ಬಿಹಾರದಲ್ಲಿ ಅತೀ ಅಮಾನುಷ ಮರ್ಯಾದಾ ಹತ್ಯೆ

ಪಾಟ್ನಾ: ಪರ ಜಾತಿಯವನನ್ನು ಪ್ರೇಮಿಸಿದ ಕಾರಣಕ್ಕೆ ಪೋಷಕರೇ ಪ್ರಿಯತಮನೊಂದಿಗೆ ಹೆತ್ತ ಮಗಳನ್ನು ಅಮಾನುಷವಾಗಿ ಮರ್ಯಾದಾ ಹತ್ಯೆ ಮಾಡಿರುವ ದಾರುಣ ಘಟನೆ ಬಿಹಾರದ ಗಯಾ ಜಿಲ್ಲೆಯ ಅಮೇಠಾ ಗ್ರಾಮದಲ್ಲಿ ನಡೆದಿದೆ.

ಮರ್ಯಾದಾ ಹತ್ಯೆಮಾಡಿರುವ ಹುಡುಗಿಯ ಕುಟುಂಬ ಸದಸ್ಯರು ಮಗಳು ಹಾಗೂ ಪ್ರಿಯಕರನನ್ನು ಮಾರಣಾಂತಿಕವಾಗಿ ಜಜ್ಜಿ, ಇರಿದು ಕೊಂದಿದ್ದಾರೆ. ಈ ಅಮಾನುಷ ಕಗ್ಗೊಲೆಗೆ ಗ್ರಾಮ ಪಂಚಾಯತ್‌ನ ಒಪ್ಪಿಗೆ ಕೂಡ ಇತ್ತೆಂದು ಸ್ಥಳೀಯರು ತಿಳಿಸಿದ್ದಾರೆ.

ಹತ್ಯೆಯ ಸಾಕ್ಷ್ಯಗಳು ಪೊಲೀಸರಿಗೆ ಸಿಗದಂತೆ ಮಾಡಲು ಕಗ್ಗೊಲೆ ಗೈದ ಬಾಲಕಿಯ ಕುಟುಂಬದವರು ಅವಸರ ಅವಸರದಲ್ಲಿ  ಎರಡೂ ಶವಗಳಿಗೆ ಬೆಂಕಿ ಹಿಟ್ಟು ಸುಟ್ಟು ಹಾಕಿದ್ದಾರೆ.

ಪೊಲೀಸರ ಪ್ರಕಾರ, 16 ವರ್ಷದ ಅಪ್ರಾಪ್ತ ಯುವತಿಯ ನೆರೆಮನೆಯವನಾಗಿದ್ದ ಜೈರಾಮ್ ಮಂಝಿ 25ರ ಹರೆಯ. ಇತನಿಗೆ ಹೀಗಾಗಲೇ ಮದುವೆಯಾಗಿದ್ದು, ಮೂರು ಮಕ್ಕಳ ತಂದೆಯಾಗಿದ್ದ. ಇವರಿಬ್ಬರನ್ನು ಗ್ರಾಮಸ್ಥರಲ್ಲಿ ಕೆಲವರು ಗ್ರಾಮದ ಹೊರಗೆ ಜತೆಯಾಗಿರುವುದನ್ನು ಕಂಡಿದ್ದಾರೆ. ಒಡನೆಯೇ ಅವರು ಬಾಲಕಿಯ ಕುಟುಂಬದವರಿಗೆ ವಿಷಯವನ್ನು ತಿಳಿಸಿದ್ದಾರೆ.

ಕೂಡಲೇ ಅವರಿಬ್ಬರನ್ನು ಹಿಡಿದು ತಂದು ಗ್ರಾಮ ಪಂಚಾಯತ್‌ ಸದಸ್ಯರ ಮುಂದೆ ಹಾಜರುಪಡಿಸಲಾಗಿದೆ. ಪಂಚಾಯತ್‌ನವರು ಈ ಜೋಡಿಯ ಮರ್ಯಾದಾ ಹತ್ಯೆಗೆ ಸಮ್ಮತಿಸಿರುವುದಾಗಿ ಹೇಳಲಾಗಿದೆ. ಆ ಪ್ರಕಾರ ಬಾಲಕಿಯ ಕುಟುಂಬದವರು ಜೋಡಿಯನ್ನು ಮಾರಣಾಂತಿಕವಾಗಿ ಹೊಡೆದು ಜಜ್ಜಿ ಕೊಂದಿದ್ದಾರೆ. ಬಳಿಕ ಪಂಚಾಯತ್‌ ಸದಸ್ಯರ ಸಮ್ಮುಖದಲ್ಲೇ ಮೃತ ಜೋಡಿಯನ್ನು ಬಾಲಕಿಯ ಹೆತ್ತವರು ದಫ‌ನ ಮಾಡಿದ್ದಾರೆ.