ಕಾಶ್ಮೀರದಲ್ಲಿ ಪೆಲ್ಲೆಟ್ ಬದಲು ಪಾವಾ ಶೆಲ್ ಬಳಕೆಗೆ ಕೇಂದ್ರ ಒಪ್ಪಿಗೆ
ಮೆಣಸಿನ ಪುಡಿ ಆಧಾರಿತ ಮಾರಕವಲ್ಲದ ಯುದ್ಧ ಸಾಮಗ್ರಿಯನ್ನು ಹೊಂದಿರುವ ಪಾವಾ ಶೆಲ್ ಗಳನ್ನು...
Published On :
ನವದೆಹಲಿ: ಮೆಣಸಿನ ಪುಡಿ ಆಧಾರಿತ ಮಾರಕವಲ್ಲದ ಯುದ್ಧ ಸಾಮಗ್ರಿಯನ್ನು ಹೊಂದಿರುವ ಪಾವಾ ಶೆಲ್ ಗಳನ್ನು ಕಾಶ್ಮೀರದಲ್ಲಿ ಹಿಂಸಾತ್ಮಕ ಪ್ರತಿಭಟನೆಗಳನ್ನು ನಿಯಂತ್ರಿಸಲು ಪೆಲ್ಲೆಟ್ ಗನ್ ಗಳ ಬದಲಿಗೆ ಬಳಸಲು ಕೇಂದ್ರ ಗೃಹ ಖಾತೆ ಸಚಿವ ರಾಜನಾಥ್ ಸಿಂಗ್ ಶನಿವಾರ ಒಪ್ಪಿಗೆ ನೀಡಿದ್ದಾರೆ ಎಂದು ಅಧಿಕೃತ ಮೂಲಗಳು ತಿಳಿಸಿವೆ.
ಕಣಿವೆ ರಾಜ್ಯ ಕಾಶ್ಮೀರದಲ್ಲಿ ಎಲ್ಲಾ ರಾಜಕೀಯ ಪಕ್ಷಗಳ ಮುಖಂಡರೊಂದಿಗೆ ಶಾಂತಿ ಮಾತುಕತೆ ನಡೆಸಲು ಸರ್ವಪಕ್ಷ ನಿಯೋಗ ಭೇಟಿ ನೀಡುವುದಕ್ಕೆ ಮುಂಚಿತವಾಗಿ ಈ ಬೆಳವಣಿಗೆ ನಡೆದಿದೆ.
ಮಾರಕವಲ್ಲದ ಯುದ್ಧ ಸಾಮಗ್ರಿಗಳನ್ನು ಹೊಂದಿದ ಪಾವಾ ಶೆಲ್ ಗಳನ್ನು ಪ್ರತಿಭಟನಾಕಾರರ ಮೇಲೆ ಪ್ರಯೋಗಿಸಿದರೆ ತಾತ್ಕಾಲಿಕವಾಗಿ ಅವರ ಗುರಿಗಳನ್ನು ಅಶಕ್ತಗೊಳಿಸಬಹುದು ಮತ್ತು ಹಲವಾರು ನಿಮಿಷಗಳ ಕಾಲ ನಿಶ್ಚಲವಾಗಿ ಇರಿಸಬಹುದು.
ಉಗ್ರಗಾಮಿ ಕಮಾಂಡರ್ ಬುರ್ಹಾನ್ ವಾನಿಯ ಹತ್ಯೆಯ ಬಳಿಕ ಕಾಶ್ಮೀರದಲ್ಲಿ ಹಿಂಸಾಚಾರ, ಪ್ರತಿಭಟನೆ ವ್ಯಾಪಕಗೊಂಡ ಹಿನ್ನೆಲೆಯಲ್ಲಿ ಪರಿಸ್ಥಿತಿಯನ್ನು ನಿಯಂತ್ರಿಸಲು ತಜ್ಞರ ಸಮಿತಿ ಈ ಆಯ್ಕೆಯನ್ನು ನೀಡಿತ್ತು.
ಗೃಹ ಸಚಿವಾಲಯ, ಗಡಿ ಭದ್ರತಾ ಪಡೆ, ಕೇಂದ್ರ ಮೀಸಲು ಪೊಲೀಸ್ ಪಡೆ, ಜಮ್ಮು-ಕಾಶ್ಮೀರ ಪೊಲೀಸ್, ಐಐಟಿ-ದೆಹಲಿ ಮತ್ತು ಫ್ಯಾಕ್ಟರಿ ಬೋರ್ಡ್ ಫಿರಂಗಿಗಳ ಅಧಿಕಾರಿಗಳನ್ನೊಳಗೊಂಡ ಏಳು ಸದಸ್ಯರ ತಂಡ ನೀಡಿದ ಸಲಹೆ ಮೇರೆಗೆ ಈ ಶೆಲ್ ಗಳ ಬಳಕೆಗೆ ಸಲಹೆ ನೀಡಲಾಗಿತ್ತು.
