ಗೋ ಕಾಯ್ದೆ ವಿರೋಧಿಸಿ ಬಿಜೆಪಿ ತೊರೆದ 5 ಸಾವಿರ ಕಾರ್ಯಕರ್ತರು!

ಶಿಲ್ಲಾಂಗ್: ಕೇಂದ್ರದ ಎನ್ ಡಿಎ ಸರ್ಕಾರ ಇತ್ತೀಚೆಗೆ ಜಾರಿಗೆ ತಂದಿರುವ ಗೋ ಕಾಯ್ದೆಯನ್ನು ವಿರೋಧಿಸಿ ಮೇಘಾಲಯದಲ್ಲಿ ಸುಮಾರು 5 ಸಾವಿರಕ್ಕೂ ಅಧಿಕ ಕಾರ್ಯಕರ್ತ ಏಕಕಾಲದಲ್ಲಿ ಪಕ್ಷವನ್ನು ತೊರೆದಿದ್ದಾರೆ ಎಂದು  ತಿಳಿದುಬಂದಿದೆ.

ಮೇಘಾಲಯ ಬಿಜೆಪಿ ಯುವ ಘಟಕದ ತುರಾ ಜಿಲ್ಲಾಧ್ಯಕ್ಷ ವಿಲ್ವರ್ ಗ್ರಹಮ್ ಡ್ಯಾಂಗ್ಗೋ ಸೇರಿದಂತೆ ಸುಮಾರು 5 ಸಾವಿರಕ್ಕೂ ಅಧಿಕ ಮಂದಿ ಪಕ್ಷಕ್ಕೆ ರಾಜಿನಾಮೆ ನೀಡಿದ್ದಾರೆ. ಕೇಂದ್ರ ಸರ್ಕಾರದ ಮಾಂಸಕ್ಕಾಗಿ ಗೋ ಹತ್ಯಾ ನಿಷೇಧ  ಕಾಯ್ದೆಯನ್ನು ವಿರೋಧಿಸಿ ಪ್ರತಿಭಟನಾ ರೂಪವಾಗಿ ಕಾರ್ಯಕರ್ತರು ಈ ನಿರ್ಧಾರ ಕೈಗೊಂಡಿದ್ದಾರೆ ಎಂದು ಹೇಳಲಾಗುತ್ತಿದೆ. ಗೋ ಕಾಯ್ದೆ ಮೂಲಕ ಕೇಂದ್ರ ಸರ್ಕಾರ ಗೋಮಾಂಸವನ್ನು ಸೇವಿಸುವ ಬುಡಕಟ್ಟು ಮತ್ತು ಇತರ  ಸಮುದಾಯಗಳನ್ನು ನಿಗ್ರಹಿಸಲು ಪ್ರಯತ್ನಿಸುತ್ತಿದೆ ಎಂದು ಅವರು ಆರೋಪ ಮಾಡಿದ್ದಾರೆ.

ಈ ಬಗ್ಗೆ ಮಾತನಾಡಿರುವ ವಿಲ್ವರ್ ಗ್ರಹಮ್ ಡ್ಯಾಂಗ್ಗೋ ಅವರು, ನಮ್ಮದೇ ಜನಾಂಗದ ಜನರೊಂದಿಗೆ ಅವರ ಸಂಸ್ಕೃತಿ ಮತ್ತು ಸಂಪ್ರದಾಯ ಮತ್ತು ಭಾವನೆಗಳೊಂದಿಗೆ ಆಟವಾಡಲು ಸಾಧ್ಯವಿಲ್ಲ. ನಮ್ಮ ಮೇಲೆ ವಿಶ್ವಾಸವಿಟ್ಟು  ಅವರು ನಮ್ಮ ಆರಿಸಿರುತ್ತಾರೆ. ಬಿಜೆಪಿ ಮಾತ್ರವಲ್ಲ ಯಾವುದೇ ಪಕ್ಷ ಕೂಡ ಇಂತಹ ನಿರ್ಣಯ ಕೈಗೊಂಡಾಗ ನೋವಾಗುತ್ತದೆ. ನಾವು ಇದನ್ನು ಸಮರ್ಥಿಸಿಕೊಂಡರೆ ನಮ್ಮ ಜನರೇ ನಮ್ಮ ವಿರುದ್ಧ ತಿರುಗಿ ಬೀಳುತ್ತಾರೆ ಎಂದು  ಹೇಳಿದ್ದಾರೆ.

ಇನ್ನು ಕೇವಲ ಕಾರ್ಯಕರ್ತರು ಮಾತ್ರವಲ್ಲ ಮೇಘಾಲಯದ ಇಬ್ಬರು ಪ್ರಭಾವಿ ಮುಖಂಡರಾದ ಬಚು ಮರಕ್ ಮತ್ತು ಬರ್ನಾರ್ಡ್ ಮರಕ್ ಅವರೂ ಕೂಡ ಗೋಕಾಯ್ದೆಯಿಂದ ಅಸಮಾಧಾನಗೊಂಡು ಬಿಜೆಪಿ ಪಕ್ಷ ತೊರೆದಿದ್ದಾರೆ  ಎಂದು ತಿಳಿದುಬಂದಿದೆ.