ದೇಶೀ ಗ್ಲೈಡ್ ಬಾಂಬ್ ಪರೀಕ್ಷೆ ಯಶಸ್ವಿ

ನವದೆಹಲಿ: ದೇಶೀಯವಾಗಿ ಅಭಿವೃದ್ಧಿಪಡಿಸಿದ ದೇಶದ ಮೊದಲ ಗ್ಲೈಡ್ ಬಾಂಬ್ (ತೇಲುತ್ತಾ ಸಾಗುವ ಬಾಂಬ್) ಪರೀಕ್ಷೆ ಶುಕ್ರವಾರ ಯಶಸ್ವಿಯಾಗಿದೆ

ಒಡಿಶಾ ಕರಾವಳಿಯಲ್ಲಿ ವಾಯುಸೇನೆ ವಿಮಾನ ಇಳಿಸಿದ ಈ ಬಾಂಬ್ 100 ಕಿ.ಮೀ ದೂರದ ಗುರಿಯನ್ನು ಯಶಸ್ವಿಯಾಗಿ ಭೇದಿಸಿದೆ. ಈ ಮೂಲಕ ನಿಖರವಾಗಿ ಗುರಿ ತಲುಪಬಲ್ಲ ಪೂರ್ವ ನಿರ್ದೇಶಿತ ಬಾಂಬ್‌ಗಳನ್ನು ಅಭಿವೃದ್ಧಿಪಡಿಸುವಲ್ಲಿ ಭಾರತ ಈಗ ಸ್ವಾವಲಂಬನೆ ಸಾಧಿಸಿದಂತಾಗಿದೆ.

ಕ್ಷಿಪಣಿಗಿಂತ ಭಿನ್ನ
ಕ್ಷಿಪಣಿಗೆ ಹೋಲಿಸಿದರೆ ಈ ಬಾಂಬ್ ಭಿನ್ನ. ಇದರಲ್ಲಿ ವಿಶೇಷ ರೀತಿಯ ನೇವಿಗೇಷನ್ ವ್ಯವಸ್ಥೆ ಅಳವಡಿಸಲಾಗಿರುತ್ತದೆ. ಅದರಂತೆ ಈ ಬಾಂಬ್ 100 ಕಿ.ಮೀ. ದೂರದ ಗುರಿ ಭೇದಿಸುವಂತೆ ನೋಡಿಕೊಳ್ಳಲಾಗುತ್ತದೆ.

ಕ್ಷಿಪಣಿಗೆ ಹೋಲಿಸಿದರೆ ಈ ರೀತಿಯ ಬಾಂಬ್‌ಗಳಲ್ಲಿ ಯಾವುದೇ ರೀತಿಯ ಮೋಟಾರ್‌ಗಳಿರುವುದಿಲ್ಲ. ನಿಗದಿತ ಗುರಿ ತಲುಪಲು ಸಣ್ಣ ನಿಯಂತ್ರಣ ಸಾಧನಗಳನ್ನಷ್ಟೇ ಅಳವಡಿಸಲಾಗಿರುತ್ತದೆ. ಹಾಗಾಗಿ ಈ ರೀತಿಯ ಬಾಂಬ್‌ಗಳ ತಯಾರಿಕೆ ಮತ್ತು ನಿರ್ವಹಣೆಗೆ ತಗಲುವ ವೆಚ್ಚ ಕಡಿಮೆ. ವಿಶೇಶವೆಂದರೆ ಈ ರೀತಿಯ ಬಾಂಬ್‌ಗಳನ್ನು ಶತ್ರುಗಳ ಕ್ಷಿಪಣಿ ಸುರಕ್ಷಾ ವ್ಯವಸ್ಥೆಯ ವ್ಯಾಪ್ತಿ ಪ್ರವೇಶಿಸುವ ಮೊದಲೇ ವಿಮಾನದ ಮೂಲಕ ಇಳಿಸಬಹುದು. ನಂತರ ಇವು ತಮ್ಮಷ್ಟಕ್ಕೆ 100 ಕಿ.ಮೀ ವ್ಯಾಪ್ತಿಯ ಗುರಿ ತಲುಪುತ್ತವೆ.