ಇಸಿಸ್ ಪರ ಫೇಸ್‌ಬುಕ್‌ನಲ್ಲಿ ಕಮೆಂಟ್: 2 ಭಾರತೀಯರು ಗಡಿಪಾರು

ತಿರುವನಂತಪುರ: ಇಸ್ಲಾಮಿಕ್ ಸ್ಟೇಟ್ ಪರವಾಗಿ ಫೇಸ್‌ಬುಕ್‌ನಲ್ಲಿ ಕಮೆಂಟ್ ಗಳನ್ನು ಪೋಸ್ಟ್ ಮಾಡಿದ ಕಾರಣಕ್ಕಾಗಿ ಇಬ್ಬರು ಭಾರತೀಯರನ್ನು ಯುನೈಟೆಡ್ ಅರಬ್ ಎಮಿರೇಟ್ಸ್ ಗುರುವಾರ ಗಡಿಪಾರು ಮಾಡಿರುವುದಾಗಿ ತಿಳಿದುಬಂದಿದೆ.

ಗಡಿಪಾರಿಗೊಳಗಾದ ಇಬ್ಬರು ಭಾರತಯರನ್ನು ಕೇರಳ ಮೂಲದವರು ಎಂದು ಹೇಳಲಾಗುತ್ತಿದ್ದು, ಕೇರಳ ಮೂಲದ ಈ ಇಬ್ಬರು ವ್ಯಕ್ತಿಗಳು ಫೇಸ್‌ಬುಕ್‌ನ 10 ಭಾರತೀಯರನ್ನೊಳಗೊಂಡ ಗುಂಪೊಂದರಲ್ಲಿ ಭಯೋತ್ಪಾದನೆಗೆ ಪ್ರಚೋದನೆ ನೀಡುವ ಹಾಗೂ ಇಸ್ಲಾಮಿಕ್ ಸ್ಟೇಟ್ ನ ಪರವಾಗಿ ಕಮೆಂಟ್ ಗಳನ್ನು ಹಾಕುತ್ತಿದ್ದರು ಎಂದು ಹೇಳಲಾಗುತ್ತಿದೆ. ಹೀಗಾಗಿ ಈ ಬಗ್ಗೆ ಮಾಹಿತಿ ತಿಳಿಯುತ್ತಿದ್ದಂತೆ ಅಲ್ಲಿನ ಭದ್ರತಾ ಅಧಿಕಾರಿಗಳು ಇಬ್ಬರು ಭಾರತೀಯರನ್ನು ಮರಳಿ ಭಾರತಕ್ಕೆ ಗಡಿಪಾರು ಮಾಡಿರುವುದಾಗಿ ತಿಳಿದುಬಂದಿದೆ.

ಇಬ್ಬರು ಭಾರತೀಯ ವ್ಯಕ್ತಿಗಳ ವಿರುದ್ಧ ಯಾವುದೇ ಪ್ರಕರಣ ದಾಖಲಿಸಿಕೊಳ್ಳದ ಯುಎಇ ಅಧಿಕಾರಿಗಳು ಭದ್ರತೆಯ ಕಾರಣಕ್ಕಾಗಿ ಭಾರತೀಯರ ಹೆಸರನ್ನು ಪ್ರಕಟಿಸದೆ ಗಡಿಪಾರು ಮಾಡಿದೆ ಎಂದು ಅಲ್ಲಿನ ಸುದ್ದಿವಾಹಿನಿಗಳು ವರದಿ ಮಾಡಿದೆ ಎಂದು ತಿಳಿದುಬಂದಿದೆ.

ಪ್ರತೀವರ್ಷವೂ ಯುಎಇಗೆ ಹಲವು ಭಾರತೀಯರು ಭೇಟಿ ನೀಡುತ್ತಿದ್ದು, ಇದರಲ್ಲಿ ಶೇ.40 ರಷ್ಟು ಭಾರತೀಯರು ಕೇರಳದದಿಂದಲೇ ಹೋಗುತ್ತಿರುತ್ತಾರೆ. ಕಳೆದ ತಿಂಗಳು ಯುಎಇಗೆ ಭಾರತದ ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರು ಭೇಟಿ ನೀಡಿದ್ದ ಸಂದರ್ಭದಲ್ಲಿ, ಭಯೋತ್ಪಾದನೆ ನಿರ್ಮೂಲನದ ಕುರಿತಂತೆ ಕಾರ್ಯನಿರ್ವಹಿಸಲು ಬದ್ಧವಾಗಿರುವುದಾಗಿ ಎರಡೂ ರಾಷ್ಟ್ರಗಳು ಪರಸ್ಪರ ಭರವಸೆಗಳನ್ನು ನೀಡಿದ್ದವು.