ಶಾರದಾ ಹಗರಣ: ಪ.ಬಂಗಾಳದ 9 ಕಡೆ ಸಿಬಿಐ ದಾಳಿ

ಕೋಲ್ಕತಾ: ಬಹುಕೋಟಿ ಹಗರಣ ಶಾರದಾ ಚಿಟ್ ಫಂಡ್ ಪ್ರಕರಣಕ್ಕೆ ಸಂಬಂಧಿಸಿದಂತೆ ಪಶ್ಚಿಮ ಬಂಗಾಳದ 9 ಪ್ರದೇಶಗಳಲ್ಲಿ ಸಿಬಿಐ ಶನಿವಾರ ದಾಳಿ ನಡೆಸಿದೆ.

ಶಾರದಾ ಚಿಟ್ ಫಂಡ್ ಹಗರಣಕ್ಕೆ ಸಂಬಂಧಿಸಿದಂತೆ ಎಫ್ಐಆರ್ ದಾಖಲಾಗಿರುವ 5 ಕಂಪನಿಗಳಲ್ಲೊಂದಾದ ವಿನ್ ರಿಯಾಲ್ಕನ್ ಸಂಸ್ಥೆಯ ವಿವಿಧ ಕಚೇರಿಗಳ ಮೇಲೆ ಹಾಗೂ ಬರಾಕ್ಪುರ, ಖರ್ದಾಹ, ಉತ್ತರ ಪರಗಣ ಜಿಲ್ಲೆಯ ಸೊದೆಪುರ ಮತ್ತು ಹಬ್ರ ಸೇರಿದಂತೆ ಒಟ್ಟು 9 ಕಡೆಗಳಲ್ಲಿ ಸಿಬಿಐ ಅಧಿಕಾರಿಗಳು ದಾಳಿ ನಡೆಸಿದ್ದಾರೆ. ಪ್ರಕರಣಕ್ಕೆ ಸಂಬಂಧಿಸಿದಂತೆ ಪ್ರಮುಖ ದಾಖಲೆಗಳನ್ನು ವಶಪಡಿಸಿಕೊಂಡಿರುವುದಾಗಿ ಅಧಿಕಾರಿಗಳು ತಿಳಿಸಿದ್ದಾರೆ.

ಶಾರದಾ ಚಿಟ್ ಫಂಡ್ ಹಗರಣಕ್ಕೆ ಸಂಬಂಧಿಸಿದಂತೆ ಕಳೆದ ನವೆಂಬರ್ನಲ್ಲಿ ವಿನ್ ರಿಯಾಲ್ಕನ್ ಕಂಪನಿಯ ವಿರುದ್ದ ವಂಚನೆ, ಕ್ರಿಮಿನಲ್ ಸಂಚು, ಮನಿಸರ್ಕ್ಯುಲೇಶನ್ ಸ್ಕೀಮ್ನ ನಿಯಮ ಉಲ್ಲಂಘನೆ ಮಾಡಿರುವ ಹಿನ್ನೆಲೆಯಲ್ಲಿ ಸಿಬಿಐ ಎಫ್ಐಆರ್ ದಾಖಲುಮಾಡಿಕೊಂಡಿತ್ತು.