'ಪ್ರಮಾಣ ವಚನ ಸಮಾರಂಭಕ್ಕೆ ಸುಷ್ಮಾ ಗೈರು' ಅಂತ ಹೆಡ್​ಲೈನ್ ಬೇಡ!

ನವದೆಹಲಿ: ಉತ್ತಮ ಹಾಸ್ಯ ಸ್ವಭಾವವನ್ನು ಹೊಂದಿರುವ ವಿದೇಶಾಂಗ ಸಚಿವೆ ಸುಷ್ಮಾ ಸ್ವರಾಜ್ ಅವರು ಈ ಬಾರಿ ಮಾಧ್ಯಮಗಳ ಕಾಲೆಳೆದು ತಮಾಷೆ ನೋಡಿದ್ದಾರೆ. 

ಹೌದು. ಪ್ರಧಾನಿ ನರೇಂದ್ರ ಮೋದಿ ಅವರು ಮಂಗಳವಾರ ತಮ್ಮ ಸಚಿವ ಸಂಪುಟ ಪುನಾರಚನೆ ಮಾಡಿದ್ದು, 19 ಸಂಸದರು ಇಂದು ಸಚಿವರಾಗಿ ಪ್ರಮಾಣ ವಚನ ಸ್ವೀಕರಿಸಿದ್ದಾರೆ. ಆದರೆ ರಾಷ್ಟ್ರಪತಿ ಭವನದಲ್ಲಿ ನಡೆದ ಈ ಸಮಾರಂಭದಲ್ಲಿ ಸುಷ್ಮಾ ಸ್ವರಾಜ್ ಅವರು ಭಾಗವಹಿಸಿರಲಿಲ್ಲ. ಅದೇ ಸಮಯದಲ್ಲಿ ಹಂಗೇರಿ ವಿದೇಶಾಂಗ ಸಚಿವರ ಜತೆ ಮಾತುಕತೆ ಈ ಮೊದಲೇ ನಿಗಧಿಯಾಗಿದ್ದರಿಂದ ತಾವು ಪಾಲ್ಗೊಳ್ಳಲು ಸಾಧ್ಯವಾಗುತ್ತಿಲ್ಲ ಎಂದು ಬೆಳಗ್ಗೆ 8.52ರ ಹೊತ್ತಿನಲ್ಲಿ ಟ್ವೀಟ್ ಮಾಡಿದ್ದರು. ಜತೆಗೆ ಮಾಧ್ಯಮಗಳ ಗಮನಕ್ಕೆ ಎಂದು ಹಾಕಿ, ‘ಪ್ರಮಾಣ ವಚನ ಸ್ವೀಕಾರ ಸಮಾರಂಭಕ್ಕೆ ಸುಷ್ಮಾ ಗೈರು’ ಎನ್ನುವ ಶೀರ್ಷಿಕೆ ಕೊಡಬೇಡಿ ಎಂದು ಟ್ವೀಟ್ ಮಾಡಿದ್ದಾರೆ.

ಇದೇ ವೇಳೆ ಹೊಸದಾಗಿ ಸಂಪುಟ ಸೇರ್ಪಡೆಯಾಗುತ್ತಿರುವ ಎಲ್ಲಾ ಸಂಸದರಿಗೂ ಸುಷ್ಮಾ ಶುಭಾಶಯ ಹೇಳಿದ್ದಾರೆ.