ಮನೆಕೆಲಸದವಳ ಮೇಲೆ ಹಲ್ಲೆ: ಸೌದಿ ಅರೇಬಿಯಾದಲ್ಲಿ ತೆಲಂಗಾಣ ಯುವತಿ ಸಾವು

ತೆಲಂಗಾಣ: ಸೌದಿ ಅರೇಬಿಯಾಗೆ ಮನೆಕೆಲಸಕ್ಕಾಗಿ ತೆರಳಿದ್ದ ತೆಲಂಗಾಣ ಯುವತಿ ಮನೆ ಮಾಲೀಕರಿಂದ ಹಲ್ಲೆಗೊಳಗಾಗಿ, ಆಸ್ಪತ್ರೆಯಲ್ಲಿ ಸಾವನ್ನಪ್ಪಿರುವ ಘಟನೆ ನಡೆದಿದೆ.

ಹೈದರಾಬಾದ್ ನ ಅಸಿಮಾ ಖಾಟೂನ್ ಮೃತ ಯುವತಿ. ಮನೆ ಮಾಲೀಕರಿಂದ ಹಲ್ಲೆಗೊಳಗಾಗಿ ತೀವ್ರ ಗಾಯಗಳಿಂದ ಬಳಲುತ್ತಿದ್ದ ಈಕೆ ರಿಯಾದ್ ನ ಕಿಂಗ್ ಸೌದ್ ಆಸ್ಪತ್ರೆಯಲ್ಲಿ ಮೃತ ಪಟ್ಟಿದ್ದಾಳೆ.

ಅಪರಿಚಿತ ವ್ಯಕ್ತಿಯೊಬ್ಬರು ಕರೆ ಮಾಡಿ ಆಸೀಮಾ ಪೋಷಕರಿಗೆ ವಿಷಯ ತಿಳಿಸಿದ್ದಾರೆ. ಇನ್ನೂ ಆಸೀಮಾ ಪೋಷಕರು ತೆಲಂಗಾಣ ಕಾರ್ಯದರ್ಶಿಗೆ ಈ ವಿಷಯ ತಿಳಿಸಿದ್ದಾರೆ.  ಆಸೀಮಾ ತನ್ನ ಪೋಷಕರಿಗೆ ಕರೆ ಮಾಡಿ ತನಗೆ ದೈಹಿಕ ಹಾಗೂ ಮಾನಸಿಕ ಕಿರುಕುಳ ನೀಡುತ್ತಿದ್ದಾರೆ ಎಂದು ಹೇಳಿದ್ದಾಳೆ.

ಡಿಸೆಂಬರ್ 2015 ರಂದು ದಾಬೀರ್ ಪುರ್ ನ ಶಾಹ್ ಕಾಲೋನಿ ನಿವಾಸಿ ಆಸೀಮಾ, 90 ದಿನಗಳ ಬ್ಯುಸಿನೆಸ್ ವೀಸಾದ ಮೇಲೆ ರಿಯಾದ್ ಗೆ ತೆರಳಿದ್ದಳು. ಹೈದರಾಬಾದ್ ನಿಂದ ಹೊರಟ ನಂತರ ಆಕೆಯ ಬಗ್ಗೆ ಯಾವುದೇ ಮಾಹಿತಿ ತಿಳಿದು ಬಂದಿರಲಿಲ್ಲ,

ಎರಡು ತಿಂಗಳ ಹಿಂದೆ ತನ್ನ ಪೋಷಕರಿಗೆ ಕರೆ ಮಾಡಿದ ಆಸೀಮಾ ತನಗೆ ಮನೆ ಮಾಲೀಕರು ಕಿರುಕುಳ ನೀಡುತ್ತಿರುವುದಾಗಿ ಹೇಳಿದ್ದಳು. ಜತೆಗೆ ವಾಪಸ್ ತನ್ನನ್ನು ಕರೆಸಿಕೊಳ್ಳುವಂತೆ ಕುಟುಂಬಸ್ಥರಲ್ಲಿ ಮನವಿ ಮಾಡಿದ್ದಳು. ಪ್ರಕರಣ ಸಂಬಂಧ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.