ಮೋದಿ ಸರ್ಕಾರದ ವಂಚನೆ, ಭ್ರಷ್ಟಾಚಾರವನ್ನು ನಾವು ಹೊರಗೆಳೆಯುತ್ತಿದ್ದೇವೆ: ಸೋನಿಯಾ

ದೆಹಲಿ: ಪ್ರಧಾನಿ  ನರೇಂದ್ರಮೋದಿ ಸರ್ಕಾರದ   ವಂಚನೆ ಮತ್ತು ಭ್ರಷ್ಟಾಚಾರಗಳನ್ನು ಸಾಕ್ಷಿ ಸಮೇತ ನಾವು ದೇಶದ ಜನರ ಮುಂದೆ ಬಹಿರಂಗಪಡಿಸುತ್ತಿದ್ದೇವೆ ಎಂದು  ಎಐಸಿಸಿ ಮಾಜಿ ಅಧ್ಯಕ್ಷೆ ಸೋನಿಯಾಗಾಂಧಿ ಹೇಳಿದ್ದಾರೆ.

ದೆಹಲಿಯಲ್ಲಿಂದು ಕಾಂಗ್ರೆಸ್ ಪಕ್ಷದ 84 ನೇ ಮಹಾ ಅಧಿವೇಶನವನ್ನುದ್ದೇಶಿಸಿ ಮಾತನಾಡಿದ ಅವರು,ಭ್ರಷ್ಟಾಚಾರ ನಿಯಂತ್ರಣ ಹಾಗೂ ಅಭಿವೃದ್ಧಿ ಬಗ್ಗೆ ಪ್ರಧಾನಮಂತ್ರಿ ನರೇಂದ್ರಮೋದಿ ನೀಡುವ ಭರವೆಸೆಗಳೆಲ್ಲಾ ಬರೀ ಭ್ರಮೆಯಂತಿದ್ದು, ಅಧಿಕಾರ ಪಡೆಯುವ ತಂತ್ರವಾಗಿದೆ ಎಂದು ಟೀಕಿಸಿದರು.

ಮನ್ ಮೋಹನ್ ಸಿಂಗ್ ಆಡಳಿತಾವಧಿಯಲ್ಲಿ ಆರ್ಥಿಕ ಬೆಳವಣಿಗೆ ದರ ಉತ್ತುಂಗ ಶಿಖರದಲ್ಲಿತ್ತು. ಆದರೆ, ಇಂದು ಮೋದಿ ಸರ್ಕಾರ ಯುಪಿಎಎ ಕಲ್ಯಾಣ ಯೋಜನೆಗಳನ್ನು ದುರ್ಬಲಗೊಳಿಸಿದ್ದು, ತೀವ್ರ ಬೇಸರವಾಗುತ್ತಿದೆ ಎಂದರು.

ಕಳೆದ ನಾಲ್ಕು ವರ್ಷಗಳ ಅವಧಿಯಲ್ಲಿ ಸೂಕ್ಕಿನ ಸರ್ಕಾರ ಕಾಂಗ್ರೆಸ್ ಪಕ್ಷ ನಾಶಪಡಿಸಲು ಏನೂ ಬೇಕೋ ಎಲ್ಲಾ ಮಾಡಿದೆ. ಆದರೆ. ಕಾಂಗ್ರೆಸ್ ಪಕ್ಷವನ್ನು ಎಂದಿಗೂ ನಾಶಪಡಿಸಲು ಸಾಧ್ಯವಿಲ್ಲ ಎಂದರು.

ಸವಾಲಿನ ಸಂದರ್ಭದಲ್ಲಿ ರಾಹುಲ್ ಗಾಂಧಿ ಪಕ್ಷದ ಅಧ್ಯಕ್ಷ ಸ್ಥಾನ ವಹಿಸಿದ್ದು, 40 ವರ್ಷದ ಹಿಂದೆ ಇಂದಿರಾಗಾಂಧಿ ಚಿಕ್ಕಮಗಳೂರಿನಿಂದ ಗೆದ್ದು ಬಂದ ನಂತರ ದೇಶದ ರಾಜಕೀಯವೇ ಬದಲಾಯಿತು. ಅಂತಹ ಸಾಧನೆಯನ್ನು ಪಕ್ಷ ಮತ್ತೊಮ್ಮೆ ಮಾಡಬೇಕಿದೆ ಎಂದರು.

ಈಗಷ್ಟೇ ಹೊಸ ಅಧ್ಯಾಯದ ಪ್ರಾರಂಭವಾಗಿದ್ದು, ಎಂತಹ ಸವಾಲು ಬೇಕಿದ್ದರೂ ಎದುರಿಸಲು ಎಲ್ಲಾರೂ ಸಿದ್ಧರಾಗಬೇಕು. ರಾಹುಲ್ ಗಾಂಧಿ ನೇತೃತ್ವದಲ್ಲಿ  ದೇಶವನ್ನು ಭ್ರಷ್ಟಾಚಾರ ಹಾಗೂ ಹಗೆತನದಿಂದ ಮುಕ್ತಗೊಳಿಸಬೇಕು.ಈ ನಿಟ್ಟಿನಲ್ಲಿ ಎಲ್ಲರೂ ಒಗ್ಗಟ್ಟಾಗಿ ಶ್ರಮಿಸಬೇಕಾಗಿದೆ ಎಂದು ಕರೆ ನೀಡಿದರು.