ಏಷ್ಯಾ ರಾಷ್ಟ್ರಗಳ ಸಂಪರ್ಕ ಏಕಪಕ್ಷೀಯ ನಿರ್ಧಾರವಾಗಬಾರದು: ಚೀನಾಕ್ಕೆ ಭಾರತ ಸಲಹೆ

ನವದೆಹಲಿ: ರಸ್ತೆ ಹಾಗೂ ಸಮುದ್ರ ಮಾರ್ಗದ ಮೂಲಕ ಮಹಾತ್ವಾಕಾಂಕ್ಷೆಯ ಏಷ್ಯಾ ಸಂಪರ್ಕ ಉದ್ಯಮಕ್ಕೆ ಚೀನಾ ಏಕಪಕ್ಷೀಯವಾಗಿ ನಿರ್ಧಾರ ತೆಗೆದುಕೊಳ್ಳುವ ಬದಲು ಸಲಹೆಗಳನ್ನು ಪಡೆದುಕೊಳ್ಳುವುದು ಉತ್ತಮ ಎಂದು ಭಾರತ ಹೇಳಿದೆ.

ವಿದೇಶಾಂಗ ಕಾರ್ಯದರ್ಶಿ ಎಸ್. ಜೈಶಂಕರ್, ಏಷ್ಯಾ ಖಂಡಗಳ ಸಂಪರ್ಕಕ್ಕೆ ಭಾರತದ ದೃಷ್ಟಿಕೋನದ ಬಗ್ಗೆ ಬೆಳಕು ಚೆಲ್ಲಿದರು.

ವಿದೇಶಾಂಗ ವ್ಯವಹಾರಗಳ ಸಚಿವಾಲಯ ಮತ್ತು ಅಬ್ಸರ್ವರ್ ರಿಸರ್ಚ್ ಫೌಂಡೇಶನ್ ಆಯೋಜಿಸಿದ್ದ ಭೂ ರಾಜಕೀಯ ಅಂತಾರಾಷ್ಟ್ರೀಯ ಸಮ್ಮೇಳನದಲ್ಲಿ ಮಾತನಾಡಿದ ಅವರು, ದೇಶದ ಶಕ್ತಿಯನ್ನು ಬಳಸುವುದಕ್ಕೆ ಬೆದರಿಕೆಯಿರಬಾರದು. ಶಿಸ್ತು ಮತ್ತು ಸಂಯಮ ನಮ್ಮ ವರ್ತನೆಯ ಗುಣಮಟ್ಟವಾಗಿರಬೇಕು ಎಂದು ಪರೋಕ್ಷವಾಗಿ ಚೀನಾವನ್ನು ಉಲ್ಲೇಖಿಸಿ ಹೇಳಿದರು.

ದೇಶಗಳ ಮಧ್ಯೆ ಮಾರ್ಗಗಳ ಕೊಂಡಿ ಶತ್ರುತ್ವ ಭಾವವನ್ನು ದೂರ ಮಾಡಬೇಕು. ಸ್ಥಳೀಯ ಮಟ್ಟದಲ್ಲಿ ಒತ್ತಡವನ್ನುಂಟುಮಾಡಬಾರದು. ಏಷ್ಯಾ ಸಂಪರ್ಕ ಅಂತಾರಾಷ್ಟ್ರೀಯ ನೀತಿ ನಿಯಮ ಮತ್ತು ಸಂಪ್ರದಾಯಗಳನ್ನು ಬೆಸೆಯಬೇಕು ಎಂದು ಅವರು ಹೇಳಿದರು.