ಹಿಮಾಚಲ ಪ್ರದೇಶದಲ್ಲಿ ಭೀಕರ ರಸ್ತೆ ಅಪಘಾತ: ಬಸ್ ಉರುಳಿ ಬಿದ್ದು 8 ಸಾವು, 20 ಗಾಯ

ಸೋಲಾನ್: ಹಿಮಾಚಲ ಪ್ರದೇಶದಲ್ಲಿ ಭೀಕರ ರಸ್ತೆ ಅಪಘಾತ ಸಂಭವಿಸಿದ್ದು, ಖಾಸಗಿ ಬಸ್ ಒಂದು ಗಿರಿಕಂದರದ ಬಳಿ ಉರುಳಿ ಬಿದ್ದ ಪರಿಣಾಮ 8 ಮಂದಿ ಸಾವನ್ನಪ್ಪಿ, 20 ಮಂದಿ ಗಾಯಗೊಂಡಿರುವ ಘಟನೆ ಶನಿವಾರ ನಡೆದಿದೆ,

ಸೋಲಾನ್ ಜಿಲ್ಲೆಯ ದರ್ಲಾಘಾಟ್ ಬಳಿಯಿರುವ ಗಿರಿಕಂದರದ ಬಳಿ ಘಟನೆ ನಡೆದಿದ್ದು, ಘಟನೆ ವೇಳೆ ಮಹಿಳೆಯರು ಸೇರಿ ಐವರು ಸ್ಥಳದಲ್ಲೇ ಸಾವನ್ನಪ್ಪಿದ್ದಾರೆ. ಇನ್ನು ಮೂವರನ್ನು ಆಸ್ಪತ್ರೆಗೆ ಸಾಗಿಸುವಾಗ ಮಾರ್ಗ ಮಧ್ಯೆ ಸಾವನ್ನಪ್ಪಿದ್ದಾರೆಂದು ಪೊಲೀಸರು ಹೇಳಿದ್ದಾರೆ.

ಸಾವನ್ನಪ್ಪಿದ್ದ 8 ಮಂದಿಯಲ್ಲಿ ನಾಲ್ವರನ್ನು ಗುರ್ತಿಸಲಾಗಿದ್ದು, ಬಲಾಸ್ಪುರದ ವಿಕಾಸ್ (30)ಸ ಮಂಡಿಯ ತೃಪ್ತಿ (21), ಜಾರ್ಖಾಂಡ್ ಮೂಲದ ಬನಾರಸಿ ಮೆಹ್ತೋ (40), ಕುಲ್ಲಿ ಜಿಲ್ಲೆಯ ಚೌಹಾಣ್ ಸಿಂಗ್ (35) ಎಂದು ಗುರ್ತಿಸಲಾಗಿದೆ.

ಖಾಸಗಿ ಬಸ್ ವೊಂದು 40 ಮಂದಿ ಪ್ರಯಾಣಿಕರನ್ನು ಹೊತ್ತು ಚಿರ್ಗಾಂವ್ ನ ರೊಹ್ರೂ ಪ್ರದೇಶದಿಂದ ಶಿಮ್ಲಾದ ಮಂಡಿಗೆ ಪ್ರದೇಶಕ್ಕೆ ಹೋಗುತ್ತಿತ್ತು. ಈ ವೇಳೆ ಮಾರ್ಗದ ಮಧ್ಯೆ ಘಟನೆ ಸಂಭವಿಸಿದೆ ಎಂದು ಹೇಳಲಾಗುತ್ತಿದೆ.

ಇನ್ನು ಗಾಯಗೊಂಡಿರುವ 20 ಮಂದಿಯಲ್ಲಿ 5 ಮಂದಿಯ ಸ್ಥಿತಿ ಗಂಭೀರವಾಗಿದ್ದು, ಅವರನ್ನು ಹಿಮಾಚಲ ಪ್ರದೇಶದ ಐಜಿಎಂಸಿ ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ಕೊಡಿಸಲಾಗುತ್ತಿದೆ. ಅಪಘಾತಕ್ಕೆ ಪ್ರಮುಖ ಕಾರಣಗಳು ಈವರೆಗೂ ತಿಳಿದುಬಂದಿಲ್ಲ.

ಘಟನೆಗೆ ಹಿಮಾಚಲ ಪ್ರದೇಶದ ರಾಜ್ಯಪಾಲ ಆಚಾರ್ಯ ದೇವ್ರಾತ್, ಮುಖ್ಯಮಂತ್ರಿ ವೀರಭಧ್ರ ಸಿಂಗ್ ಮತ್ತು ಸಾರಿಗೆ ಸಚಿವ ಜಿ.ಎಸ್.ಬಲಿ ಅವರು ಆಘಾತ ವ್ಯಕ್ತಪಡಿಸಿದ್ದು, ಮೃತವರಿಗೆ ಸಂತಾಪ ಸೂಚಿಸಿದ್ದಾರೆ.