ತಮಿಳುನಾಡು ಹೊರತುಪಡಿಸಿ ಜಿಎಸ್ ಟಿಗೆ ಎಲ್ಲಾ ರಾಜ್ಯಗಳಿಂದಲೂ ಬೆಂಬಲ: ಅರುಣ್ ಜೇಟ್ಲಿ

ಕೋಲ್ಕತಾ: ಜಿಎಸ್ ಟಿ ಮಸೂದೆಗೆ ಸಂಬಂಧಿಸಿದಂತೆ ಮಾತನಾಡಿರುವ ಕೇಂದ್ರ ವಿತ್ತ ಸಚಿವ ಅರುಣ್ ಜೇಟ್ಲಿ, " ಜಿಎಸ್ ಟಿ ಮಸೂದೆಗೆ ವಾಸ್ತವದಲ್ಲಿ ಎಲ್ಲಾ ರಾಜ್ಯಗಳೂ ಬೆಂಬಲ ನೀಡಿವೆ ಆದರೆ ತಮಿಳುನಾಡು ರಾಜ್ಯ ಮಾತ್ರ ಕೆಲವೊಂದು ಅಂಶಗಳಿಗೆ ಬೆಂಬಲ ನೀಡಿಲ್ಲ" ಎಂದು ಹೇಳಿದ್ದಾರೆ.
ಜಿಎಸ್ ಟಿ ಜಾರಿಗೆ ಯಾವುದೇ ಗಡುವಿಲ್ಲ ಎಂದು ಹೇಳಿರುವ ಅರುಣ್ ಜೆಟ್ಲಿ, 2016 ರ ಏಪ್ರಿಲ್ 1 ರಿಂದ ಜಿಎಸ್ ಟಿ ಮಸೂದೆ ಜಾರಿಗೊಳಿಸಲು ಉದ್ದೇಶಿಸಲಾಗಿತ್ತು. ಆದರೆ ಕಾಂಗ್ರೆಸ್ ಪಕ್ಷದ ಅಡಚಣೆಯಿಂದಾಗಿ ತಿದ್ದುಪಡಿ ಮಸೂದೆ ರಾಜ್ಯಸಭೆಯಲ್ಲಿ ಅಂಗೀಕಾರವಾಗದೇ ಹಾಗೆಯೇ ಉಳಿದಿದೆ ಎಂದು ಅರುಣ್ ಜೇಟ್ಲಿ ತಿಳಿಸಿದ್ದಾರೆ.
ಜಿಎಸ್ ಟಿ ಮಸೂದೆಗೆ ಎಲ್ಲಾ ರಾಜ್ಯಗಳ ಬೆಂಬಲವಿದ್ದರೂ ತಮಿಳುನಾಡು ಸರ್ಕಾರ ಮಾತ್ರ ಕೆಲವು ಅಂಶಗಳಿಗೆ ವಿರೋಧಿಸಿದ್ದು, ಬದಲಾವಣೆಗಾಗಿ ಸಲಹೆಗಳನ್ನೂ ನೀಡಿವೆ ಎಂದು ಕೋಲ್ಕತಾದಲ್ಲಿ ನಡೆದ ರಾಜ್ಯ ಸರ್ಕಾರಗಳ ಹಣಕಾಸು ಸಚಿವರ ಸಮ್ಮೇಳನದಲ್ಲಿ ಭಾಗವಹಿಸಿದ್ದ ಅರುಣ್ ಜೇಟ್ಲಿ ಮಾಧ್ಯಮಗಳಿಗೆ ತಿಳಿಸಿದ್ದಾರೆ.
ಪಶ್ಚಿಮ ಬಂಗಾಳದ ಹಣಕಾಸು ಸಚಿವ ಅಮಿತ್ ಮಿತ್ರ, ಹಣಕಾಸು ಸಚಿವರೂ ಆಗಿರುವ ಅರುಣಾಚಲ ಪ್ರದೇಶ, ಮೇಘಾಲಯದ ಮುಖ್ಯಮಂತ್ರಿಗಳು, ದೆಹಲಿಯ ಉಪಮುಖ್ಯಮಂತ್ರಿ ಮನೀಶ್ ಸಿಸೋಡಿಯ ಸೇರಿದಂತೆ ಸಮ್ಮೇಳನದಲ್ಲಿ 22 ರಾಜ್ಯಗಳ ಹಣಕಾಸು ಸಚಿವರು ಭಾಗವಹಿಸಿದ್ದರು.