ಫೇಸ್ ಬುಕ್ ನಲ್ಲಿ ವೈರಲ್ ಆದ ರಾಷ್ಟ್ರ ವಿರೋಧಿ ನಾಮ ನಿರ್ದೇಶನ

ನವದೆಹಲಿ: ಲೋಕಸಭೆ ಹಾಗೂ ರಾಜ್ಯಸಭೆಗಳಲ್ಲಿ ರಾಷ್ಟ್ರೀಯತೆ ಮತ್ತು ರಾಜದ್ರೋಹದ ಮೇಲೆ ಚರ್ಚೆ ನಡೆಯುತ್ತಿದ್ದರೆ ಇತ್ತ ಸಾಮಾಜಿಕ ಜಾಲತಾಣವಾದ ಫೇಸ್ ಬುಕ್ ನಲ್ಲಿ ಕೆಲವರು ರಾಷ್ಟ್ರ ವಿರೋಧಿ ನಾಮನಿರ್ದೇಶನ ಆಟವನ್ನು ಆರಂಭಿಸಿದ್ದು, ಅದು 2014ರ ಜುಲೈಯಲ್ಲಿ ಫೇಸ್ ಬುಕ್ ನಲ್ಲಿ ವೈರಲ್ ಆಗಿದ್ದ ಎಎಲ್ ಎಸ್ ಐಸ್ ಬಕೆಟ್ ಚಾಲೆಂಜ್ ರೀತಿಯದ್ದಾಗಿದೆ.

ಇದು ಯಾವ ರೀತಿಯೆಂದರೆ ನೀವು ದೇಶ ವಿರೋಧಿ ಎಂದು ಸ್ಟೇಟಸ್ ಹಾಕಿಕೊಂಡು ಉಳಿದ ಐವರು ಸ್ನೇಹಿತರನ್ನು ಸೇರಿಸಬೇಕು. ಈ ಐವರು ಒಂದು ದಿನದೊಳಗೆ ಸ್ಪಂದಿಸಿ ಮತ್ತೆ ಐವರನ್ನು ಸೇರಿಸುತ್ತಾ ಹೋಗಬೇಕು. ಆಟದ ನಿಯಮದಂತೆ ದೇಶ ವಿರೋಧಿ ನಾಮ ನಿರ್ದೇಶನಕ್ಕೆ ನಿಮ್ಮ ಸ್ನೇಹಿತರು ಪ್ರತಿಕ್ರಿಯೆ ನೀಡಲು ವಿಫಲರಾದರೆ ಶಿಕ್ಷೆಗೊಳಗಾಗುತ್ತಾರೆ. ರಾಷ್ಟ್ರ ವಿರೋಧಿ ಸ್ನೇಹಿತರು ನಿಮ್ಮ ಬಳಿ ಬಂದು ಸ್ವತಂತ್ರಕ್ಕೆ ಸಂಬಂಧಪಟ್ಟ ಕ್ರಾಂತಿಕಾರಿ ಗೀತೆಗಳನ್ನು ಹಾಡಿ ಗುಲಾಬಿಯನ್ನು ನಿಮ್ಮೆಡೆಗೆ ಎಸೆಯುತ್ತಾರೆ.
  
ಹೀಗೆ ದೇಶ ವಿರೋಧಿ ನಾಮ ನಿರ್ದೇಶನ ಆಟಕ್ಕೆ ಸೇರಿಸುವ ಪ್ರಕ್ರಿಯೆ ಫೇಸ್ ಬುಕ್ ನಲ್ಲಿ ವೈರಲ್ ಆಗಿದೆ.