ದೆಹಲಿಯಲ್ಲಿ ಶೆಲ್ ಗಳ ಬಳಕೆಯ ಸಂಪೂರ್ಣ ಪ್ರಯೋಗಾರ್ಥ ಪ್ರದರ್ಶನ ನಡೆಸಲಾಗಿತ್ತು. ಪರೀಕ್ಷೆ ನಡೆಸಿದ ಬಳಿಕ ಕಾಶ್ಮೀರ ಕಣಿವೆಯಲ್ಲಿ ನಡೆಯುತ್ತಿರುವ ಭಾರೀ ಪ್ರತಿಭಟನಾಕಾರರ ಗುಂಪನ್ನು ಹತೋಟಿಯಲ್ಲಿಡಲು ಶೆಲ್ ಬಳಕೆಗೆ ಒಪ್ಪಿಗೆ ನೀಡಲಾಯಿತು.
ಪ್ರತಿಭಟನಾಕಾರರನ್ನು ಚದುರಿಸಲು ಮತ್ತು ನಿಯಂತ್ರಿಸಲು ಇದುವರೆಗೆ ಪೆಲ್ಲೆಟ್ ಗನ್ ಗಳನ್ನು ಬಳಸಲಾಗುತ್ತಿತ್ತು. ಅದರಿಂದ ತೀವ್ರ ಕುರುಡುತನ ಮತ್ತು ಜನರಿಗೆ ತೀವ್ರ ಗಾಯವಾಗುವುದರಿಂದ ಅದಕ್ಕೆ ವ್ಯಾಪಕ ಟೀಕೆ ವ್ಯಕ್ತವಾದ ಹಿನ್ನೆಲೆಯಲ್ಲಿ ಪಾವಾ ಶೆಲ್ ಗಳನ್ನು ಇನ್ನು ಮುಂದೆ ಬಳಸಲಾಗುತ್ತದೆ.
ಗ್ವಾಲಿಯರ್ ನ ಗಡಿ ಭದ್ರತಾ ಪಡೆಯ ಟಿಯರ್ ಸ್ಮೋಕ್ ಯೂನಿಟ್(ಟಿಎಸ್ ಯು)ನ್ನು ಶೆಲ್ ಗಳ ತಯಾರಿಕೆಗೆ ಸಮಿತಿ ಶಿಫಾರಸು ಮಾಡಿದೆ.ಮೊದಲ ಬಾರಿಗೆ 50 ಸಾವಿರ ಪಾವಾ ಶೆಲ್ ಗಳನ್ನು ಉತ್ಪಾದಿಸಲಿದೆ.
Follow KannadaPrabha channel on WhatsApp
Subscribe to KannadaPrabha YouTube Channel and watch Videos
Download the KannadaPrabha News app to follow the latest news updates
Subscribe and Receive exclusive content and updates on your favorite topics
Disclaimer : ಕಾಮೆಂಟ್‌ಗಳಲ್ಲಿ ವ್ಯಕ್ತಪಡಿಸಿದ ಅಭಿಪ್ರಾಯಗಳು ಅವುಗಳನ್ನು ಪೋಸ್ಟ್ ಮಾಡುವ ವ್ಯಕ್ತಿಯ ಸಂಪೂರ್ಣ ಜವಾಬ್ದಾರಿಯಾಗಿದೆ; ಅವು kannadaprabha.com ನ ಅಭಿಪ್ರಾಯಗಳನ್ನು ಪ್ರತಿಬಿಂಬಿಸುವುದಿಲ್ಲ. ಒಬ್ಬ ವ್ಯಕ್ತಿ, ಸಮುದಾಯ, ಧರ್ಮ ಅಥವಾ ದೇಶದ ವಿರುದ್ಧ ಅವಹೇಳನಕಾರಿ ಅಥವಾ ಅಶ್ಲೀಲವಾದ ಯಾವುದೇ ಕಾಮೆಂಟ್‌ಗಳು ಭಾರತ ಸರ್ಕಾರದ ಮಾಹಿತಿ ತಂತ್ರಜ್ಞಾನ ನೀತಿಯ ಅಡಿಯಲ್ಲಿ ಶಿಕ್ಷಾರ್ಹವಾಗಿವೆ. ಅಂತಹ ಕಾಮೆಂಟ್‌ಗಳ ವಿರುದ್ಧ ಸೂಕ್ತ ಕಾನೂನು ಕ್ರಮ ಕೈಗೊಳ್ಳಲಾಗುವುದು.