ಕಾಶ್ಮೀರದಲ್ಲಿ ಪರಿಸ್ಥಿತಿ ಸುಧಾರಿಸುತ್ತಿರುವುದು ಉಗ್ರರಿಗೆ ಸಹಿಸಲಾಗುತ್ತಿಲ್ಲ: ಬಿಪಿನ್ ರಾವತ್

ಶ್ರೀನಗರ: ಕಾಶ್ಮೀರದಲ್ಲಿ ಸತತ ಸೇನಾ ಕಾರ್ಯಾಚರಣೆಗಳಿಂದಾಗಿ ಅಲ್ಲಿನ ಪರಿಸ್ಥಿತಿ ಸುಧಾರಿಸುತ್ತಿದ್ದು, ಇದು ಉಗ್ರರಿಗೆ ಮತ್ತು ಅವುಗಳ ಪೋಷಕರಿಗೆ ಸಹಿಸಲಾಗುತ್ತಿಲ್ಲ ಎಂದು ಸೇನಾ ಮುಖ್ಯಸ್ಥ ಬಿಪಿನ್ ರಾವತ್ ಹೇಳಿದ್ದಾರೆ.

ಕಾಶ್ಮೀರದಲ್ಲಿ ಇತ್ತೀಚೆಗೆ ನಡೆದ ಎನ್ ಐಎ ದಾಳಿಯನ್ನು ಹಿನ್ನಲೆಯಾಗಿಟ್ಟುಕೊಂಡು ಮಾತನಾಡಿದ ಬಿಪಿನ್ ರಾವತ್ ಅವರು, ಈ ಹಿಂದೆಂದಿಗಿಂತಲೂ ಪ್ರಸ್ತುತ ಕಾಶ್ಮೀರದಲ್ಲಿ ಪರಿಸ್ಥಿತಿ ಸುಧಾರಿಸುತ್ತಿದೆ. ಉಗ್ರರ ಪೋಷಕ  ಮಾರ್ಗಗಳನ್ನು ಸೇನೆ ಮುಚ್ಚಿ ಹಾಕುತ್ತಿದ್ದು, ಇದೇ ಕಾರಣಕ್ಕೆ ಉಗ್ರ ಸಂಘಟನೆಗಳು ನಿರಾಶೆಯಿಂದ ಸತತ ದಾಳಿ ನಡೆಸುತ್ತಿವೆ. ಆದರೆ ಭಾರತೀಯ ಸೇನೆ ಯಾವುದೇ ಪರಿಸ್ಥಿತಿ ಎದುರಿಸಲು ಸಿದ್ಧವಾಗಿದ್ದು, ಉಗ್ರರಿಗೆ ಸೂಕ್ತ  ರೀತಿಯಲ್ಲಿ ಉತ್ತರಿಸುವ ಕಲೆ ನಮಗೆ ಕರಗತವಾಗಿದೆ ಎಂದು ಹೇಳಿದರು. 

ಅಂತೆಯೇ ಕಾಶ್ಮೀರದಲ್ಲಿ ನಾವು ಸರ್ಕಾರದ ಸೂಚನೆಗಳನ್ನು ಮಾತ್ರ ಪಾಲಿಸುತ್ತಿದ್ದೇವೆ. ಎನ್ ಐಎ ದಾಳಿ ಮತ್ತು ಇತರೆ ಕಾರ್ಯಾಚರಣೆಗಳೆಲ್ಲವೂ ಅದರ ಒಂದು ಭಾಗವಷ್ಟೇ. ಕಾರ್ಯಾಚರಣೆಗಳ ಫಲಿತಾಂಶ ಭವಿಷ್ಯದಲ್ಲಿ  ಗೋಚರಿಸುತ್ತದೆ ಎಂದು ಹೇಳಿದರು.

ಇದೇ ವೇಳೆ ಪಾಕಿಸ್ತಾನದೊಂದಿಗಿನ ಸಂಬಂಧದ ಕುರಿತು ಮಾತನಾಡಿದ ಬಿಪಿನ್ ರಾವತ್ ಅವರು, ಪಾಕಿಸ್ತಾನದೊಂದಿಗೆ ದ್ವಿಪಕ್ಷೀಯ ಮಾತುಕತೆ ನಡೆಸುವುದು ಅಥವಾ ಬಿಡುವುದು ನಮ್ಮ ಕೆಲಸವಲ್ಲ. ಅದನ್ನು ಕೇಂದ್ರ ಸರ್ಕಾರ  ಮತ್ತು ಸಂಸತ್ತು ನಿರ್ಧರಿಸುತ್ತದೆ. ಸೇನೆಯ ಮುಂದೆ ಭದ್ರತೆಯ ಕೆಲಸವಿದ್ದು ಅದನ್ನು ಸೇನೆ ಮಾಡುತ್ತಿದೆ. ಮೂಲಭೂತೀಕರಣ ವಿಶ್ವಾದ್ಯಂತ ಗಂಭೀರ ಸಮಸ್ಯೆಯಾಗಿ ಮಾರ್ಪಟ್ಟಿದ್ದು, ಭಾರತ ಇದನ್ನು ಗಂಭೀರವಾಗಿ  ಪರಿಗಣಿಸುತ್ತದೆ ಎಂದು ನೇರವಾಗಿ ಉಗ್ರವಾದದ ವಿರುದ್ಧದ ಕಾರ್ಯಾಚರಣೆ ಮುಂದುವರೆಯಲಿದೆ ಎಂದು ರಾವತ್ ಹೇಳಿದರು.