ಅಗಸ್ಟಾ ಒಪ್ಪಂದಕ್ಕೆ ಕಾಂಗ್ರೆಸ್ ಎಲ್ಲ ರೀತಿಯಲ್ಲಿ ಸಹಕರಿಸಿತ್ತು: ಮನೋಹರ್ ಪರಿಕ್ಕರ್

ನವದೆಹಲಿ: ಅಗಸ್ಟಾವೆಸ್ಟ್ ಲ್ಯಾಂಡ್ ಹೆಲಿಕಾಪ್ಟರ್ ಹಗರಣದಲ್ಲಿ ಕಾಂಗ್ರೆಸ್ ವಿರುದ್ಧ ವಾಗ್ದಾಳಿ ಮುಂದುವರಿಸಿರುವ ಬಿಜೆಪಿ, ಹಿಂದಿನ ಯುಪಿಎ ಸರ್ಕಾರ ಅತಿ ಗಣ್ಯರು ಬಳಸುವ ಹೆಲಿಕಾಪ್ಟರ್ ಗುತ್ತಿಗೆ ಒಪ್ಪಂದಕ್ಕೆ ಸಹಕರಿಸಿದ್ದು, ಇದರ ಮುಖ್ಯ ಫಲಾನುಭವಿಗಳನ್ನು ಪತ್ತೆ ಹಚ್ಚಲಾಗುವುದು ಎಂದು ಹೇಳಿದ್ದಾರೆ.

ಈ ಬಗ್ಗೆ ಇಂದು ಲೋಕಸಭೆಯಲ್ಲಿ ಹೇಳಿಕೆ ನೀಡಿದ ರಕ್ಷಣಾ ಸಚಿವ ಮನೋಹರ್ ಪರಿಕ್ಕರ್ ಮಾಜಿ ವಾಯುಪಡೆ ಮುಖ್ಯಸ್ಥ ಎಸ್.ಪಿ.ತ್ಯಾಗಿ ಮತ್ತು ಗೌತಮ್ ಕೈತಾನ್ ಇಬ್ಬರೂ ಪ್ರಕರಣದ ಮುಖ್ಯ ಆರೋಪಿಗಳಾಗಿದ್ದು, ಭ್ರಷ್ಟಾಚಾರವೆಂಬ ನದಿಯ ನೀರಿನಲ್ಲಿ ಕೈ ತೊಳೆದುಕೊಂಡಿದ್ದಾರೆ. ಪ್ರಕರಣ ಎತ್ತ ಸಾಗಿದೆ ಎಂಬ ಬಗ್ಗೆ ಸರ್ಕಾರ ಕಂಡುಹಿಡಿಯಲಿದೆ ಎಂದರು.

ಲೋಕಸಭೆಯಲ್ಲಿ ಗಮನ ಸೆಳೆಯುವ ವಿಷಯ ಕುರಿತಂತೆ ಮಾತನಾಡಿದ ಅವರು, ಕಾಂಗ್ರೆಸ್ ನ್ನು ತೀವ್ರ ತರಾಟೆಗೆ ತೆಗೆದುಕೊಂಡರು.

ಅಗಸ್ಟಾವೆಸ್ಟ್ ಲ್ಯಾಂಡ್ ಒಪ್ಪಂದ ನಡೆಯಲು ಕಾಂಗ್ರೆಸ್ ಸಾಧ್ಯವಿರುವ ಎಲ್ಲಾ ಸಹಾಯಗಳನ್ನೂ ಮಾಡಿತ್ತು, ಕಂಪೆನಿಯ ಭ್ರಷ್ಟಾಚಾರವನ್ನು ಬಯಲಿಗೆಳೆಯುತ್ತಿರುವುದು ಪೂರ್ವಭಾವಿ ಕ್ರಮವಲ್ಲ, ಬದಲಿಗೆ ಸಂದರ್ಭ ಹಾಗೆ ಮಾಡಿಸುತ್ತಿದೆ ಎಂದರು.

ಸಾವಿರಾರು ಕೋಟಿ ರೂಪಾಯಿ ಹಗರಣದಲ್ಲಿ ತ್ಯಾಗಿ ಮತ್ತು ಕೈತಾನ್ ಸಣ್ಣ ಮಟ್ಟಿನ ಪಾತ್ರಧಾರಿಗಳಷ್ಟೆ. ಮುಖ್ಯ ಫಲಾನುಭವಿಗಳನ್ನು ಸರ್ಕಾರ ಕಂಡುಹಿಡಿಯಲಿದೆ ಎಂದು ಹೆಲಿಕಾಪ್ಟರ್ ಭ್ರಷ್ಟಾಚಾರವನ್ನು ಗಂಗಾನದಿ ನೀರಿಗೆ ಹೋಲಿಸಿದರು.

ರಕ್ಷಣಾ ಸಚಿವರ ಹೇಳಿಕೆಗೆ ವಿರೋಧ ವ್ಯಕ್ತಪಡಿಸಿದ ಕಾಂಗ್ರೆಸ್ ಸದಸ್ಯರು ಸದನ ತೊರೆದು ಹೊರನಡೆದರು.ಆಗ ಅವರನ್ನುದ್ದೇಶಿಸಿ ಮಾತನಾಡಿದ ಪರಿಕ್ಕರ್, ನೀವ್ಯಾಕೆ ಇದಕ್ಕೆ ಸಂಬಂಧಪಡುತ್ತೀರಿ ? ನಾನು ಯಾರ ಹೆಸರನ್ನೂ ಹೇಳಿಲ್ಲ. ಅಂದರೆ ನಿಮಗೆ ಈ ಬಗ್ಗೆ ತಿಳಿದಿದೆಯೇ? ಎಂದು ಕಾಂಗ್ರೆಸ್ ಸದಸ್ಯರನ್ನು ಪ್ರಶ್ನಿಸಿದರು.