ಡೀಸೆಲ್ ರೈಲ್ವೆ ಎಂಜಿನ್ ನ್ನು ಎಲೆಕ್ಟ್ರಿಕ್ ಎಂಜಿನ್ ಆಗಿ ಮಾರ್ಪಾಡು: ಇತಿಹಾಸ ಸೃಷ್ಟಿಸಿದ ಭಾರತೀಯ ರೈಲ್ವೆ

ನವದೆಹಲಿ: ಭಾರತೀಯ ರೈಲ್ವೆ ನೂತನ ಇತಿಹಾಸ ಸೃಷ್ಟಿಸಿದೆ. ಡೀಸೆಲ್  ಎಂಜಿನ್ ಒಂದನ್ನು ಎಲೆಕ್ಟ್ರಿಕ್ ಎಂಜಿನ್ ಆಗಿ ಪರಿವರ್ತಿಸುವ ಮೂಲಕ ರೈಲ್ವೆ ಇತಿಹಾಸದಲ್ಲಿ ಮಹತ್ವದ ಮೈಲಿಗಲ್ಲು ಸಾಧಿಸಿದೆ.

ಉತ್ತರ ಪ್ರದೇಶದ ವಾರಣಾಸಿಯಲ್ಲಿರುವ ರೈಲ್ವೆ ಉತ್ಪಾದಕ ಘಟಕ  ದಿ ಡೀಸೆಲ್ ಲೋಕೋಮೋಟೀವ್ ವಕ್ರ್ಸ್(ಡಿಎಲ್‍ಡಬ್ಲ್ಯೂ) ನಲ್ಲಿ ರೈಲ್ವೆ ಈ ಸಾಧನೆ ಮಾಡಿದೆ.ಸ್ಥಳೀಯ ತಂತ್ರಜ್ಞಾನವನ್ನ ಉಪಯೋಗಿಸಿ ಡೀಸೆಲ್ ಎಂಜಿನ್ ಒಂದನ್ನು ವಿದ್ಯುತ್ ಚಾಲಿತ ಎಂಜಿನ್  ಆಗಿ ಪರಿವರ್ತನೆ ಗೊಳಿಸಲಾಗಿದೆ. ಈ ರೀತಿಯಲ್ಲಿ ಎಂಜಿನ್ ಬದಲಾವಣೆಯಾಗಿರುವುದು ಜಗತ್ತಿನಲ್ಲಿ ಇದೇ ಮೊದಲೆಂದು ರೈಲ್ವೆ ಘಟಕದ ಅಧಿಕಾರಿಗಳು ಹೇಳಿದ್ದಾರೆ. 

ಮೇಕ್ ಇನ್ ಇಂಡಿಯಾ ಯೋಜನೆಯಡಿಯಲ್ಲಿ  2017ರ ಡಿಸೆಂಬರ್ 22 ಈ ಕಾರ್ಯ ಪ್ರಾರಂಬಗೊಂಡಿತ್ತು. 2018ರ ಫೆಬ್ರವರಿ 28ರಂದು ಎಂಜಿನ್ ಪರಿವರ್ತನೆ ಯಶಸ್ವಿಯಾಗಿ ಪೂರ್ಣಗೊಂಡಿದೆ. ಅತ್ಯಂತ ಕಡಿಮೆ ಅವಧಿಯಲ್ಲಿ ಇಂತಹಾ ಮಹತ್ವದ ಸಾಧನೆ ಮಾಡಲಾಗಿದೆ ಎಂದು ಡಿಎಲ್‍ಡಬ್ಲ್ಯೂ ನ ಮುಖ್ಯ ಸಾರ್ವಜನಿಕ ಸಂಪರ್ಕ ಅಧಿಕಾರಿ ನಿತಿನ್ ಮೆಹ್ರೋತ್ರಾ ಹೇಳಿದರು.

ಹಳೆಯದಾಗಿದ್ದ ಎಂಜಿನ್ ಗಳನ್ನು ಪರಿವರ್ತನೆಗಾಗಿ ಆಯ್ಕೆ ಮಾಡಿಕೊಳ್ಳಲಾಗಿತ್ತು. ಎಂಜಿನ್  ನ ಚಾಸಿಸ್, ಬೋಗಿಗಳು ಮತ್ತು ಟ್ರ್ಯಾಕ್ಷನ್ ಮೋಟಾರ್‍ಗಳನ್ನು ಹಾಗೆಯೇ ಉಳಿಸಿಕೊಂಡು ಎಂಜಿನ್ ಗೆ ಹೊಸ ಶಕ್ತಿ ತುಂಬುವ ಕೆಲಸ ಇದಾಗಿತ್ತು. ಸ್ಥಗಿತಗೊಳಿಸಲಾಗಿದ್ದ ಡಬ್ಲ್ಯೂಎಎಮ್4 ಕ್ಲಾಸ್ ಎಲೆಕ್ಟ್ರಿಕ್ ಎಂಜಿನ್ ನ ಸೈಡ್‍ವಾಲ್‍ಗಳು ಹಾಗೂ ಛಾವಣಿಯನ್ನ ಇದಕ್ಕಾಗಿ ಬಳಸಿಕೊಳ್ಳಲಾಗಿದೆ. ಎಸ್‍ಓ ಉಪಕರಣಗಳ ವಿನ್ಯಾಸವನ್ನು ಸೇನೆ ಮಾಡಿಕೊಟ್ಟಿತು. ಡಬ್ಲ್ಯೂಡಿಜಿ3ಎ ಚಾಸ್ಸಿಸ್‍ನ ಮಾರ್ಪಾಡಿಗಾಗಿ ಡಿಎಲ್‍ಡಬ್ಲ್ಯೂ ಚಿತ್ರಗಳನ್ನ ತಯಾರು ಮಾಡಿದೆ.ಎಂದು ರೈಲ್ವೆ ಉತ್ಪಾದನಾ ಘಟಕದ ಮೂಲಗಳು ಹೇಳಿದೆ.