ಯಾವ ತಪ್ಪಿಗೆ ಅಮಾನತು: ಮೋದಿಗೆ ಕೀರ್ತಿ ಆಜಾದ್ ಪ್ರಶ್ನೆ

ಅಹ್ಮದಾಬಾದ್: ಪಕ್ಷದಿಂದ ಅಮಾನತು ಮಾಡುವಂತಹ ತಪ್ಪು ನಾನೇನು ಮಾಡಿದೆ ಎಂದು ಮಾಜಿ ಕ್ರಿಕೆಟಿಗ ಹಾಗೂ ಸಂಸದ ಕೀರ್ತಿ ಆಜಾದ್ ಅವರು ಪ್ರಧಾನಮಂತ್ರಿ ನರೇಂದ್ರ ಮೋದಿಯವರನ್ನು ಗುರುವಾರ ಪ್ರಶ್ನಿಸಿದ್ದಾರೆ.

ಕೇಂದ್ರ ವಿತ್ತ ಸಚಿವ ಅರುಣ್ ಜೇಟ್ಲಿ ವಿರುದ್ಧದ ಡಿಡಿಸಿಎ ಭ್ರಷ್ಟಾಚಾರ ಹಗರಣಕ್ಕೆ ಸಂಬಂಧಿಸಿ ವಿರೋಧ ಪಕ್ಷಗಳೊಂದಿಗೆ ಧ್ವನಿಗೂಡಿಸಿದ್ದ ಕೀರ್ತಿ ಆಜಾದ್ ಅವರನ್ನು ಪಕ್ಷ ವಿರೋಧ ಚಟುವಟಿಕೆ ಹಾಗೂ ಅಶಿಸ್ತು ಕಾರಣ ನೀಡಿದ್ದ ಬಿಜೆಪಿ ಪಕ್ಷ ಅವರನ್ನು ಬುಧವಾರ ಅಮಾನತು ಮಾಡಿತ್ತು.

ಹೀಗಾಗಿ ಅಮಾನತು ಕುರಿತಂತೆ ತೀವ್ರ ಅಸಮಾಧಾನ ವ್ಯಕ್ತಪಡಿಸಿರುವ ಅವರು ಈ ಕುರಿತಂತೆ ಇಂದು ಪ್ರತಿಕ್ರಿಯೆ ನೀಡಿದ್ದು, ನನ್ನ ಹೋರಾಟವೇನಿದ್ದರು ಭ್ರಷ್ಟಚಾರ ವಿರುದ್ಧವೇ ಹೊರತು ಒಬ್ಬ ವ್ಯಕ್ತಿಯ ವಿರುದ್ಧವಲ್ಲ. ನನ್ನ ಮನವಿಯನ್ನು ಪ್ರಧಾನಮಂತ್ರಿ ನರೇಂದ್ರ ಮೋದಿಯವರು ಕೇಳುತ್ತಾರೆ ಹಾಗೂ ನ್ಯಾಯವನ್ನು ಒದಗಿಸುತ್ತಾರೆಂದು ನನಗೆ ನಂಬಿಕೆಯಿದೆ ಎಂದು ಹೇಳಿದ್ದಾರೆ.

ಅಮಾನತು ಕುರಿತಂತೆ ಪಕ್ಷದ ವತಿಯಿಂದ ನನಗೆ ನೋಟಿಸ್ ಬಂದಿತ್ತು. ಆದರೆ ನೋಟಿಸ್ ನಲ್ಲಿ ಯಾವ ಕಾರಣಕ್ಕೆ ನನ್ನನ್ನು ಅಮಾನತು ಮಾಡಲಾಗಿದೆ ಎಂಬುದರ ಕುರಿತಂತೆ ಯಾವುದೇ ಮಾಹಿತಿ ಇರಲಿಲ್ಲ. ಅಮಾನತು ಮಾಡಲು ನನ್ನ ತಪ್ಪಾದರೂ ಏನಿದೆ. ಈ ಬಗ್ಗೆ ನನಗೆ ಸ್ಪಷ್ಟನೆ ಬೇಕಿದ್ದು, ನನ್ನ ಜವಾಬ್ದಾರಿತನವನ್ನು ಅರಿಯುವ ಅಗತ್ಯವಿದೆ. ಡಿಡಿಸಿಎ ವಿಷಯ ಕುರಿತಂತೆ ಶೀಘ್ರದಲ್ಲೇ ಪಿಐಎಲ್ ಅರ್ಜಿ ಸಲ್ಲಿಸಲಾಗುವುದು ಎಂದು ಹೇಳಿದ್ದಾರೆ.