ವಿಶಾಖಪಟ್ಟಣಂ ಫಾರ್ಮಾ ಸಿಟಿಯಲ್ಲಿ ಅಗ್ನಿ ಅನಾಹುತ,10 ಮಂದಿಗೆ ಗಾಯ

ವಿಶಾಖ ಪಟ್ಟಣಂ: ಅಮೋನಿಯಂ ನೈಟ್ರೇಟ್ ಸ್ಫೋಟಗೊಂಡ ಪರಿಣಾಮ 10 ಮಂದಿ ತೀವ್ರ ಗಾಯಗೊಂಡು ಇಬ್ಬರ ಸ್ಥಿತಿ ಚಿಂತಾಜನಕವಾಗಿರುವ ಘಟನೆ ವಿಶಾಖ ಪಟ್ಟಣಂ ಹೊರವಲಯದಲ್ಲಿ ನಡೆದಿದೆ.

ವಿಶಾಖಪಟ್ಟಣಂನ ಪಾರ್ವಾಡದ ಜವಹರ್ ಲಾಲ್ ನೆಹರೂ ಫಾರ್ಮಾ ಸಿಟಿಯ ಶ್ರೀಕರ್ ಲ್ಯಾಬೋರೇಟರಿಯಲ್ಲಿ ಅಮೋನಿಯಂ ನೈಟ್ರೇಟ್ ಇದ್ದ ಟ್ಯಾಂಕ್ ಸ್ಫೋಟಗೊಂಡಿದೆ. ಈ ವೇಳೆ ಪಕ್ಕದಲ್ಲೇ ನಿಂತಿದ್ದ ಸಿಬ್ಬಂದಿ ಸುಟ್ಟ ಗಾಯಗಳಿಂದ ಬಳಲುತ್ತಿದ್ದಾರೆ. ಇದರಲ್ಲಿ ಇಬ್ಬರ ಸ್ಥಿತಿ ಗಂಭೀರವಾಗಿದೆ. ಗಾಯಾಳುಗಳನ್ನು ವಿಶಾಖಪಟ್ಟಣಂ ಆಸ್ಪತ್ರೆಗೆ ದಾಖಲಿಸಲಾಗಿದೆ.

ಉಳಿದ ಕಾರ್ಮಿಕರು ಘಟನೆಯಿಂದ ತಪ್ಪಿಸಿಕೊಳ್ಳಲು ಓಡಿ ಹೋಗಿದ್ದಾರೆ. ಅದೃಷ್ಟವಶಾತ್ ಬೆಂಕಿ ಬೇರೆಡೆ ಹಬ್ಬಿಕೊಳ್ಳಲು ಬಿಡದೇ ಶೀಘ್ರವಾಗಿ ನಂದಿಸಿದ್ದರಿಂದ ಹೆಚ್ಚಿನ ಪ್ರಮಾಣದ ಸಾವುನೋವನ್ನು ತಪ್ಪಿಸಿದಂತಾಗಿದೆ.

ಕಳೆದ ಏಪ್ರಿಲ್ 27 ರಂದು ದುವ್ವಡಾದಲ್ಲಿರುವ ಬಯೋಮ್ಯಾಕ್ಸ್ ಫ್ಯೂಯೆಲ್ಸ್ ನಲ್ಲಿ ಅಗ್ನಿ ಅವಘಡ ಸಂಭವಿಸಿತ್ತು. ಒಂದು ತಿಂಗಳಲ್ಲೇ ಎರಡು ಅಗ್ನಿ ಅನಾಹುತಗಳು ಸಂಭವಿಸಿದೆ.