ಕಾಶ್ಮೀರದಲ್ಲಿ ಶಾಂತಿ ಸ್ಥಾಪನೆ ಕೇವಲ ಬಾಯಿ ಮಾತಿಗೆ ಸೀಮಿತ: ಒಮರ್ ಅಬ್ದುಲ್ಲಾ

ಶ್ರೀನಗರ: ಕಣಿವೆ ರಾಜ್ಯ ಜಮ್ಮು ಮತ್ತು ಕಾಶ್ಮೀರದಲ್ಲಿ ಶಾಂತಿ ಸ್ಥಾಪನೆ ಕೇವಲ ಬಾಯಿ ಮಾತಿಗೆ ಸೀಮಿತವಾಗಿದ್ದು, ಇಂದಿಗೂ ಇಲ್ಲಿ ಸೈನಿಕರು ಹತರಾಗುತ್ತಿದ್ದಾರೆ ಎಂದು ಮಾಜಿ ಸಿಎಂ ಹಾಗೂ ನ್ಯಾಷನಲ್ ಕಾನ್ಫರೆನ್ಸ್ ಮುಖಂಡ ಒಮರ್ ಆಬ್ದುಲ್ಲಾ ಹೇಳಿದ್ದಾರೆ.

ಸೋಮವಾರ ಕಥುವಾದಲ್ಲಿ ಮಾತನಾಡಿದ ಅವರು, ಪಿಡಿಪಿ ಮತ್ತು ಬಿಡೆಪಿ ಮೈತ್ರಿ ಸರ್ಕಾರದಲ್ಲಿ ಕಾಶ್ಮೀರದಲ್ಲಿ ಶಾಂತಿ ನೆಲೆಸಿದೆ ಎಂಬು ಮಾತು ಸತ್ಯಕ್ಕೆ ದೂರವಾದದ್ದು.. ಇಂದಿಗೂ ಇಲ್ಲಿನ ಜನ ಸಂಘರ್ಷದಲ್ಲಿ ತೊಡಗಿದ್ದಾರೆ.  ಉಗ್ರರ ಗುಂಡಿಗೆ ಸೈನಿಕರು ಬಲಿಯಾಗುತ್ತಿದ್ದಾರೆ. ಈ ಹಿಂದೆಂದಿಗಿಂತಲೂ ಕಣಿವೆ ರಾಜ್ಯದಲ್ಲಿ ಈಗ ಪರಿಸ್ಥಿತಿ ಮತ್ತಷ್ಟು ಬಿಗಡಾಯಿಸಿದೆ ಎಂದು ಹೇಳಿದ್ದಾರೆ. ಅಂತೆಯೇ ಭಾರತ ಸರ್ಕಾರ ಪಾಕಿಸ್ತಾನ ಸರ್ಕಾರದೊಂದಿಗೆ ಸೌಹಾರ್ಧ  ಮಾತುಕತೆ ಆರಂಭಿಸದ ಹೊರತು ಇಲ್ಲಿನ ಪರಿಸ್ಥಿತಿ ಸುಧಾರಿಸುವ ಲಕ್ಷಣಗಳೇ ಕಾಣುತ್ತಿಲ್ಲ ಎಂದೂ ಅವರು ಎಚ್ಚರಿಕೆ ನೀಡಿದ್ದಾರೆ.

ಅಂತೆಯೇ ಮಧ್ಯವರ್ತಿಯಾಗಿ ಕೇಂದ್ರ ಸರ್ಕಾರ ನೇಮಿಸಿರುವ ದಿನೇಶ್ವರ ಶರ್ಮಾ ಅವರ ಕುರಿತು ಮಾತನಾಡಿದ ಒಮರ್ ಅಬ್ದುಲ್ಲಾ, ಕೇವಲ ಬಾಯಿ ಮಾತಿಗೆ ಮಾತ್ರವಲ್ಲದೇ ಕಾಶ್ಮೀರ ಸಮಸ್ಯೆಯನ್ನು ಗಂಭೀರವಾಗಿ  ಪರಿಗಣಿಸಿದಾಗ ಮಾತ್ರ ಸಮಸ್ಯೆ ಈಡೇರಿಕೆ ಸಾಧ್ಯ. ಈ ಬಗ್ಗೆ ನಿಷ್ಠಾವಂತ ಪ್ರಯತ್ನಗಳೂ ಕೂಡ ಅಗತ್ಯ ಎಂದು ಅವರು ಹೇಳಿದ್ದಾರೆ,

ಇತ್ತೀಚೆಗಷ್ಟೇ ಶೋಪಿಯಾನ್ ನಲ್ಲಿ 23 ವರ್ಷದ ಯೋಧನನ್ನು ಅಪಹರಿಸಿದ್ದ ಉಗ್ರರು ಆತನಿಗೆ ಹಿಂಸೆ ನೀಡಿ ಕೊಂದು ಹಾಕಿದ್ದರು. ವಾತ್ಮುಲ್ಲಾ ಪ್ರಾಂತ್ಯದಲ್ಲಿ ಸೈನಿಕರ ಶವ ಪತ್ತೆಯಾಗಿತ್ತು.