು ಎದುರಾಗಿದ್ದು, 'ಸ್ಮಾರ್ಟ್ ಅಪ್‌ಗ್ರೇಡ್' ಅಗತ್ಯವಿದೆ: ರಾಹುಲ್ ಗಾಂಧಿ

ನವದೆಹಲಿ; ಉದ್ಯಮಿಗಳು ಹಾಗೂ ವ್ಯಾಪಾರಸ್ಥರು ತಮ್ಮ ಅಂಗಡಿ-ಮುಂಗಟ್ಟು, ವ್ಯವಹಾರಗಳನ್ನು ಮುಂದುವರೆಸಲು ಸ್ಮಾರ್ಟ್ ಅಪ್'ಗ್ರೇಡ್ ಅಗತ್ಯವಿದೆ ಎಂದು ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿಯವರು ಹೇಳಿದ್ದಾರೆ. 

ಕೊರೋನಾ ವೈರಸ್ ವ್ಯಾಪಕವಾಗಿ ಹರಡುತ್ತಿರುವ ಹಿನ್ನೆಲೆಯಲ್ಲಿ ದೇಶದಾದ್ಯಂತ ಘೋಷಣೆ ಮಾಡಲಾದ 21 ದಿನಗಳ ಲಾಕ್'ಡೌನ್ ಇಂದಿಗೆ ಅಂತ್ಯಗೊಳ್ಳುತ್ತಿದೆ. ಈ ಹಿನ್ನೆಲೆಯಲ್ಲಿ ಪ್ರಧಾನಿ ಮೋದಿಯವರು ಇಂದು ಬೆಳಿಗ್ಗೆ 10 ಗಂಟೆಗೆ ದೇಶವನ್ನುದ್ದೇಶಿಸಿ ಮಾತನಾಡಲಿದ್ದಾರೆ. 

ಪ್ರಧಾನಿ ಮೋದಿಯವರು ದೇಶವನ್ನುದ್ದೇಶಿಸಿ ಮಾತನಾಡುತ್ತಿರುವ ಹಿನ್ನೆಲೆಯಲ್ಲಿ ಪ್ರತಿಕ್ರಿಯೆ ನೀಡಿರುವ ರಾಹುಲ್ ಗಾಂಧಿಯವರು, ಲಾಕ್'ಡೌನ್'ಗೆ ಸ್ಮಾರ್ಟ್ ಅಪ್'ಗ್ರೇಡ್ ಅಗತ್ಯವಿದೆ. ಕೋವಿಡ್-19 ಹಾಟ್'ಸ್ಪಾಟ್ ಇರುವ ಪ್ರದೇಶಗಳನ್ನು ಐಸೋಲೇಷನ್ ನಲ್ಲಿಟ್ಟು, ಮಾಸ್ ಟೆಸ್ಟಿಂಗ್ ನಡೆಸಬೇಕಿದೆ. ಈ ಮೂಲಕ ವ್ಯವಹಾರಸ್ಥರು ಹಾಗೂ ವ್ಯಾಪಾರಸ್ಥರು ತಮ್ಮ ವ್ಯವಹಾರಗಳನ್ನು ಮುಂದುವರೆಸಲು ಅನುವು ಮಾಡಿಕೊಡಬೇಕು ಎಂದು ಹೇಳಿದ್ದಾರೆ. 

21 ದಿನಗಳ ಸುದೀರ್ಘ ಲಾಕ್'ಡೌನ್ ದೇಶದಲ್ಲಿ ಹೇಳಲಾಗದಂತಹ ನೋವಿನ ಪರಿಸ್ಥಿತಿಯನ್ನು ತಂದೊಡ್ಡಿದೆ. ರೈತರು ಹಾಗೂ ವಲಸಿಗರು, ದಿನಗೂಲಿ ಕಾರ್ಮಿಕರು, ವ್ಯವಹಾರಸ್ಥರು ಉದ್ಯಮಿಗಳು ಸಂಕಷ್ಟ ಎದುರಿಸುತ್ತಿದ್ದಾರೆಂದು ತಿಳಿಸಿದ್ದಾರೆ.