ಜನ ವಿರೋಧಿ ಜಿಎಸ್ ಟಿ ಮಸೂದೆ ಒಪ್ಪಲು ಸಾಧ್ಯವೇ ಇಲ್ಲ: ಕಾಂಗ್ರೆಸ್

ನವದೆಹಲಿ: ಜನ ವಿರೋಧಿ ಮಸೂದೆಯಾದ ಸರಕು ಮತ್ತು ಸೇವಾ ತೆರಿಗೆ ಮಸೂದೆಯನ್ನು ಜಾರಿಗೆ ತರಲು ಬಿಡುವುದಿಲ್ಲ ಎಂದು ಕಾಂಗ್ರೆಸ್ ಪುನರುಚ್ಛರಿಸಿದೆ.

ಜನ ವಿರೋಧಿಯಾದ, ವ್ಯಾಪಾರಿಗಳ ವಿರುದ್ಧವಾಗಿರುವ ಮತ್ತು ಸಾಮಾನ್ಯ ಜನತೆಗೆ ವಿರುದ್ಧವಾಗಿರುವ ಸರಕು ಮತ್ತು ಸೇವಾ ತೆರಿಗೆಯನ್ನು ಜಾರಿಗೆ ತರಲು ಒಪ್ಪಿಕೊಳ್ಳಲು ಸಾಧ್ಯವಿಲ್ಲ ಎಂದು ನಮ್ಮ ನಾಯಕರಾದ ರಾಹುಲ್ ಗಾಂಧಿಯವರು ಸ್ಪಷ್ಟವಾಗಿ ತಿಳಿಸಿದ್ದಾರೆ ಎಂದು ಕಾಂಗ್ರೆಸ್ ನಾಯಕ ಪ್ರಮೋದ್ ತಿವಾರಿ ತಿಳಿಸಿದ್ದಾರೆ.

ಈ ಮಸೂದೆಯಲ್ಲಿ ಕೆಲವು ಅಡೆ ತಡೆಗಳಿವೆ. ಅವುಗಳನ್ನು ತೆಗೆದಿಲ್ಲ. ಮತ್ತು ಅಲ್ಲಿ ಸ್ವತಂತ್ರ ಪ್ರಾಧಿಕಾರವಿದೆ. ಅದನ್ನು ನಾವು ಸ್ವೀಕರಿಸಲು ಸಾಧ್ಯವಿಲ್ಲ. ಜನ ವಿರೋಧಿಯಾದ ಜಿಎಸ್ಟಿ ಮಸೂದೆ ಬಿಜೆಪಿಗೆ ಮಾತ್ರ ಬೇಕಾಗಿದೆ ಎಂದರು.

ಮುಖ್ಯ ಆರ್ಥಿಕ ಸಲಹೆಗಾರ ಅರವಿಂದ್ ಸುಬ್ರಹ್ಮಣ್ಯನ್ ಅವರ ನೇತೃತ್ವದ ಸರ್ಕಾರಿ ಸಮಿತಿಯೊಂದು ಸರಕು ಮತ್ತು ಸೇವಾ ತೆರಿಗೆಗೆ ಗುಣಮಟ್ಟವೊಂದನ್ನು ಸೂಚಿಸಿದ್ದು, ಅದರ ದರ ಶೇಕಡಾ 17ರಿಂದ 18ರಷ್ಟಾಗಿದೆ. ಮುಂದಿನ ಆರ್ಥಿಕ ವರ್ಷ ಆರಂಭಕ್ಕೆ ಇನ್ನು ಕೆಲವೇ ತಿಂಗಳುಗಳು ಬಾಕಿ ಉಳಿದಿರುವುದರಿಂದ ಈ ಚಳಿಗಾಲ ಅಧಿವೇಶನದಲ್ಲಿಯೇ ಮಸೂದೆಯನ್ನು ಜಾರಿಗೆ ತರುವುದು ಉದ್ದೇಶವಾಗಿದೆ.

ಆರ್ಥಿಕ ಸಮಿತಿಯು ರಿಯಲ್ ಎಸ್ಟೇಟ್, ವಿದ್ಯುತ್, ಆಲ್ಕೋಹಾಲ್ ಮತ್ತು ಪೆಟ್ರೋಲಿಯಂ ಉತ್ಪನ್ನಗಳನ್ನು ಹೊರಗಿಟ್ಟಿದ್ದು, ಅವುಗಳನ್ನು ಜಿಎಸ್ಟಿ ಮಸೂದೆಯೊಳಗೆ ತರಲು ಉದ್ದೇಶಿಸಿದೆ.