ಮೋದಿ ಭೇಟಿಗೆ ಅವಕಾಶವಿಲ್ಲ.. ಸಾರ್ವಜನಿಕವಾಗಿ ಅಭಿಪ್ರಾಯ ವ್ಯಕ್ತಪಡಿಸುತ್ತೇನೆ: ಯಶ್ವಂತ್ ಸಿನ್ಹಾ

ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿ ಅವರು ತಮ್ಮ ಭೇಟಿಗೆ ಅವಕಾಶ ನೀಡಿಲ್ಲ.. ಹೀಗಾಗಿ ಅವರ ಕುರಿತ ನನ್ನ ಅಭಿಪ್ರಾಯಗಳನ್ನು ಸಾರ್ವಜನಿಕವಾಗಿಯೇ ವ್ಯಕ್ತಪಡಿಸುತ್ತೇನೆ ಎಂದು ಮಾಜಿ ಕೇಂದ್ರ ಸಚಿವ ಹಾಗೂ ಬಿಜೆಪಿ  ಹಿರಿಯ ಮುಖಂಡ ಯಶ್ವಂತ್ ಸಿನ್ಹಾ ಹೇಳಿದ್ದಾರೆ.

ಈ ಬಗ್ಗೆ ಮಾಧ್ಯಮಗಳೊಂದಿಗೆ ಮಾತನಾಡಿರುವ ಯಶ್ವಂತ್ ಸಿನ್ಹಾ ಅವರು, ಅಟಲ್ ಬಿಹಾರಿ ವಾಜಪೇಯಿ, ಎಲ್ ಕೆ ಅಡ್ವಾಣಿ ಅವರ ಕಾಲದಲ್ಲಿದ್ದಂತೆ ಬಿಜೆಪಿ ಪಕ್ಷ ಮೊದಲಿನಂತಿಲ್ಲ. ಹಿಂದೆಲ್ಲಾ ಪಕ್ಷದ ಸಾಮಾನ್ಯ ಕಾರ್ಯಕರ್ತ ಕೂಡ  ದೆಹಲಿಗೆ ಹೋಗಿ ಪಕ್ಷದ ಅಧ್ಯಕ್ಷರನ್ನು ಭೇಟಿ ಮಾಡಿ ಚರ್ಚಿಸಬಹುದಿತ್ತು. ಅಂದು ಅಧ್ಯಕ್ಷರಾಗಿದ್ದ ಎಲ್ ಕೆ ಅಡ್ವಾಣಿ ಅವರು ಯಾವುದೇ ರೀತಿಯ ಆಪಾಯಿಂಟ್ ಮೆಂಟ್ ಇಲ್ಲದೇ ಇದ್ದರೂ ಕಾರ್ಯಕರ್ತರನ್ನು ಭೇಟಿ ಮಾಡಿ  ಚರ್ಚಿಸುತ್ತಿದ್ದರು. ಆದರೀಗ ಪಕ್ಷ ಸಂಪೂರ್ಣ ಬದಲಾಗಿದ್ದು, ಸಾಮಾನ್ಯ ಕಾರ್ಯಕರ್ತರನ್ನು ಬಿಡಿ..ಪಕ್ಷದ ಹಿರಿಯ ಮುಖಂಡರಿಗೆ ಭೇಟಿ ಅವಕಾಶ ನೀಡುತ್ತಿಲ್ಲ ಎಂದು ಯಶ್ವಂತ್ ಸಿನ್ಹಾ ಪ್ರಧಾನಿ ಮೋದಿ ಮತ್ತು ಬಿಜೆಪಿ ಅಧ್ಯಕ್ಷ ಅಮಿತ್  ಶಾ ವಿರುದ್ಧ ಕಿಡಿಕಾರಿದ್ದಾರೆ.

ಬಿಜೆಪಿ ಪಕ್ಷ ಮೊದಲಿನಂತಿಲ್ಲ..13 ತಿಂಗಳ ಹಿಂದೆ ನಾನು ಪ್ರಧಾನಿ ಮೋದಿ ಭೇಟಿ ಮಾಡಿ ಪಕ್ಷದ ಕುರಿತು ಚರ್ಚಿಸಿದ್ದೆ, ಬಳಿಕ ಅವರ ಭೇಟಿಗೆ ನನಗೆ ಅನುಮತಿಯೇ ಸಿಕ್ಕಿಲ್ಲ. ಹೀಗಾಗಿ ಇನ್ನು ಮುಂದೆ ನಾನು ಸರ್ಕಾರದ ಯಾವುದೇ  ವ್ಯಕ್ತಿಯನ್ನೂ ಭೇಟಿ ಮಾಡುವುದಿಲ್ಲ, ಪಕ್ಷದ ಮತ್ತು ಅದರ ನಾಯಕರ ಕುರಿತ ನನ್ನ ಅಭಿಪ್ರಾಯಗಳನ್ನು ಬಹಿರಂಗವಾಗಿಯೇ ಚರ್ಚಿಸುತ್ತೇನೆ ಎಂದು ನೇರವಾಗಿ ಪ್ರಧಾನಿ ಮೋದಿ ಮತ್ತು ಅಮಿತ್ ಶಾ ವಿರುದ್ಧ ಕಿಡಿಕಾರಿದ್ದಾರೆ. 

ಅಂತೆಯೇ ಪ್ರಧಾನಿ ಮೋದಿ ಅವರಿಗೆ ಅಮಿತ್ ಶಾ ಸಿಹಿ ತಿನ್ನಿಸುತ್ತಿರುವ ಫೋಟೋವನ್ನು ಹಿನ್ನಲೆಯಾಗಿಟ್ಟುಕೊಂಡು ಮಾತನಾಡಿದ ಸಿನ್ಹಾ, ಈ ಭಾವಚಿತ್ರದಲ್ಲಿ ಪ್ರಧಾನಿ ಮೋದಿ, ಅಮಿತ್ ಶಾ ಮತ್ತು ಅವರ ಸಂಪುಟ ಸಚಿವೆರಲ್ಲೆರೂ  ಇದ್ದಾರೆ. ಆದರೆ ಎಲ್ ಕೆ ಅಡ್ವಾಣಿ ಅವರು ಮಾತ್ರ ಇಲ್ಲ. ಕನಿಷ್ಟ ಪಕ್ಷ ವೇದಿಕೆಯ ಹಿಂಭಾಗಲ್ಲೂ ಅಡ್ವಾಣಿ ಕಾಣುತ್ತಿಲ್ಲ. ಇದು ಪಕ್ಷದ ಇಂದಿನ ಪರಿಸ್ಛಿತಿ ಎಂದು ಸಿನ್ಹಾ ಕಿಡಿಕಾರಿದ್ದಾರೆ.