ಸಮುದಾಯಗಳ ನಡುವೆ ಅಸಹಿಷ್ಣುತೆ ಉದ್ಭವಿಸಲು ಬಿಡಬೇಡಿ: ದೇಶದ ಜನರಿಗೆ ರಾಜನಾಥ್ ಸಿಂಗ್ ಕರೆ

ನವದೆಹಲಿ: ಅಸಹಿಷ್ಣುತೆ ವಿರುದ್ಧ ಅಸಮಾಧಾನ ಹೊರಹಾಕಿರುವ ಕೇಂದ್ರ ಗೃಹ ಸಚಿವ ರಾಜನಾಥ್ ಸಿಂಗ್, ಧರ್ಮದ ಹೆಸರಲಿನಲ್ಲಿ ರಾಜಕೀಯ ನಡೆಯುತ್ತಿರುವ ಆರೋಪವನ್ನು ತಳ್ಳಿಹಾಕಿದ್ದಾರೆ.
ಧರ್ಮ, ಜಾತಿಯ ಆಧಾರದಲ್ಲಿ ಯಾರನ್ನೂ ತಾರತಮ್ಯ ದೃಷ್ಟಿಯಿಂದ ನೋಡಬಾರದು, ಅಸಹಿಷ್ಣುತೆ ಬಗ್ಗೆ ಪತ್ರಿಕಾ ವಿದ್ಯುನ್ಮಾನ ಮಾಧ್ಯಮಗಳಲ್ಲಿ ಪ್ರಕಟವಾಗುತ್ತಿರುವ ವರದಿಗಳು ಆತಂಕ ಮೂಡಿಸುತ್ತಿವೆ. ವಸುಧೈವ ಕುಟುಂಬಕಂ ಎಂಬುದನ್ನು ಸಾರಿದ ಏಕೈಕ ದೇಶ ಭಾರತ ಎಂಬುದನ್ನು ದೇಶದ ಜನರು ನೆನಪಿನಲ್ಲಿಡಬೇಕು, ಯಾರನ್ನೂ ತಾರತಮ್ಯ ದೃಷ್ಟಿಯಿಂದ ನೋಡಬಾರದು ಎಂದು ದಸರಾ ಹಿನ್ನೆಲೆಯಲ್ಲಿ ಕರೆ ನೀಡುತ್ತಿರುವೆ ಎಂದಿದ್ದಾರೆ ರಾಜನಾಥ್ ಸಿಂಗ್. ಮುಂದಿನ ದಿನಗಳಲ್ಲಿ ಅಸಹಿಷ್ಣುತೆ ಬಗ್ಗೆ ನಮಗೆ ಯಾವುದೇ ದೂರುಗಳು ಬರಬಾರದು, ಧರ್ಮದ ಆಧಾರದಲ್ಲಿ ರಾಜಕೀಯ ನಡೆಯಬಾರದು. ಫರೀದಾಬಾದ್ ನಲ್ಲಿ ದಲಿತ ಕುಟುಂಬದ ಮೇಲೆ ನಡೆದ ಅಮಾನುಷ ಘಟನೆ ದುರದೃಷ್ಟಕರ ಹಾಗೂ ಖಂಡನೀಯ, ಘಟನೆಗಳು ನಡೆದಿರುವ ರಾಜ್ಯದ ಮುಖ್ಯಮಂತ್ರಿಗಳೊಂದಿಗೆ ಕಾನೂನು ಸುವ್ಯವಸ್ಥೆ ಬಗ್ಗೆ ಮಾತನಾಡಿರುವುದಾಗಿ ಎಂದು ರಾಜನಾಥ್ ಸಿಂಗ್ ಹೇಳಿದ್ದಾರೆ.