ನನ್ನ ಮಗಳು ನ್ಯಾಯವಾದಿ

ನವದೆಹಲಿ:ಈಶಾನ್ಯ ರಾಜ್ಯ ಕೋಟಾ ಮೂಲಕ ಮಗಳಿಗೆ ವೈದ್ಯಕೀಯ ಕಾಲೇಜಿನಲ್ಲಿ ಸೀಟು ಪಡೆಯಲು ಶಿಫಾರಸು ತೆಗೆದುಕೊಂಡಿದ್ದರು ಎಂದು ತಮ್ಮ ಬಗ್ಗೆ ಟ್ವಿಟ್ಟರ್ ನಲ್ಲಿ ಬಂದಿರುವ ಹೇಳಿಕೆಗೆ ವಿದೇಶಾಂಗ ಸಚಿವೆ ಸುಷ್ಮಾ  ಸ್ವರಾಜ್ ಇಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ನನ್ನ ಮಗಳು ನ್ಯಾಯವಾದಿ ಮತ್ತು ಆಕೆ ಆಕ್ಸ್ ಫರ್ಡ್ ವಿಶ್ವವಿದ್ಯಾಲಯದ ಪದವೀಧರೆ. ಟ್ವಿಟ್ಟರ್ ನಲ್ಲಿ ಬಂದಿರುವ ಹೇಳಿಕೆ ಸತ್ಯಕ್ಕೆ ದೂರವಾದುದು ಎಂದು ಹೇಳಿದ್ದಾರೆ.
ಸುಷ್ಮಾ ಸ್ವರಾಜ್ ಶಿಫಾರಸ್ಸು ಪಡೆಯಲು ಮತ್ತು ನೀಡಲು ಅಷ್ಟೊಂದು ಪ್ರಭಾವಿಯಲ್ಲ, ಅವರ ಮಗಳಿಗೆ ವೈದ್ಯಕೀಯ ಓದಲು ಈಶಾನ್ಯ ಕೋಟಾದಡಿ ಸೀಟು ಪಡೆದಿದ್ದರು ಎಂದು ಟ್ವಿಟ್ಟರ್ ನಲ್ಲಿ ಬಂದಿತ್ತು.

ಸುಷ್ಮಾ ಸ್ವರಾಜ್ ಅವರ ಪ್ರತಿಕ್ರಿಯೆ ಬಂದ ಕೂಡಲೇ ಟ್ವಿಟ್ಟರ್ ಮಾಡಿದವರು ಅದನ್ನು ತೆಗೆದುಹಾಕಿದ್ದರು. ಆದರೆ ಆ ಟ್ವೀಟನ್ನು ಬೇರೆಯವರು ಮರು ಟ್ವೀಟ್ ಮಾಡಿದ್ದರು.
 ಸುಷ್ಮಾ ಅವರಿಗೆ ಟ್ವಿಟ್ಟರ್ ಬೆಂಬಲಿಗರು, 'ನಾಯಿ ಬೊಗಳುತ್ತಿರುತ್ತದೆ', ಅದಕ್ಕೆ ಪ್ರತಿಕ್ರಿಯೆ ನೀಡದೆ, ತಮ್ಮ ಉತ್ತಮ ಕೆಲಸಗಳನ್ನು ಮುಂದುವರಿಸಿಕೊಂಡು ಹೋಗುವಂತೆ ಹೇಳಿದ್ದಾರೆ.

ಸುಷ್ಮಾ ಸ್ವರಾಜ್ ಅವರ ಪುತ್ರಿ ಬಲ್ಸುರಿ ವಕೀಲೆಯಾಗಿದ್ದು, ಲಲಿತ್ ಮೋದಿಯವರ ಪಾಸ್ ಪೋರ್ಟ್ ರದ್ದು ಕೇಸಿನಲ್ಲಿ ನ್ಯಾಯಾಲಯದ ಮುಂದೆ ಹಾಜರಾದ ವಿಚಾರದಲ್ಲಿ ಅವರ ಹೆಸರು ಕೇಳಿ ಬರುತ್ತಿದೆ.