ಹೆಂಡತಿಯು ಗಂಡನ ಹೆಸರನ್ನು ಹೇಳಲು ನಾಚಿಕೊಳ್ಳುತ್ತಾಳೆ ಏಕೆ ?

    ವಿ.ಹೇಮಂತಕುಮಾರ್, ಬೆಂಗಳೂರು
    ಹೆಂಡತಿಯು ಗಂಡನ ಹೆಸರನ್ನು ಹೇಳಲು ನಾಚಿಕೊಳ್ಳುತ್ತಾಳೆ ಏಕೆ ?
    - ಕೆಲವು ಗಂಡಂದಿರು ಅಂತಹ 'ಕೆಲಸ' ಮಾಡಿರುತ್ತಾರೆ!

    ಶ್ರೀಕಾಂತ ಮುದಗಲ್ಲ, ಇಳಕಲ್
= ಅಲಂಕಾರಕ್ಕೂ, ಅಹಂಕಾರಕ್ಕೂ ವ್ಯತ್ಯಾಸವೇನು?
    - ಅಲಂಕಾರಕ್ಕೆ ಜನ ಬೀಳ್ತಾರೆ, ಅಹಂಕಾರಕ್ಕೆ ನೀವೇ ಬೀಳ್ತೀರಿ!

    ಪಿ.ಜೆ.ರಾಘವೇಂದ್ರ, ಮೈಸೂರು
= ಪಿಜ್ಜಾ ಹಿಂದೆ ಹೋದವರಿಗೆ ಪುನಃ ನೀರ್ ದೋಸೆಯೇ ಗತಿಯಾಯ್ತಾ?
    - ಆದರೆ ಅದನ್ನು ಹುಯ್ಯಲಿಕ್ಕೆ ಸರಿಯಾದ ಕಾವಲಿಯೇ ಇಲ್ಲವಲ್ಲ ಅನ್ನುತ್ತಿದ್ದಾರೆ ಜಗ್ಗೇಶ್!

    ನೇತ್ರಾ ಆನೆಕೆರೆ ಬೀದಿ, ಮಂಡ್ಯ
    ತರಗತಿಯಲ್ಲಿ ಕಲಿತವನನ್ನು ವಿದ್ಯಾರ್ಥಿ ಅನ್ನುತ್ತಾರೆ, ಹೊರಗಡೆಯಿದ್ದು ಕಲಿತವನನ್ನು ಏನಂತಾರೆ?
    - ಔಟ್‌ಸ್ಟ್ಯಾಂಡಿಂಗ್ ಪರ್ಸನಾಲಿಟಿ!

    ಕೆ.ಜೆ.ರಾಮಪ್ರಸಾದ್, ಕಡೂರು
= ಜನರು ಪದವಿ ಬಂದಾಗ ಪರಮಾತ್ಮನನ್ನೂ ಮರೆಯುತ್ತಾರಲ್ಲ?
    - ಪದವಿ ಹೋದಾಗ ನೆನೆಯುತ್ತಾರೆ ಬಿಡಿ!

    ಬಿ.ಎಂ.ಪರಮಶಿವಮೂರ್ತಿ, ಬೆಂಗಳೂರು
     ನೀಚನಿಗೂ, ಪರಮ ನೀಚನಿಗೂ ವ್ಯತ್ಯಾಸವೇನು?
    - ಈ ಸಾರಿ ಮತದಾನ ಮಾಡುವಾಗಲೂ ಮತದಾರರಿಗೆ ಇದೇ ಪ್ರಶ್ನೆ ಕಾಡಿತ್ತು!

    ಎಂ.ಬಿ.ಕೃಷ್ಣಮೂರ್ತಿ, ಚಾಮರಾಜನಗರ
= ಈ ಲೋಕದಲ್ಲಿ ಜನಿಸಿದ್ದು ಗಂಡು ಮೊದಲೋ, ಹೆಣ್ಣು ಮೊದಲೋ?
    -ಜನಿಸಿದ್ದು ಮೊದಲು ಗಂಡು, ಮಾತನಾಡಲು ಕಲಿತದ್ದು ಮೊದಲು ಹೆಣ್ಣು!


- ಎಸ್.ವಿ. ಪದ್ಮನಾಭ