ಸದಾನಂದಗೌಡ ವಿರುದ್ಧ ಹೈಕೋರ್ಟ್ ಆದೇಶ ರದ್ದುಗೊಳಿಸಿದ ಸುಪ್ರೀಂ

ನವದೆಹಲಿ: ಕೇಂದ್ರ ಕಾನೂನು ಸಚಿವ ಡಿವಿ ಸದಾನಂದ ಗೌಡ ಅವರಿಗೆ ಬೆಂಗಳೂರಿನಲ್ಲಿ ಮನೆ ನಿರ್ಮಿಸಲು ನೀಡಲಾಗಿದ್ದ ಅನುಮತಿಯನ್ನು ರದ್ದು ಪಡಿಸಿ 2012ರಲ್ಲಿ ಕರ್ನಾಟಕ ಹೈಕೊರ್ಟ್ ನೀಡಿದ್ದ ಆದೇಶವನ್ನು ಸುಪ್ರೀಂಕೊರ್ಟ್ ತಳ್ಳಿಹಾಕಿದೆ.

ಹೈಕೊರ್ಟ್ ತೀರ್ಪನ್ನು ಪ್ರಶ್ನಿಸಿ ಸದಾನಂದ ಗೌಡ ಅವರು ಸಲ್ಲಿಸಿದ್ದ ಮೇಲ್ಮನವಿ ಮೇಲಿನ ತೀರ್ಪನ್ನು ವಿಚಾರಣೆಯ ಬಳಿಕ ಸುಪ್ರೀಂಕೊರ್ಟ್​ನ ನ್ಯಾಯಮೂರ್ತಿ ಮದನ್ ಬಿ. ಲೊಕೂರ್ ಮತ್ತು ನ್ಯಾಯಮೂರ್ತಿ ಎಸ್​ಎ ಬೊಬ್ಡೆ ಅವರನ್ನು ಒಳಗೊಂಡ ಪೀಠವು ಅಕ್ಟೊಬರ್ 29ರಂದು ಕಾಯ್ದಿರಿಸಿತ್ತು. ಅರ್ಜಿ ವಿಚಾರಣೆ ನಡೆಸಿದ ಪೀಠ ಸದಾನಂದಗೌಡ ಅವರು ಮನೆ ನಿರ್ಮಿಸಿರುವುದು ಸರಿ ಇದೆ ಎಂದು ಹೇಳಿದೆ.

ಬೆಂಗಳೂರಿನಲ್ಲಿ ಸದಾನಂದಗೌಡ ಅವರು ಐದು ಅಂತಸ್ತಿನ ಕಟ್ಟಡವನ್ನು ನಿಯಮಾವಳಿಗಳನ್ನು ಉಲ್ಲಂಘಿಸಿ ನಿರ್ಮಿಸಿದ್ದಾರೆ ಎಂದು ಹೇಳಿ ಕರ್ನಾಟಕ ಹೈಕೊರ್ಟ್ ಕಟ್ಟಡ ನಿರ್ಮಾಣಕ್ಕೆ ನೀಡಲಾಗಿದ್ದ ಅನುಮತಿಯನ್ನು ರದ್ದು ಪಡಿಸಿ 2012ರಲ್ಲಿ ತೀರ್ಪು ನೀಡಿತ್ತು. ಹೈಕೊರ್ಟ್ ತೀರ್ಪಿನ ವಿರುದ್ಧ ಸದಾನಂದ ಗೌಡ ಮತ್ತು ಮಾಜಿ ಆಹಾರ ಮತ್ತು ನಾಗರಿಕ ಸರಬರಾಜು ಸಚಿವ ಡಿಎನ್. ಜೀವರಾಜ್ ಮೇಲ್ಮನವಿ ಸಲ್ಲಿಸಿದ್ದರು.