ಕೇಂದ್ರ ಸರ್ಕಾರದ ಕೆಲವು ಯೋಜನೆಗಳು ವಿಶಿಷ್ಟ ಹಾಗೂ ವಿಭಿನ್ನ: ರಾಜ್ಯವರ್ಧನ್ ಸಿಂಗ್ ರಾಥೋಡ್

ನವದೆಹಲಿ: ಹೊಸ ಕಲ್ಪನೆಯ ಪ್ರಾಮುಖ್ಯತೆ ಬಗ್ಗೆ ಮಾತನಾಡಿದ ಕೇಂದ್ರ ಮಾಹಿತಿ ಮತ್ತು ಪ್ರಸಾರ ಖಾತೆ ಸಚಿವ ರಾಜ್ಯವರ್ಧನ್ ಸಿಂಗ್ ರಾಥೋಡ್, ನರೇಂದ್ರ ಮೋದಿ ಸರ್ಕಾರದ ಯೋಜನೆಗಳಾದ ಜನಧನ ಯೋಜನೆ, ಬೇವು ಲೇಪಿತ ಯೂರಿಯಾ, ಶ್ರೀಮಂತರು ಎಲ್ ಪಿಜಿ ಸಬ್ಸಿಡಿ ಸಿಲಿಂಡರ್ ನ್ನು ಬಿಟ್ಟುಬಿಡುವುದು  ಮೊದಲಾದವು ಹೊಸ ದೃಷ್ಟಿಕೋನದ, ವಿಭಿನ್ನ ಆಲೋಚನೆಯಿಂದ ಬಂದ ಯೋಜನೆಗಳು ಎಂದು ಹೇಳಿದ್ದಾರೆ.

ಜನಧನ ಯೋಜನೆ  ಬಗ್ಗೆ ಹೇಳಿದ ಅವರು, ದೇಶದ ಸಂಪನ್ಮೂಲ ಮಾತ್ರವಲ್ಲದೆ, ಜನರು ಸ್ವಪ್ರೇರಣೆಯಿಂದ ಬ್ಯಾಂಕುಗಳಲ್ಲಿ ಖಾತೆಗಳನ್ನು ತೆರೆಯಲು ಸಹಾಯ ಮಾಡಿದೆ. ಇನ್ನು ರಾಸಾಯನಿಕ ಗೊಬ್ಬರವಾದ ಯೂರಿಯಾವನ್ನು ಬೆಳೆಗಳಿಗೆ ಹಾಕುವುದನ್ನು ತಪ್ಪಿಸಲು ಬೇವಿನ ಲೇಪಿತ ಯೂರಿಯಾವನ್ನು ಹಾಕಿ ನಿಧಾನವಾಗಿ ಸಾವಯವ ಕೃಷಿಯತ್ತ ಜನರನ್ನು ಆಕರ್ಷಿಸುವುದಾಗಿದೆ ಎಂದರು.

ಶ್ರೀಮಂತರು ತಮಗೆ ಸಿಗುತ್ತಿರುವ ಸಬ್ಸಿಡಿ ಸಿಲಿಂಡರನ್ನು ಬಿಟ್ಟುಬಿಟ್ಟರೆ ದೇಶದ ಬಡ ಮತ್ತು ಮಧ್ಯಮ ವರ್ಗದವರಿಗೆ ಸಬ್ಸಿಡಿಯಲ್ಲಿ ಸಿಲಿಂಡರ್ ದೊರೆಯುತ್ತದೆ. ಆರಂಭದಲ್ಲಿ ಸಬ್ಸಿಡಿ ಸಿಲಿಂಡರನ್ನು ಯಾರೂ ಕೂಡ ಬಿಟ್ಟುಬಿಡಲಿಕ್ಕಿಲ್ಲ ಎಂದೇ ಎಲ್ಲರೂ ಅಂದುಕೊಂಡಿದ್ದರು. ಆದರೆ ಇಂದು ಕೋಟಿಗೆ ಹತ್ತಿರ ಜನರು ಸಬ್ಸಿಡಿ ಸಿಲಿಂಡರನ್ನು ಬಿಟ್ಟುಬಿಟ್ಟಿದ್ದಾರೆ ಎಂದು ಸಚಿವ ರಾಥೋರ್ ಬಿಎಂಎಲ್ ಮುಂಜಲ್ ಪ್ರಶಸ್ತಿ ವಿತರಣೆ ಸಮಾರಂಭದಲ್ಲಿ ಹೇಳಿದರು.