ಜಪಾನ್ ನಲ್ಲಿ ಪ್ರಬಲ ಭೂಕಂಪ: ಸುನಾಮಿ ಎಚ್ಚರಿಕೆ

ಟೋಕಿಯೋ: ಜಪಾನ್ ನಲ್ಲಿ ಮಂಗಳವಾರ ಪ್ರಬಲ ಭೂಕಂಪನ ಸಂಭವಿಸಿದ್ದು, ಜಪಾನ್ ನ ಕಡಲ ತೀರದಲ್ಲಿ ಸುನಾಮಿ ಎಚ್ಚರಿಕೆ ನೀಡಲಾಗಿದೆ ಎಂದು ಮೂಲಗಳು ತಿಳಿಸಿವೆ.

ಜಪಾನ್ ನಲ್ಲಿ ಇಂದು ಬೆಳ್ಳಂಬೆಳಗ್ಗೆಯೇ ಪ್ರಬಲ ಭೂಕಂಪನ ಸಂಭವಿಸಿದ್ದು, ರಿಕ್ಟರ್ ಮಾಪಕದಲ್ಲಿ 6.9 ರಷ್ಟು ತೀವ್ರತೆ ದಾಖಲಾಗಿದೆ. ಜಪಾನ್ ಮೆಟ್ರೋಲಾಜಿಕಲ್ ಏಜೆನ್ಸಿ (ಹವಾಮಾನ ಇಲಾಖೆ) ಹೇಳಿರುವಂತೆ ಇಂದು ಬೆಳಗ್ಗೆ ಸುಮಾರು ಗಂಟೆಯ ಹೊತ್ತಿನಲ್ಲಿ ಭೂಕಂಪನ ಸಂಭವಿಸಿದ್ದು, 8 ಗಂಟೆಯ ಸುಮಾರಿನಲ್ಲಿ ಕಡಲ ತೀರಕ್ಕೆ ಸುನಾಮಿ ಎಚ್ಚರಿಕೆ ರವಾನಿಸಲಾಗಿದೆ.

ಭೂಕಂಪನದ ನಿರ್ಧಿಷ್ಟ ಕೇಂದ್ರ ಬಿಂದು ಪ್ರದೇಶ ಈವರೆಗೂ ತಿಳಿಯದೆ ಹೋದರೂ ಈಶಾನ್ಯ ಜಪಾನ್ ನಲ್ಲಿ ಭೂಕಂಪನದ ಕೇಂದ್ರ ಬಿಂದು ಎಂದು ತಿಳಿದುಬಂದಿದೆ. ಸುಮಾರು 10 ಕಿ.ಮೀ ಆಳದಲ್ಲಿ ಭೂಕಂಪನ ಸಂಭವಿಸಿದ್ದು, ಸುನಾಮಿ ಸೃಷ್ಟಿಸಬಲ್ಲ ಸಾಮರ್ಥ್ಯ ಈ ಕಂಪನಕ್ಕಿದೆ ಎಂದು ಹವಾಮಾನ ಇಲಾಖೆ ತಿಳಿಸಿದೆ. ಹೀಗಾಗಿ ತುರ್ತಾಗಿ ಕಡಲ ತೀರದ ಪ್ರದೇಶಗಳಿಗೆ ಸುನಾಮಿ ಎಚ್ಚರಿಕೆ ನೀಡಲಾಗಿದೆ. ರಾಜಧಾನಿ ಟೋಕಿಯೋದಲ್ಲಿಯೂ ಕೂಡ ಭೂಕಂಪನದ ಪರಿಣಾಮ ಉಂಟಾಗಲಿದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.

2011ರಲ್ಲಿಯೂ ಇಂತಹುದೇ ಪ್ರಬಲ ಭೂಕಂಪನದಿಂದಾಗಿ ಎದ್ದಿದ್ದ ಸುನಾಮಿಯಿಂದಾಗಿ ಸುಮಾರು 18 ಸಾವಿರ ಮಂದಿ ಸಾವನ್ನಪ್ಪಿದ್ದರು. ಬಹುತೇಕ ಜಪಾನ್ ಸುಮಾರು ದಿನಗಳ ಕಾಲ ನೀರಿನಲ್ಲಿ ಮುಳುಗಿತ್ತು.