ರೈಲಿನಲ್ಲಿ ಮಹಿಳೆ ಜತೆ ಟಿಸಿ ಅಸಭ್ಯ ವರ್ತನೆ: ವೈರಲ್ ಆದ ವಿಡಿಯೋ

ಹರ್ದಾ: ಜನರಲ್ ಟಿಕೆಟ್ ತೆಗೆದುಕೊಂಡು ರಿಸರ್ವೇಶನ್ ಬೋಗಿಯೊಳಗೆ ಪ್ರಯಾಣಿಸುತ್ತಿದ್ದ ಮಹಿಳೆಯೊಂದಿಗೆ ಟಿಸಿ ಅಸಭ್ಯವಾಗಿ ವರ್ತಿಸಿದ್ದಲ್ಲದೆ, ಅಶ್ಲೀಲ ಪದಗಳಿಂದ ನಿಂದಿಸಿರುವ ಘಟನೆ ಮಧ್ಯಪ್ರದೇಶದ ಹರ್ದಾದಲ್ಲಿ ನಡೆದಿದೆ.

ಹೋಶಿಯಾರ್‌‌ಪುರ್‌ದಿಂದ ಬಹರನ್‌‌ಪುರ್‌ಗೆ ಹೊರಟಿದ್ದ ರೈಲಿನಲ್ಲಿ ಜನರಲ್ ಬೋಗಿಯೊಳಗೆ ಸ್ಥಳವಿಲ್ಲದ ಕಾರಣ ರಿಸರ್ವೇಶನ್ ಬೋಗಿಯೊಳಗೆ ಮಹಿಳೆ ತನ್ನ ಮಗ ಹಾಗೂ ಮಗಳ ಜತೆ ರೈಲು ಹತ್ತಿದ್ದರು. ಈ ವೇಳೆ ಟಿಕೆಟ್ ತಪಾಸಣೆ ನಡೆಸಲು ಬಂದ ಟಿಸಿ ಅಕ್ರಮವಾಗಿ ರಿಸರ್ವೇಶನ್ ಬೋಗಿಯೊಳಗೆ ಬಂದಿದ್ದ ಮಹಿಳೆಯನ್ನು ಅಶ್ಲೀಲವಾಗಿ ನಿಂದಿಸಿದ್ದಾನೆ. ಈ ವೇಳೆ ಮಹಿಳೆಯ ಮಗ ಮತ್ತು ಟಿಸಿ ನಡುವೆ ಮಾತಿನ ಚಕಮಕಿ ನಡೆದಿದ್ದು, ಯುವಕನಿಗೆ ಥಳಿಸಲು ಟಿಸಿ ಕೈಎತ್ತಿರುವ ದೃಶ್ಯಗಳನ್ನು ಸಹ ಪ್ರಯಾಣಿಕರೊಬ್ಬರು ತಮ್ಮ ಮೊಬೈಲ್ ನಲ್ಲಿ ಚಿತ್ರಿಸಿ ಸಾಮಾಜಿಕ ಜಾಲತಾಣಕ್ಕೆ ಅಪ್ ಲೋಡ್ ಮಾಡಿದ್ದು, ಈ ವಿಡಿಯೋ ಇದೀಗ ವೈರಲ್ ಆಗಿದೆ.

ಕೊನೆಗೆ ಮಹಿಳೆ ದಂಡ ತೆರಲು ಸಿದ್ಧಳಾಗಿ ವಿನಂತಿ ಮಾಡಿಕೊಂಡರೂ ಕೇಳದ ಟಿಸಿ ಆಕೆ ಮೇಲೆ ಹಲ್ಲೆಗೆ ಮುಂದಾಗಿದ್ದ ಎಂದು ಸಹ ಪ್ರಯಾಣಿಕರು ತಿಳಿಸಿದ್ದಾರೆ.