ಮೊಸಳೆ ಮತ್ತು ಹೃದಯ

ಹುಡುಕುತ್ತಿದ್ದೇನೆ ಕಳಚಿಟ್ಟ ಹೃದಯವನ್ನು
ಮೊಸಳೆಯ ಬೆನ್ನೇರಿ ಹೊಳೆ ದಾಟುವಾಗ
ಜತನವಾಗಿ ತೆಗೆದಿಟ್ಟ ನೇರಳೆ ಮರವನ್ನು
ಗುರುತಿಸಲಾರದೆ ಕಂಗೆಟ್ಟಿದ್ದೇನೆ

ದಂಡೆಗುಂಟ ಬೆಳೆದು ನಿಂತಿವೆ
ಒಂದೇ ಬಗೆಯ ಹಿಂಡು ಹಿಂಡು ಮರ
ಅವವೇ ಫಳಫಳ ಹಣ್ಣ ಗೊಂಚಲು
ಅಸಲಿ ನಕಲಿ ಪತ್ತೆ ಸಿಗದ ನೇರಳೆಗಳು
ಎಲ್ಲಿ ಹುಡುಕಲಿ ಹೃದಯವನ್ನು
ನೀಲಿ ಬಾನ ನಿಲುವುಗನ್ನಡಿಯಂತೆ
ಹೊಳೆಯುತ್ತಿದೆ ಹೊಳೆಯ ಸುಳಿ ನಡುವು
ಅದರೊಳಗೆ ಬಿಂಬವಾದ ಆಚೆ ದಡ
ಮತ್ತೆ ಮತ್ತೆ ದಾಟಿ ಸೇರುವಾಸೆಯ ಸೆಳವು

ದಂಡೆ ತುಂಬಾ ಮೈ ಚೆಲ್ಲಿದ ಮೊಸಳೆಗೆ
ಬಿಸಿಲು ಮತ್ತು ಮರಳ ಜೋಡಿ ಕಾವು
ಚೂಪು ಹಲ್ಲಿನ ಬಾಯಿ ಜೊಲ್ಲು ನುಂಗಿ
ಕರೆದಾಗಲೊಮ್ಮೆ ಹಳೆಯದೆಲ್ಲ ಮರೆತು
ಬೆನ್ನೇರುವ ಮಂಗ ಬುದ್ಧಿ
ನೇರ ಮಾಡಿದಷ್ಟು ಸಲ ಸುರುಳಿ
ಸುತ್ತುವ ಬಾಲಗಳು
ಬಾನಿಗೆ ಚಾಚಿದ ಕೊಂಬೆಗಳಲಿ
ಅವಿಸಿಟ್ಟ ಹೃದಯಗಳ ಗುರುತಿಸಲರಿಯದೆ
ರೆಂಬೆ ರೆಂಬೆ ಜಿಗಿಯುವ
ಖಾಲಿ ಖಾಲಿ ಎದೆಗೂಡುಗಳು


- ಪ್ರಜ್ಞಾ ಮತ್ತಿಹಳ್ಳಿ
  prajna.mattihalli@rediffmail.com