ಅದಾನಿ ಸಂಸ್ಥೆಗೆ ಅನುಕೂಲ ಮಾಡಲು ಭೂಮಿಯ ದರ ಇಳಿಕೆ: ಜಾರ್ಖಂಡ್ ವಿಪಕ್ಷಗಳ ಆರೋಪ

ರಾಂಚಿ:  ಜಾರ್ಖಂಡ್ ನಲ್ಲಿ ಉದ್ಯಮಿ ಅದಾನಿಗೆ ಅನುಕೂಲ ಮಾಡುವುದಕ್ಕಾಗಿ ಭೂಮಿಯ ದರವನ್ನು ಇಳಿಸಲಾಗಿದೆ ಎಂಬ ಆರೋಪ ವಿಧಾನಸಭಾ ಅಧಿವೇಶನದಲ್ಲಿ ಕೇಳಿಬಂದಿದೆ.

ಸಂತಾಲ್ ಪರ್ಗನಾದಲ್ಲಿನ ಭೂಮಿಯ ದರವನ್ನು ಶೇ.80 ರಷ್ಟು ಇಳಿಕೆ ಮಾಡಲಾಗಿದೆ. ಈ ಬಗ್ಗೆ 28 -10 -2015 ರಲ್ಲಿ ರಾಜ್ಯ ಸರ್ಕಾರ ಆದೇಶ ಹೊರಡಿಸಿದೆ. ಭಾರತದ ಇತಿಹಾಸದಲ್ಲೇ ಭೂಮಿಯ ದರವನ್ನು ಶೇ.80 ರಷ್ಟು ಇಳಿಕೆ ಮಾಡಲಾಗಿದೆ, ಅದಾನಿ ಸಂಸ್ಥೆಗೆ ಅನುಕೂಲ ಮಾಡುವುದೇ ಇದರ ಹಿಂದಿನ ಉದ್ದೇಶ ಎಂದು ಜಾರ್ಖಂಡ್ ಮುಕ್ತಿ ಮೋರ್ಚಾದ ಶಾಸಕ ಸ್ಟೀಫನ್ ಮರಾಂಡಿ ಆರೋಪಿಸಿದ್ದಾರೆ.

ಭೂದರವನ್ನು ಕಡಿಮೆ ಮಾಡಿರುವ ಬಗ್ಗೆ ಸ್ಟೀಫನ್ ಮರಾಂಡಿ ನಿಲುವಳಿ ಸೂಚನೆ ಮಂಡಿಸಿದರು, ಆದರೆ ಜಾರ್ಖಂಡ್ ನ ವಿಧಾನಸಭಾಧ್ಯಕ್ಷರು ನಿಲುವಳಿ ಸೂಚನೆಯನ್ನು ತಿರಸ್ಕರಿಸಿದ ಕಾರಣ ವಿಪಕ್ಷದವರು ಪ್ರತಿಭಟನೆ ನಡೆಸಿದ್ದರಿಂದ ವಿಧಾನಸಭೆಯಲ್ಲಿ ಕೆಲ ಕಾಲ ಗದ್ದಲ ಉಂಟಾಯಿತು.