ಐಆರ್ ಸಿಟಿಸಿ ಹಗರಣ; ರಾಬ್ರಿ ದೇವಿ, ತೇಜಸ್ವಿ ಯಾದವ್ ಗೆ ದೆಹಲಿ ಹೈಕೋರ್ಟ್ ಜಾಮೀನು

ನವದೆಹಲಿ: ಆರ್ ಜೆಡಿ ಮುಖ್ಯಸ್ಥ ಲಾಲೂ ಪ್ರಸಾದ್ ಯಾದವ್ ಅವರ ಪತ್ನಿ ರಾಬ್ರಿದೇವಿ ಮತ್ತು ಪುತ್ರ ತೇಜಸ್ವಿ ಯಾದವ್ ಅವರಿಗೆ ಭಾರತೀಯ ರೈಲ್ವೆ ಕ್ಯಾಟರಿಂಗ್ ಮತ್ತು ಟೂರಿಸಂ ಕಾರ್ಪೊರೇಷನ್(ಐಆರ್ ಸಿಟಿಸಿ) ಹಗರಣ ಕೇಸಿನಲ್ಲಿ ದೆಹಲಿ ನ್ಯಾಯಾಲಯ ಶುಕ್ರವಾರ ಜಾಮೀನು ನೀಡಿದೆ.

ವಿಶೇಷ ನ್ಯಾಯಾಧೀಶ ಅರುಣ್ ಭಾರದ್ವಾಜ್ ಹಾಜರಿ ವಾರಂಟ್ ನ್ನು ಲಾಲೂ ಪ್ರಸಾದ್ ಯಾದವ್ ವಿರುದ್ಧ ಹೊರಡಿಸಿದ್ದಾರೆ. ಆದರೆ ಅವರ ಪತ್ನಿ ರಾಬ್ರಿ ದೇವಿ ಮತ್ತು ಪುತ್ರ ತೇಜಸ್ವಿ ಯಾದವ್ ಗೆ 1 ಲಕ್ಷ ವೈಯಕ್ತಿಕ ಬಾಂಡ್ ಮತ್ತು ಅಷ್ಟೇ ಮೊತ್ತದ ಶ್ಯೂರಿಟಿಯೊಂದಿಗೆ ಷರತ್ತುಬದ್ಧ ಜಾಮೀನು ನೀಡಿದೆ.

ಐಆರ್ ಸಿಟಿಸಿಯ ಹೊಟೇಲ್ ನ್ನು ಖಾಸಗಿ ಸಂಸ್ಥೆಗೆ ಕಾರ್ಯನಿರ್ವಹಣೆಯ ಗುತ್ತಿಗೆ ನೀಡುವಾಗ ನಡೆದಿದೆ ಎನ್ನಲಾಗಿರುವ ಅಕ್ರಮಗಳ ಕುರಿತು ಇದಕ್ಕೂ ಮುನ್ನ ಲಾಲೂ ಅವರ ಕುಟುಂಬಿಕರು ಮತ್ತು ಇತರ ಸದಸ್ಯರಿಗೆ ನ್ಯಾಯಾಲಯ ಸಮ್ಮನ್ಸ್ ನೀಡಿತ್ತು.

ಮತ್ತೊಂದು ಕೇಸಿನಲ್ಲಿ ಜಾರ್ಖಂಡ್ ಜೈಲಿನಲ್ಲಿರುವುದರಿಂದ ಲಾಲೂ ಪ್ರಸಾದ್ ಯಾದವ್ ವಿಚಾರಣೆಗೆ ಇಂದು ಹಾಜರಾಗಲಿಲ್ಲ. ಸಿಬಿಐ ಇವರ ವಿರುದ್ಧ ಕಳೆದ ಏಪ್ರಿಲ್ 16ರಂದು ಕೇಸು ದಾಖಲಿಸಿತ್ತು.