'ಅವೇಕ್': ಪರಮಹಂಸ ಯೋಗಾನಂದರ ಜೀವನ ಚರಿತ್ರೆಯ ಚಿತ್ರ ಇಂದು ಬಿಡುಗಡೆ

ನವದೆಹಲಿ: ವಿಶ್ವಾದ್ಯಂತ ಹಲವು ಜನರ ಮನಗೆದ್ದು ಪ್ರಶಸ್ತಿ ಗೆದ್ದಿದ್ದ, ಯೋಗಾನಂದ ಅವರ ಜೀವನ ಚರಿತ್ರೆಯ ಸಾಕ್ಷ್ಯ ಚಿತ್ರ ಜೂ.17 ರಂದು ಬಿಡುಗಡೆಯಾಗಲಿದೆ.

ಅವೇಕ್ (ಎಚ್ಚರ) ಯೋಗಿ ಪರಮಹಂಸ ಯೋಗಾನಂದ ಅವರ ಜೀವನಚರಿತ್ರೆಯ ಕುರಿತಾದ ಸಾಕ್ಷ್ಯಚಿತ್ರವಾಗಿದ್ದು ಬಾಲಿವುಡ್ ನ ಹಿರಿಯ ನಟ ಅನುಪಮ್ ಖೇರ್ ಸಾಕ್ಷ್ಯಚಿತ್ರಕ್ಕೆ ನಿರೂಪಣೆ ನೀಡಿದ್ದಾರೆ. ಜೂ.21 ರಂದು ಅಂತಾರಾಷ್ಟ್ರೀಯ ಯೋಗ ದಿನಾಚರಣೆ ನಡೆಯಲ್ಲಿದ್ದು, ಇದಕ್ಕೂ ಭಾರತದ ಯೋಗಿ ಪರಮಹಂಸ ಯೋಗಾನಂದ ಅವರ ಜೀವನಚರಿತ್ರೆ ಕುರಿತು ಚಿತ್ರ ಬಿಡುಗಡೆಯಾಗುತ್ತಿರುವುದು ಮತ್ತೊಂದು ವಿಶೇಷವಾಗಿದೆ. 
ಮುಂಬೈ, ನವದೆಹಲಿ, ಕೋಲ್ಕತಾ, ಬೆಂಗಳೂರು, ಚಂಡೀಗಢ ಸೇರಿದಂತೆ ಭಾರತದ ಪ್ರಮುಖ ನಗರದಲ್ಲಿ ಅವೇಕ್ ಚಿತ್ರ ಬಿಡುಗಡೆಯಾಗುತ್ತಿದೆ. ಅಕಾಡೆಮಿ ಪ್ರಶಸ್ತಿ ನಾಮನಿರ್ದೇಶಿತ ನಿರ್ದೇಶಕರಾದ ಪಾವೊಲಾ ಡಿ ಫ್ಲೋರಿಯೋ ಮತ್ತು ಲಿಸಾ ಲೀಮನ್ ಪರಮಹಂಸ ಯೋಗಾನಂದ ಅವರ ಜೀವನಚರಿತ್ರೆ ಚಿತ್ರವನ್ನು ನಿರ್ದೇಶನ ಮಾಡಿದ್ದು, ಸಾಕ್ಷ್ಯಚಿತ್ರದಲ್ಲಿ ಜಾರ್ಜ್ ಹ್ಯಾರಿಸನ್, ರವಿಶಂಕರ್, ಕೃಷ್ಣ ದಾಸ್ ಸೇರಿದಂತೆ ಹಲವು ಖ್ಯಾತ ನಾಮರನ್ನು ಸಂದರ್ಶನ ಮಾಡಲಾಗಿದೆ.
ಭಾರತಕ್ಕೆ ನನ್ನ ಮನಸ್ಸಿನಲ್ಲಿ ವಿಶೇಷ ಸ್ಥಾನವಿದೆ. ಅವೇಕ್ ಚಿತ್ರವನ್ನು ಚಿತ್ರೀಕರಿಸುವುದಕ್ಕಾಗಿಯೇ ಭಾರತಕ್ಕೆ ಮೊದಲ ಬಾರಿಗೆ ಭೇಟಿ ನೀಡಿದೆ. ಪರಮಹಂಸ ಯೋಗಾನಂದ ಅವರ ಬೋಧನೆಗಳು ನನ್ನ ಜೀವನವನ್ನು ಸಂಪೂರ್ಣವಾಗಿ ಬದಲಾವಣೆ ಮಾಡುತ್ತದೆ ಎಂದು ಅಂದುಕೊಂಡಿರಲಿಲ್ಲ ಎಂದು ನಿರ್ದೇಶಕ ಪಾವೊಲಾ ಡಿ ಫ್ಲೋರಿಯೋ ತಿಳಿಸಿದ್ದಾರೆ.