ಸಂಸದರ ವೇತನ ಶೇ.100, ಪಿಂಚಣಿ ಶೇ.75 ಹೆಚ್ಚಳಕ್ಕೆ ಆಗ್ರಹ

ನವದೆಹಲಿ: ಸಂಸದರ ವೇತನವನ್ನು ದುಪ್ಪಟ್ಟುಗೊಳಿಸುವಂತೆ ಹಾಗು ಮಾಜಿ ಸಂಸದರ ಪಿಂಚಣಿಯನ್ನು ಶೇ.75 ಹೆಚ್ಚಿಸುವಂತೆ ಸಂಸದೀಯ ಸಮಿತಿ ಶಿಫಾರಸು ಮಾಡಿದೆ.ಅದೇ ವೇಳೆ  ಸರಕಾರಿ ನೌಕರರ ವೇತನ ಪರಿಷ್ಕರಣೆಗೆ ಇರುವ ವೇತನ ಆಯೋಗದಂಥ ವ್ಯವಸ್ಥೆ ಸಂಸದರಿಗೂ ಇರಲಿ ಎಂದು ಸರಕಾರಕ್ಕೆ ಸಲ್ಲಿಸಿರುವ ಶಿಫಾರಸಿನಲ್ಲಿ ಸಂಸದೀಯ ಜಂಟಿ ಸಮಿತಿ ತಿಳಿಸಿದೆ.

ಹಿಂದೆ 2010ರಲ್ಲಿ ಸಂಸದರ ವೇತನ ಪರಿಷ್ಕರಣೆ ಆಗಿತ್ತು. ಸರ್ಕಾರಿ ನೌಕರರಂತೆ ಸಂಸದರಿಗೆ ತುಟ್ಟಿಭತ್ಯೆ ಇರುವುದಿಲ್ಲ ಎಂದಿರುವ ಸಮಿತಿ ಇದೀಗ ಒಟ್ಟು 60 ಶಿಫಾರಸುಗಳನ್ನು ಮುಂದಿಟ್ಟಿದೆ.

ಪ್ರಸ್ತುತ ಹಾಲಿ ಸಂಸದರ ತಿಂಗಳ ಸಂಬಳ ರು. 50,000, ಸಂಸತ್‌ ಅಧಿವೇಶನದಲ್ಲಿ ಪಾಲ್ಗೊಳ್ಳುವ ಸಂದರ್ಭದಲ್ಲಿ ನೀಡುತ್ತಿರುವ ರು. 2000 ದಿನ ಭತ್ಯೆಯನ್ನೂ ಹೆಚ್ಚಿಸುವಂತೆಯೂ ಸಮಿತಿ ಶಿಫಾರಸು ಮಾಡಿದೆ.

ವೇತನ ಪರಿಷ್ಕರಣೆ ಬಾಕಿ ಇದ್ದು, ಸಂಸದರನ್ನು ಭೇಟಿ ಆಗಲು ಬರುವ ಜನರಿಗೆ ಚಹಾ ನೀಡುವುದಕ್ಕಾಗಿ ರು. 1000 ಬೇಕಾಗುತ್ತದೆ. ನಮ್ಮನ್ನು ಭೇಟಿಯಾಗಲು ಬರುವ ಜನರಿಗೆ ಕನಿಷ್ಠ ಸೌಜನ್ಯ ತೋರದಿರಲು ಸಾಧ್ಯವೇ? ಎಂದು ಬಿಜೆಪಿ ಸಂಸದರು ಪ್ರಶ್ನಿಸಿದ್ದಾರೆ.

ಮಾಜಿ ಸಂಸದರಿಗೆ ವರ್ಷದಲ್ಲಿ 20-25 ಬಾರಿ ಉಚಿತ ವಿಮಾನ ಪ್ರಯಾಣ ಮಾಡಲು ಅನುವುಮಾಡಿಕೊಡಬೇಕು. ಅವರಿಗೆ ದೊರೆಯುತ್ತಿರುವ ಪಿಂಚಣಿಯನ್ನು ರು. 20,000 ದಿಂದ ರು.35,000ಕ್ಕೆ ಹೆಚ್ಚಿಸಬೇಕು ಎಂದು ಬಿಜೆಪಿ ಸಂಸದ ಯೋಗಿ ಆದಿತ್ಯಾನಥ್‌ ನೇತೃತ್ವದ ಈ ಸಮಿತಿ ಶಿಫಾರಸು ಮಾಡಿದೆ.

ಸದ್ಯ ಸಂಸದರು ಹಾಗೂ ಅವರ ಸಂಗಾತಿ ರೈಲಿನಲ್ಲಿ ಉಚಿತವಾಗಿ ಮೊದಲ ದರ್ಜೆಯಲ್ಲಿ ಪ್ರಯಾಣಿಸಬಹುದಾಗಿದ್ದು, ಮತ್ತೊಬ್ಬ ಸಹಪ್ರಯಾಣಿಕರು (ಆಪ್ತಕಾರ್ಯದರ್ಶಿ)ಗೂ ಈ ಸೌಲಭ್ಯ ಲಭ್ಯವಾಗಬೇಕು ಎಂದು ಸಮಿತಿ ಶಿಫಾರಸು ಮಾಡಿದೆ. ಇದಲ್ಲದೇ ಪಾಕೆಟ್‌ ಮನಿ ರೂಪದಲ್ಲಿ ಮೊದಲ ದರ್ಜೆಯ ರೈಲು ಟಿಕೆಟ್‌ ದರವನ್ನು ಸಂಸದರಿಗೆ ನೀಡಬೇಕು ಎಂಬ ಪ್ರಸ್ತಾವನೆಯನ್ನೂ ಮುಂದಿಟ್ಟಿದೆ. ಅದೇ ರೀತಿ ವಿಮಾನ ಪ್ರಯಾಣದ ವೇಳೆಯೂ ಒಂದು ಟಿಕೆಟ್‌ ದರದ ಮೊತ್ತವನ್ನು ಭತ್ಯೆಯಾಗಿ ನೀಡಬೇಕು ಎಂದು ಹೇಳಲಾಗಿದೆ.

ಎಲ್ಲಕ್ಕಿಂತ ಮುಖ್ಯವಾಗಿ ವಿಮಾನ ನಿಲ್ದಾಣಗಳಲ್ಲಿ ಸಂಸದರಿಗೆ ವಿವಿಐಪಿ ಸೌಲಭ್ಯ ಬೇಕೆಂಬ ಬೇಡಿಕೆಯೂ ಇದೆ. ಜತೆಗೆ, ಕೇಂದ್ರ ಸರಕಾರದ ಆರೋಗ್ಯ ಯೋಜನೆಗಳು ಮಕ್ಕಳು ಹಾಗೂ ಮೊಮ್ಮಕ್ಕಳಿಗೂ ಲಭ್ಯವಾಗಬೇಕು ಎಂದು ಸಮಿತಿ ಹೇಳಿದೆ.