ಬಂಧಿತ ಗೃಹ ಸಚಿವಾಲಯದ ಅಧಿಕಾರಿ ಅಮಾನತು

ನವದೆಹಲಿ: ಭ್ರಷ್ಟಾಚಾರ ಆರೋಪದಡಿ ಸಿಬಿಐ ಅಧಿಕಾರಿಗಳು ಕೇಂದ್ರ ಗೃಹ ಸಚಿವಾಲಯ ಅಧೀನ ಕಾರ್ಯದರ್ಶಿ ಆನಂದ್ ಜೋಶಿ ಅವರನ್ನು ಬಂಧಿಸಲಾಗಿದ್ದು, ಇದೀಗ ಸೇವೆಯಿಂದ ಅಮಾನತಿನಲ್ಲಿಡಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಸಿಬಿಐನಿಂದ ಸಮ್ಮನ್ಸ್ ಬಂದ ಮೇಲೆ ಜೋಶಿಯವರು ಉತ್ತರ ಪ್ರದೇಶದ ಗಜಿಯಾಬಾದ್ ನಲ್ಲಿರುವ ತಮ್ಮ ಮನೆಯಿಂದ ಕಾಣೆಯಾಗಿದ್ದರು. ಅವರನ್ನು ಮೊನ್ನೆ 15ರಂದು ಪಶ್ಚಿಮ ದೆಹಲಿಯಲ್ಲಿ ಬಂಧಿಸಲಾಗಿತ್ತು.

ಜೋಶಿಯವರನ್ನು ಇತ್ತೀಚೆಗೆ ವಿದೇಶಾಂಗ ವಿಭಾಗಕ್ಕೆ ವರ್ಗಾಯಿಸಲಾಗಿತ್ತು. ವಿದೇಶಿ ದೇಣಿಗೆ ನಿಯಂತ್ರಣ ಕಾಯ್ದೆ (FCRA)ಯ ಕಡತಗಳು ಕಾಣೆಯಾಗಿದ್ದವು. ನಂತರ ತಪಾಸಣೆ ಮಾಡಿ ಅವುಗಳನ್ನು ಸಚಿವಾಲಯಕ್ಕೆ ವಾಪಸ್ ತರಿಸಲಾಗಿತ್ತು. ಸರ್ಕಾರೇತರ ಸಂಘಟನೆಯ ಕೆಲಸಕ್ಕಾಗಿ ಅವರು ಲಂಚ ತೆಗೆದುಕೊಂಡ ಆರೋಪ ಅವರ ಮೇಲಿದೆ.

ಭಾರತೀಯ ದಂಡ ಸಂಹಿತೆ ಮತ್ತು ಭ್ರಷ್ಟಾಚಾರ ನಿಯಂತ್ರಣ ಕಾಯ್ದೆ 1988ರಡಿ ಅಪರಾಧ ಮತ್ತು ಪಿತೂರಿ ನಡೆಸಿದ ಆರೋಪ ಅವರ ಮೇಲಿದೆ.