ತೆರಿಗೆಯಿಂದಾಗಿ ಸರ್ಕಾರ 2-3 ಲಕ್ಷ ಕೋಟಿ ರು. ಹಣ ಸಂಗ್ರಹಿಸಲಿದೆ: ಮನೋಹರ್ ಪರಿಕ್ಕರ್

ಪಣಜಿ: ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಅವರ ಅನಾಣ್ಯೀಕರಣ ನೀತಿಯಿಂದಾಗಿ ಸರ್ಕಾರ ತೆರಿಗೆಯಿಂದ ಸುಮಾರು 2-3 ಲಕ್ಷ ಕೋಟಿ ರು ಹಣ ಸಂಗ್ರಹಿಸಲಿದೆ ಎಂದು ಕೇಂದ್ರ ರಕ್ಷಣಾ ಸಚಿವ ಮನೋಹರ್ ಪರಿಕ್ಕರ್ ತಿಳಿಸಿದ್ದಾರೆ.

ದಕ್ಷಿಣ ಗೋವಾದಲ್ಲಿ ಆಯೋಜಿಸಿದ್ದ ಪಕ್ಷದ ಸಭೆಯಲ್ಲಿ ಮಾತನಾಡಿದ ಪರಿಕ್ಕರ್, ಕನಿಷ್ಠ ಪಕ್ಷ 2-3 ಲಕ್ಷ ಕೋಟಿ ರು ಹಣ ತೆರಿಗೆಯಿಂದ ಬರುತ್ತದೆ. ಈ ಹಣವನ್ನು ಬಡ ಹಾಗೂ ಸಾಮಾನ್ಯ ಜನರ ಅವಶ್ಯಕತೆಗಳನ್ನು ಪೂರೈಸಿ, ಅವರನ್ನು ಆರ್ಥಿಕವಾಗಿ ಸಬಲಗೊಳಿಸಲು ಕೇಂದ್ರ ಸರ್ಕಾರ ಚಿಂತಿಸಿದೆ ಎಂದು ಹೇಳಲಾಗಿದೆ.

ಅನಾಣ್ಯೀಕರಣದ ಪ್ರಮುಖ ಉದ್ದೇಶ, ಭಾರತೀಯ ಆರ್ಥಿಕತೆಯನ್ನು ಸದೃಢಗೊಳಿಸುವುದಾಗಿತ್ತು, ಸರ್ಕಾರದ ಈ ನಡೆಯಿಂದ ಈಗಾಗಲೇ ಕಪ್ಪುಹಣ ಕೂಡಿಟ್ಟಿರುವವರಿಂದ ಅಪಾರ ಪ್ರಮಾಣದ ಹಣ ಸರ್ಕಾರಕ್ಕೆ ಬಂದಿದೆ.

ಕೂಡಿಟ್ಟಿರುವ ಎಲ್ಲಾ ಕಪ್ಪು ಹಣ ವಾಪಸ್ ಬರಬೇಕು ಎಂದ ಅವರು, ಇದುವರೆಗೂ ಸುಮಾರು 800 ಕೋಟಿ ರು. ಕಪ್ಪು  ಹಣ ಸಿಕ್ಕಿದೆ ಎಂದು ಹೇಳಿದ್ದಾರೆ.