ಬಿಹಾರ ವಿಧಾನಸಭಾ ಚುನಾವಣಾ ಪ್ರಚಾರ ಅಖಾಡಕ್ಕೆ ಮೋದಿ

ಪಾಟ್ನಾ: ಬಿಹಾರ ಚುನಾವಣಾ ಪ್ರಚಾರಕ್ಕೆ ಎನ್ ಡಿ ಎ ಪಕ್ಷದ ಪರವಾಗಿ ಇಂದು ಪ್ರಧಾನಿ ನರೇಂದ್ರ ಮೋದಿ ಚಾಲನೆ ನೀಡಲಿದ್ದಾರೆ ಮತ್ತು ಈ ಸಮಯದಲ್ಲಿ ಹಲವು ಯೋಜನೆಗಳ ಉದ್ಘಾಟನೆ ಮಾಡಲಿದ್ದು, ಬಿಹಾರ ರಾಜ್ಯಕ್ಕಾಗಿ ಹಲವಾರು ಅನುದಾನಗಳನ್ನು ಘೋಷಿಸಲಿದ್ದಾರೆ ಎಂದು ತಿಳಿದುಬಂದಿದೆ.

ಮಧ್ಯಾಹ್ನದ ನಂತರ ಮುಜಫರ್ ನಲ್ಲಿ ಸಾರ್ವಜನಿಕ ಸಭೆಯನ್ನುದ್ದೇಶಿಸಿ ಮಾತನಾಡಲಿದ್ದಾರೆ. ೩೮ ಕಿಮೀ ಉದ್ದದ ಬಿಹಾರ್ಶರೀಫ್-ಧನ್ಯವಾನ್ ಮಾರ್ಗದ ರೈಲು ಮಾರ್ಗವನ್ನು ಸೇರಿದಂತೆ ತಮ್ಮ ಒಂದು ದಿನದ ಬಿಹಾರ ಪ್ರವಾಸದಲ್ಲಿ ಹಲವಾರು ಯೋಜನೆಗಳನ್ನು ಉದ್ಘಾಟಿಸಲಿದ್ದಾರೆ.

ಬಿತಾದಲ್ಲಿ ಪ್ರರಾಂಭವಾಗಲಿರುವ ಐಐಟಿ ಪಾಟ್ನಾದ ನೂತನ ಕಟ್ಟಡ, ಜಗದೀಶಪುರ-ಹಲ್ದಿಯಾ ಮಾರ್ಗದ ಗ್ಯಾಸ್ ಪೈಪ್ ಲೈನ್ ಯೋಜನೆಯನ್ನು ಕೂಡ ವಿಡಿಯೋ ಕಾನ್ಫರೆನ್ಸ್ ಮೂಲಕ ಉದ್ಘಾಟನೆ ಮಾಡಲಿದ್ದಾರೆ.

ಇವುಗಳಲ್ಲದೆ ಪಾಟ್ನಾ-ಮುಂಬೈ ಸಂಪೂರ್ಣ ಹವಾ ನಿಯಂತ್ರಿತ ಸುವಿಧ ಎಕ್ಸ್ಪ್ರೆಸ್ ಗೆ ಹಸಿರು ನಿಶಾನೆ ತೋರಲಿದ್ದು, ಹಳ್ಳಿಗಳಿಗೆ ವಿದ್ಯುಚ್ಚಕ್ತಿ ಒದಗಿಸಲಿರುವ ದೀನದಾಳ ಉಪಾಧ್ಯಾಯ ಗ್ರಾಮೀಣ ವಿದ್ಯುಚ್ಚಕ್ತಿ ಯೋಜನೆಗೂ ಚಾಲನೆ ನೀಡಲಿದ್ದಾರೆ.

ಇದಲ್ಲದೆ ಆಂಧ್ರಪ್ರದೇಶದ ಮಾದರಿಯಲ್ಲಿ ಬಿಹಾರಕ್ಕೂ ವಿಷೇಶ ಪ್ಯಾಕೇಜ್ ಘೋಷಿಸುವ ಸಾಧ್ಯತೆ ಇದೆ ಎನ್ನಲಾಗಿದೆ. ಗಂಗಾ ನದಿಯ ಮೇಲು ಸೇತುವ ಮತ್ತು ೪೦೦೦ ಮೆಗಾವ್ಯಾಟ್ ವಿದ್ಯುಚ್ಚಕ್ತಿ ಸ್ಥಾವರದ ಘೋಷಣೆಗಳು ಆಗಲಿವೆ.