ದೆಹಲಿ ಪೊಲೀಸರ ಬಲೆಗೆ ಬಿದ್ದ ಸರಣಿ ಹಂತಕ, ಅತ್ಯಾಚಾರಿ

ನವದೆಹಲಿ: ``ನಾನು ಸೆರೆಯಾಗದೇ ಇದ್ದಿದ್ದರೆ, ಈ ಥರದ ಇನ್ನೂ ಹಲವು ಪಾತಕ ಎಸಗುತ್ತಿದ್ದೆ. ನಾನು ಮದ್ಯಪಾನ ಅಮಲಿನಲ್ಲಿ ಅತ್ಯಾಚಾರ ಮತ್ತು ಕೊಲೆ ಮಾಡುತ್ತಿದ್ದೆ. ನಶೆ ಇಳಿದ ಮೇಲೆ ಹೀಗೆ ಮಾಡಬಾರದು ಅನಿಸುತ್ತಿತ್ತು.

ಆ ಮಕ್ಕಳ ಪೋಷಕರ ಸ್ಥಾನದಲ್ಲಿ ನಾನು ಇದ್ದಿದ್ದರೆ ಈ ಪಾತಕಕ್ಕೆ ದೊಡ್ಡ ಶಿಕ್ಷೆ ಆಗಲಿ ಎಂದೇ ಕೇಳಿಕೊಳ್ಳುತ್ತಿದ್ದೆ '' ಆ ಅತ್ಯಾಚಾರಿ ಮುಖಕ್ಕೆ ಮುಸುಕು ಹಾಕಿಕೊಂಡು ಮಾಧ್ಯಮದೊಂದಿಗೆ ಹೇಳಿಕೊಂಡ ಮಾತುಗಳಿವು. ದೆಹಲಿ, ಉತ್ತರಪ್ರದೇಶದಲ್ಲಿ 6 ವರ್ಷಗಳಲ್ಲಿ 15 ಅಪ್ರಾಪ್ತ ವಯಸ್ಕರ ಮೇಲೆ ಅತ್ಯಾಚಾರ ಎಸಗಿ 11 ಮಕ್ಕಳ ಕೊಲೆ ಮಾಡಿರುವ ರವಿಂದರ್ ಕುಮಾರ್(24) ಕೊನೆಗೂ ಪೊಲೀಸ್ ಕೈಗೆ ಸಿಕ್ಕಿ ಬಿದ್ದಿದ್ದಾನೆ.

ಆದರೆ ಆತನಿಗೆ ಕಿಂಚಿತ್ತೂ ಪಶ್ಚಾತ್ತಾಪ ವಿಲ್ಲವಂತೆ. 4 ದಿನಗಳ ಹಿಂದೆ ಕೊಲೆಯಾದ 6 ವರ್ಷದ ಹೆಣ್ಣುಮಗಳೊಬ್ಬಳ ಮೃತದೇಹದ ಬಳಿ ಆತನ ಡ್ರೈವಿಂಗ್ ಲೈಸೆನ್ಸ್ ಸಿಗದೇ ಇದ್ದಿದ್ದಲ್ಲಿ, ಈಗಲೂ ಆತ ತಪ್ಪಿಸಿಕೊಂಡೇಬಿಡುತ್ತಿದ್ದ. ಈತನ ಬಂಧನದಿಂದಾಗಿ ಮತ್ತೊಮ್ಮೆ ನಿತಾರಿ ಹತ್ಯಾ ಕಾಂಡದ ಘಟನೆ ನೆನಪಿಗೆ ಬಂದಂತಾಗಿದೆ.

ತನ್ನ ಮೇಲಿನ ಆರೋಪಗಳಷ್ಟನ್ನೂ ಒಪ್ಪಿಕೊಂಡಿರುವ ಕುಮಾರ್, ಈ ಮೊದಲು ಒಮ್ಮೆ ಬಂಧನಕ್ಕೊಳಗಾಗಿ ಜಾಮೀನಿನ ಮೇಲೆ ಬಿಡುಗಡೆಯಾಗಿದ್ದನೆಂದು ಪೊಲೀಸರು ಹೇಳಿದ್ದಾರೆ. 2008ರಲ್ಲಿ ಮೊದಲ ಪಾತಕ ಮಾಡಿದ ಈತ, ನಂತರ 4 ವರ್ಷದ ಅವಧಿಯಲ್ಲಿ ಹಲವು ಮಕ್ಕಳನ್ನು ಸ್ವೀಟು, ಚಾಕಲೇಟು ಆಸೆ ತೋರಿಸಿ ಎತ್ತಿಕೊಂಡು ಹೋಗಿ ಅತ್ಯಾಚಾರ ಎಸಗಿ ಕೊಲೆ ಮಾಡುತ್ತಿದ್ದ.

2013ರಲ್ಲಿ ಅಲಿಗಡಕ್ಕೆ ತೆರಳಿ 4 ಅತ್ಯಾಚಾರ ನಡೆಸಿದ್ದಾನೆ. ಮುಂದೆ, ನೋಯ್ಡಾ, ಬಗಲ್ ಪುರ್ ಹೀಗೆ ಹೋದಲೆಲ್ಲ ಕನಿಷ್ಠ 2 ಅಪರಾಧ ಮಾಡಿದ್ದಾನೆ. ಮಾದಕ ವ್ಯಸನಿಯಾಗಿದ್ದ ಈತನಿಗೆ ಕೊಲೆ ಯಾಕೆ ಮಾಡುತ್ತಿದ್ದ ಎಂದು ಕೇಳಿದರೆ ``ನನಗೆ ಶಬ್ದ, ಗಲಾಟೆ ಅಂದರೆ ಆಗೋಲ್ಲ. ಮಕ್ಕಳು ತುಂಬ ಗಲಾಟೆ ಮಾಡ್ತಾರೆ. ಅವರನ್ನು ಸುಮ್ಮನಾಗಿಸಲು ಹೀಗೆ ಮಾಡುತ್ತಿದ್ದೆ'' ಎಂದು ಪ್ರತಿಕ್ರಿಯೆ ನೀಡುತ್ತಾನೆ.