'ಝಿಕಾ' ವೈರಸ್ ರಚನೆ ಪತ್ತೆ ತಂಡದಲ್ಲಿ ಭಾರತದ ಮಹಿಳೆ: ಅಭಿನಂದಿಸಿದ ರಾಜನಾಥ ಸಿಂಗ್

ನವದೆಹಲಿ: ಇಡೀ ವಿಶ್ವವನ್ನೇ ನಡುಗಿಸುತ್ತಿರುವ ಭಯಾನಕ 'ಝಿಕಾ' ವೈರಸ್ ರಚನೆ ಪತ್ತೆ ತಂಡದಲ್ಲಿ ಸದಸ್ಯರಾಗಿ ಕಾರ್ಯನಿರ್ವಹಿಸುತ್ತಿರುವ ಉತ್ತರ ಪ್ರದೇಶದ ದೇವಿಕಾ ಸಿರೋಹಿ ಅವರಿಗೆ ಕೇಂದ್ರ ಗೃಹ ಸಚಿವ ರಾಜನಾಥ್ ಸಿಂಗ್ ಅವರು ಅಭಿನಂದನೆ ಸಲ್ಲಿಸಿದ್ದಾರೆ.

ವಿಶ್ವಕ್ಕೆ ತಲೆನೋವಾಗಿ ಪರಿಣಮಿಸಿದ್ದ ಝಿಕಾ ವೈರಸ್ ರಚನೆಯನ್ನು ಇದೇ ಮೊಟ್ಟ ಮೊದಲ ಬಾರಿಗೆ ಸಪ್ತ ಸದಸ್ಯ ಸಂಶೋಧಕರ ತಂಡವೊಂದು ಭೇದಿಸಿದ್ದು. ಈ ತಂಡದ ಸದಸ್ಯರಲ್ಲಿ ಭಾರತದ ವೈದ್ಯಕೀಯ ಸಂಶೋಧನಾ ವಿದ್ಯಾರ್ಥಿನಿಯಾಗಿರುವ ಉತ್ತರ ಪ್ರದೇಶದ ಮೀರತ್ ನಗರದ ದೇವಿಕಾ ಸಿರೋಹಿ ಕೂಡ ಒಬ್ಬರಾಗಿ ಕಾರ್ಯನಿರ್ವಹಿಸಿ, ಮಹತ್ವದ ಕೊಡುಗೆಯನ್ನು ನೀಡಿದ್ದಾರೆ.

ದೇವಿಕಾ ಸಿರೋಹಿ ಅವರಿಗೆ ಟ್ವಿಟರ್ ನಲ್ಲಿ ಅಭಿನಂದನೆ ಸಲ್ಲಿಸಿರುವ ಗೃಹ ಸಚಿವರು, ಝಿಕಾ ವೈರಸ್ ರಚನೆಯನ್ನು ಭೇದಿಸಿದ ಅಮೆರಿದ ತಂಡದ ಸದಸ್ಯರಲ್ಲಿ ಕಾರ್ಯನಿರ್ವಹಿಸಿದ ಮೀರತ್ ನ ದೇವಿಕಾ ಸಿರೋಹಿಗೆ ಅಭಿನಂದನೆಗಳು. ದೇವಿಕಾ ಅವರು ಕೇವಲ ಅವರ ಕುಟುಂಬಕ್ಕಷ್ಟೇ ಅಲ್ಲದೆ, ಇಡೀ ದೇಶ ಹೆಮ್ಮೆ ಪಡುವಂತಹ ಕೆಲಸವನ್ನು ಮಾಡಿದ್ದಾರೆ. ದೇವಿಕಾ ಅವರ ಈ ಸಾಧನೆ ಹೆಣ್ಣು ಮಕ್ಕಳಿಗಿರುವ ಶಿಕ್ಷಣ ಪ್ರಾಮುಖ್ಯತೆಯನ್ನು ತೋರಿಸುತ್ತದೆ. ನಮ್ಮ ಗಮನ 'ಬೇಟಿ ಬಚಾವೋ' 'ಬೇಟಿ ಪಡಾವೋ' ಕಡೆಯಿರಬೇಕೆಂದು ಹೇಳಿದ್ದಾರೆ.