ಮಧ್ಯ ಪ್ರದೇಶ: ಇಂದೋರ್ ನಲ್ಲಿ ವೈದ್ಯೆಗೆ ಕೊರೋನಾ ವೈರಸ್ ಪಾಸಿಟಿವ್

ಭೋಪಾಲ್: ಮಹಾಮಾರಿ ಕೊರೋನಾ ವೈರಸ್ ವಿರುದ್ಧ ಹೋರಾಡುತ್ತಿರುವ ವೈದ್ಯರಿಗೂ ಕೊವಿಡ್-19 ತಗುಲುತ್ತಿದ್ದು, ಮಧ್ಯ ಪ್ರದೇಶದ ಇಂದೋರ್ ನ ಮಹಾತ್ಮ ಗಾಂಧಿ ಮೆಮೊರಿಯಲ್ ವೈದ್ಯಕೀಯ ಕಾಲೇಜ್ ನ ವೈದ್ಯೆಯೊಬ್ಬರಿಗೆ ಪಾಸಿಟಿವ್ ದೃಢಪಟ್ಟಿದೆ.

ಸರ್ಕಾರಿ ವೈದ್ಯಕೀಯ ಕಾಲೇಜಿನ ಸ್ತ್ರೀರೋಗ ವಿಭಾಗದಲ್ಲಿ ಸ್ನಾತಕೋತ್ತರ ಪದವಿ ಮಾಡುತ್ತಿರುವ ಉತ್ತರ ಪ್ರದೇಶ ಮೂಲದ 28 ವರ್ಷದ ಮಹಿಳಾ ರೆಸಿಡೆಂಟ್ ಡಾಕ್ಟರ್ ಗೆ ಕೊವಿಡ್-19 ಪಾಸಿಟಿವ್ ಬಂದಿದೆ. 

ವೈದ್ಯೆಯನ್ನು ಇಂದೋರ್ ಖಾಸಗಿ ಆಸ್ಪತ್ರೆಗೆ ದಾಖಲಿಸಲಾಗಿದ್ದು, ಅವರ ಆರೋಗ್ಯ ಸ್ಥಿರವಾಗಿದೆ ಎಂದು ವೈದ್ಯಕೀಯ ಕಾಲೇಜ್ ನ ಡೀನ್ ಡಾ. ಜ್ಯೋತಿ ಬಿಂದಾಲ್ ಅವರು ಹೇಳಿದ್ದಾರೆ.

ಮಧ್ಯ ಪ್ರದೇಶದಲ್ಲಿ ವೈದ್ಯರಿಗೆ ಕೊರೋನಾ ಪಾಸಿಟಿವ್ ಬಂದಿರುವುದು ಮೊದಲ ಪ್ರಕರಣವಾಗಿದ್ದು, ಈ ವೈದ್ಯೆ ಮಾರ್ಚ್ 17ರಿಂದ ಮಾರ್ಚ್ 24ರ ವರೆಗೆ ಇಂದೋರ್ ನಿಂದ ಉತ್ತರ ಪ್ರದೇಶದ ಜಾನ್ಸಿಗೆ ಪ್ರಯಾಣಸಿದ್ದಾರೆ.

ಈ ವೈದ್ಯೆಯೊಂದಿಗೆ ಸಂಪರ್ಕದಲ್ಲಿದ್ದ ಎಲ್ಲರನ್ನೂ ಗುರುತಿಸಿ ಖಾಸಗಿ ಹೋಟೆಲ್ ನಲ್ಲಿ ಕ್ವಾರಂಟೈನ್ ನಲ್ಲಿಡಲಾಗಿದೆ ಎಂದು ವೈದ್ಯಕೀಯ ಕಾಲೇಜ್ ನ ಮೂಲಗಳು ತಿಳಿಸಿವೆ.