ನೀಟ್ ಗೊಂದಲ; ತೀರ್ಪು ಮರು ಪರಿಶೀಲಿಸುವಂತೆ ಸುಪ್ರೀಂ ಕೋರ್ಟ್ ಗೆ ಕೇಂದ್ರ ಮನವಿ

ನವದೆಹಲಿ: ಎರಡು ಹಂತಗಳಲ್ಲಿ ರಾಷ್ಟ್ರೀಯ ವೈದ್ಯಕೀಯ ಅರ್ಹತಾ ಪ್ರವೇಶ ಪರೀಕ್ಷೆ (ನೀಟ್) ನಡೆಸುವ ಬಗ್ಗೆ ಸುಪ್ರೀಂಕೋರ್ಟ್ ನೀಡಿದ್ದ ಆದೇಶವನ್ನು ಮರುಪರಿಶೀಲಿಸುವಂತೆ ಕೇಂದ್ರ  ಸರ್ಕಾರ ಶುಕ್ರವಾರ ಸುಪ್ರೀಂಕೋರ್ಟಿಗೆ ಮನವಿ ಮಾಡಿದೆ.

ವೈದ್ಯಕೀಯ ಕೋರ್ಸ್​ಗಳು ಪ್ರವೇಶ ಸಂಬಂಧಿತ ಏಕರೂಪ ಪ್ರವೇಶ ಪರೀಕ್ಷೆ ಕುರಿತ ಗೊಂದಲ ಶುಕ್ರವಾರವೂ ಮುಂದುವರೆದಿದ್ದು, ವಿಷಯಕ್ಕೆ ಸಂಬಂಧಿಸಿದಂತೆ ರಾಜ್ಯಗಳ ಅಹವಾಲುಗಳನ್ನೂ  ಆಲಿಸಬೇಕು ಮತ್ತು ಆಯಾ ರಾಜ್ಯಗಳಿಗೇ ವೈದ್ಯಕೀಯ ಅರ್ಹತಾ ಪ್ರವೇಶ ಪರೀಕ್ಷೆ ನಡೆಸುವ ಅವಕಾಶ ನೀಡಬೇಕು ಎಂದು ಕೇಂದ್ರ ಸರ್ಕಾರ ಸುಪ್ರೀಂಕೋರ್ಟಗೆ ಮನವಿ ಸಲ್ಲಿಸಿದೆ. ಅಟಾರ್ನಿ  ಜನರಲ್ ಮುಕುಲ್ ರೋಹ್ಟಗಿ ಅವರು ಶುಕ್ರವಾರ ಎರಡು ಹಂತಗಳ ’ನೀಟ್’ ಬದಲಿಗೆ ಜುಲೈ 24ರಂದು ಒಂದೇ ದಿನ ‘ನೀಟ್’ ನಡೆಸುವಂತೆ ಸಲಹೆ ಮಾಡಿದರು.

"ನ್ಯಾಯಾಯಲ ಈ ಹಿಂದೆ ನೀಡಿರುವ ಆದೇಶದಂತೆ ಎರಡು ಹಂತದ ಏಕಮುಖ ಅರ್ಹತಾ ಪ್ರವೇಶ ಪರೀಕ್ಷೆ ಏರ್ಪಡಿಸಿದರೆ, ಹಲವು ಸಮಸ್ಯೆಗಳು ಎದುರಾಗುತ್ತವೆ. ಹೀಗಾಗಿ ತೀರ್ಪಿನಲ್ಲಿ  ಒಂದಷ್ಚು ಬದಲಾವಣೆ ಮಾಡಲೇಬೇಕಿದೆ" ಎಂದು ನ್ಯಾಯಾಲಯಕ್ಕೆ ಅರ್ಜಿ ಸಲ್ಲಿಸಿದರು.

ಸಿಬಿಎಸ್​ಇ ಮತ್ತು ಮೆಡಿಕಲ್ ಕೌನ್ಸಿಲ್ ಆಫ್ ಇಂಡಿಯಾ (ಎಂಸಿಐ) ಎರಡು ಹಂತಗಳಲ್ಲಿ ಪರೀಕ್ಷೆ ನಡೆಸುವುದಾಗಿ ಜಂಟಿ ಪ್ರಮಾಣಪತ್ರ ಸಲ್ಲಿಸಿದ ಬಳಿಕ ಸುಪ್ರೀಂಕೋರ್ಟ್ ಗುರುವಾರ ಏಕರೂಪ  ಪ್ರವೇಶ ಪರೀಕ್ಷೆಗೆ ತನ್ನ ಅನುಮೋದನೆ ನೀಡಿತ್ತು. ಮೇ 1ರಂದು ಅಖಿಲ ಭಾರತ ವೈದ್ಯಕೀಯ ಪೂರ್ವ ಪರೀಕ್ಷೆ (ಏಐಪಿಎಂಟಿ) ನಡೆಸಲು ಸಿಬಿಎಸ್​ಇ ನಿರ್ಧರಿಸಿದ್ದು, ಅದನ್ನು ಮೊದಲ ಹಂತದ  ನೀಟ್ ಆಗಿ ಮರುನಿಗದಿ ಮಾಡಲಾಗುವುದು ಎಂದು ಸಿಬಿಎಸ್​ಇ ವಕೀಲ, ಅಡಿಷನಲ್ ಸಾಲಿಸಿಟರ್ ಜನರಲ್ ಪಿಂಕಿ ಆನಂದ್ ಹೇಳಿದ್ದರು. ಈಗಾಗಲೇ ಪರೀಕ್ಷೆಗಾಗಿ 6,70,000 ವಿದ್ಯಾರ್ಥಿಗಳು  ಹೆಸರು ನೋಂದಾಯಿಸಿದ್ದಾರೆ. ಬಾಕಿ ಉಳಿದಿರುವ 2,50,000 ವಿದ್ಯಾರ್ಥಿಗಳಿಗೆ ಅಗತ್ಯ ಶುಲ್ಕ ಪಾವತಿಸಿದ ಬಳಿಕ ಎರಡನೇ ಹಂತದ ನೀಟ್​ಗೆ ಹಾಜರಾಗಲು ಅವಕಾಶ  ಒದಗಿಸಿಕೊಡಲಾಗುವುದು ಎಂದು ಆನಂದ್ ಹೇಳಿದ್ದರು.

ಎರಡು ಹಂತಗಳಲ್ಲಿ ‘ನೀಟ್’ನಡೆಸುವ ಸಂಬಂಧ ರಾಜ್ಯಗಳು ಮತ್ತು ಖಾಸಗಿ ಕಾಲೇಜುಗಳ ವಿರೋಧವನ್ನು ಗುರುವಾರ ತಳ್ಳಿ ಹಾಕಿದ ಸುಪ್ರೀಂಕೋರ್ಟ್ ಮೇ 1 ರಂದು ಮೊದಲ ಹಂತ ಮತ್ತು  ಜುಲೈ 24ರಂದು ಎರಡನೇ ಹಂತದ ಪ್ರವೇಶ ಪರೀಕ್ಷೆ ನಡೆಸಲು ಅನುಮತಿ ನೀಡಿತ್ತು.