ಗ್ರಾಮಗಳನ್ನು ದತ್ತು ಪಡೆಯದ ಸಂಸದರಿಗೆ ಕೇಂದ್ರ ಸರ್ಕಾರದಿಂದಲೇ ತಕ್ಕ ಪಾಠ

ನವದೆಹಲಿ: ಸಂಸದರ ಆದರ್ಶ ಗ್ರಾಮ ಯೋಜನೆ(ಎಸ್ಎಜಿವೈ) ಉತ್ತಮ ಫಲಿತಾಂಶ ನೀಡುವಲ್ಲಿ ವಿಫಲವಾಗಿರುವುದರಿಂದ ಪ್ರಧಾನ ಮಂತ್ರಿಯವರ ಅತ್ಯಂತ ಪ್ರೀತಿಯ ಸಂಸದರ ಗ್ರಾಮ ದತ್ತು ಯೋಜನೆಯನ್ನು ನಿಯಂತ್ರಣಕ್ಕೆ ತೆಗೆದುಕೊಳ್ಳಲು ಗ್ರಾಮೀಣಾಭಿವೃದ್ಧಿ ಸಚಿವಾಲಯ ನಿರ್ಧರಿಸಿದೆ.

ಭಾರತದ ಪ್ರತಿಯೊಬ್ಬ ಸಂಸದರು ಒಂದೊಂದು ಗ್ರಾಮವನ್ನು ದತ್ತು ತೆಗೆದುಕೊಂಡು ಅಲ್ಲಿನ ಮೂಲಭೂತ ಸೌಕರ್ಯವನ್ನು ಅಭಿವೃದ್ಧಿಪಡಿಸಬೇಕೆಂಬುದು ಪ್ರಧಾನಿಯವರ ಕನಸಾಗಿತ್ತು. ಆದರೆ ಇದಕ್ಕೆ ಸಂಸದರಿಂದ ಸಿಗುತ್ತಿರುವ ನೀರಸ ಪ್ರತಿಕ್ರಿಯೆ ಅಸಮಾಧಾನವನ್ನುಂಟು ಮಾಡಿದ್ದು, ಇದಕ್ಕೆ ಸಚಿವಾಲಯ ಸಂಸದ್ ಆದರ್ಶ ಗ್ರಾಮ ಯೋಜನೆ ಪ್ರಗತಿ ವರದಿ ನೀಡಿ ಅದನ್ನು ಜಾಹೀರುಪಡಿಸಬೇಕೆಂದು ಸೂಚಿಸಿದೆ. ಈ ವರದಿಯನ್ನು ಗ್ರಾಮೀಣಾಭಿವೃದ್ಧಿ ಸಚಿವಾಲಯ ಪ್ರತಿ ಕ್ಷೇತ್ರದಲ್ಲಿ ಸಾರ್ವಜನಿಕ ಸ್ಥಳಗಳಲ್ಲಿ ಪ್ರದರ್ಶಿಸಲಿದೆ.

ಗ್ರಾಮಗಳಲ್ಲಿ ಕೈಗೊಂಡಿರುವ ಪ್ರಗತಿ ಕೆಲಸಗಳನ್ನು ಬಹಿರಂಗಪಡಿಸಬೇಕಾಗಿರುವುದರಿಂದ ಸಂಸದರು ಹೆಚ್ಚು ಕೆಲಸ ಮಾಡಬಹುದು ಎಂದು ಮೂಲವೊಂದು ತಿಳಿಸಿದೆ.ವರದಿಯಲ್ಲಿ ಸಂಸದರ ಭಾವಚಿತ್ರ, ದತ್ತು ಪಡೆದುಕೊಂಡ ಗ್ರಾಮಗಳ ವಿವರಣೆಯಿರುತ್ತದೆ. ಹಾಗೆಯೇ ದತ್ತು ಸ್ವೀಕರಿಸದ ಸಂಸದರ ಚಿತ್ರದ ಎದುರು ಖಾಲಿ ಸ್ಥಳ ಬಿಡಲಾಗುತ್ತದೆ. ಹೀಗೆ ಖಾಲಿ ಇದ್ದರೆ ಸಂಸದರಿಗೆ ತೊಂದರೆಯಾಗುತ್ತದೆ. ಏಕೆಂದರೆ ಆ ಕ್ಷೇತ್ರದ ಜನರು ತಮ್ಮ ಕ್ಷೇತ್ರದ ಸಂಸದ ಏನೂ ಕೆಲಸ ಮಾಡಿಲ್ಲ ಎಂದು ಭಾವಿಸುತ್ತಾರೆ. ಇದು ಸಂಸದರು ಕೆಲಸ ಮಾಡಲು ಪ್ರೇರೇಪಿಸಬಹುದು ಎಂದು ಗ್ರಾಮೀಣ ಸಚಿವಾಲಯದ ಅಧಿಕಾರಿಯೊಬ್ಬರು ಹೇಳುತ್ತಾರೆ.