ರಾಹುಲ್ ಗಾಂಧಿ 'ಕಣ್ಸನ್ನೆ'ಗೆ ಪ್ರಿಯಾ ಪ್ರಕಾಶ್ ವಾರಿಯರ್ ಫಿದಾ!

ನವದೆಹಲಿ:  ಲೋಕಸಭೆಯಲ್ಲಿ ನಿನ್ನೆ ನಡೆದ ಅವಿಶ್ವಾಸ ನಿರ್ಣಯದ ಮೇಲಿನ ಚರ್ಚೆಯ ವೇಳೆ ಕಾಂಗ್ರೆಸ್ ಅಧ್ಯಕ್ಷ ರಾಹುಲ್ ಗಾಂಧಿ ಬಿಜೆಪಿ ಮತ್ತು ಪ್ರಧಾನಿ ನರೇಂದ್ರ ಮೋದಿ ವಿರುದ್ಧ ತೀವ್ರ ವಾಗ್ದಾಳಿ ನಡೆಸಿ ತಮ್ಮ ಭಾಷಣದ ಕೊನೆಗೆ ಪ್ರಧಾನಿ ಬಳಿಗೆ ಹೋಗಿ ಅಪ್ಪಿಕೊಂಡಿದ್ದು ನಂತರ ತಮ್ಮ ಸ್ಥಾನಕ್ಕೆ ಬಂದು ಕುಳಿತು ಕಣ್ಸನ್ನೆ ಹೊಡೆದಿದ್ದು ಇಡೀ ರಾಷ್ಟ್ರಾದ್ಯಂತ ಚರ್ಚೆಯಾಗುತ್ತಿದೆ. ಸಾಮಾಜಿಕ ಮಾಧ್ಯಮದಲ್ಲಿ ರಾಹುಲ್ ಗಾಂಧಿಯವರ ಕಣ್ಸನ್ನೆ ಟ್ರೋಲ್ ಗೊಳಗಾಗಿದೆ.

ರಾಹುಲ್ ಗಾಂಧಿ ಯಾರಿಗೆ, ಏಕೆ ಕಣ್ಣು ಹೊಡೆದದ್ದು, ಅವರ ವರ್ತನೆ ಸರಿಯೇ ಎಂಬ ಬಗ್ಗೆ ವ್ಯಾಪಕ ಚರ್ಚೆಯಾಗುತ್ತಿದೆ. ಈ ಬಗ್ಗೆ ಸಭಾಧ್ಯಕ್ಷೆ ಸುಮಿತ್ರಾ ಮಹಾಜನ್ ಕೂಡ ರಾಹುಲ್ ಗಾಂಧಿಯವರನ್ನು ಎಚ್ಚರಿಸಿದ್ದಾರೆ.

ಇದೇ ರೀತಿ ಕೆಲ ಸಮಯಗಳ ಹಿಂದೆ ಮಲಯಾಳಂ ಸಿನಿಮಾವೊಂದರ ಹಾಡಿನಲ್ಲಿ ಕಣ್ಸನ್ನೆ ಹೊಡೆದು ಪ್ರಿಯಾ ಪ್ರಕಾಶ್ ವಾರಿಯರ್ ರಾತ್ರಿ ಕಳೆದು ಹಗಲಾಗುವುದರೊಳಗೆ ಫೇಮಸ್ ಆದರು. ಇದೀಗ ಒಂದೇ ಒಂದು ಕಣ್ಸನ್ನೆಯಿಂದ ರಾತ್ರೋರಾತ್ರಿ ಖ್ಯಾತಿಗಳಿಸಿದ್ದ ನಟಿ ಪ್ರಿಯಾ ಪ್ರಕಾಶ್​ ವಾರಿಯರ್​ ಕಾಂಗ್ರೆಸ್​ ಅಧ್ಯಕ್ಷ ರಾಹುಲ್​ ಗಾಂಧಿ ಕಣ್ಸನ್ನೆಗೆ ಫಿದಾ ಆಗಿದ್ದಾರೆ.

ರಾಹುಲ್ ಗಾಂಧಿಯವರ ಕಣ್ಸನ್ನೆಗೆ ಪ್ರತಿಕ್ರಿಯೆ ನೀಡಿದ ಅವರು, ಕಾಲೇಜಿನಿಂದ ಬಂದ ತಕ್ಷಣ ಮಾಧ್ಯಮಗಳಲ್ಲಿ ಈ ಸುದ್ದಿ ನೋಡಿ ಖುಷಿಯಾಯಿತು. ನನ್ನ 'ಒರು ಅದಾರ್​ ಲವ್'​ ಚಿತ್ರದ ಸಿಗ್ನೇಚರ್ ಸ್ಟೈಲ್ ಅನ್ನು ರಾಹುಲ್ ಅವರು ಉತ್ತಮವಾಗಿ ಕಾಪಿ ಮಾಡಿದ್ದು, ನನಗಿಂತ ಚೆನ್ನಾಗಿ ಕಣ್ಸನ್ನೆ ಮಾಡಿದ್ದಾರೆ ಎಂದು ಹೇಳಿದ್ದಾರೆ.