ತೀರ್ಪು

ಪ್ರಶಸ್ತಿವಿಜೇತ ಕಲಾವಿದನ ಸುತ್ತ
ಸ್ವಸ್ತಿ ಮಾಗಧರ ದಂಡು
ಕೈಕುಲುಕಿ ಹಾರ ಹಾಕಿ
ಅಭಿನಂದಿಸಿ ಹೊಗಳಿದ್ದು
ಅಜೀರ್ಣವಾಗುವ ರೀತಿ
ಪೆಚ್ಚಾಗಿಸಿದ ಗೊಂದಲ ಫಜೀತಿ

ವರ್ಷಗಟ್ಟಲೆ ತಾದಾತ್ಮ್ಯ ತಪಿಸಿ
ಗೆರೆ ಗೆರೆಗಳ ಎದೆಹೊಕ್ಕು ಒಲಿಸಿ
ಬಣ್ಣ ಬನಿಸಿ, ಪ್ರತಿಭೆ ಕೆನೆ ಸೋಸಿ
ಧಾರೆ ಎರೆದ ಚಿತ್ರಪಟ ಪಟಲಗಳನ್ನೆಲ್ಲ
ಇಕ್ಕಿ ಮೆಟ್ಟಿದ ಬಾಹುಬಲಿ
ಪದಕ- ಪ್ರಶಸ್ತಿಗಳನ್ನೆಲ್ಲ ಗೆದ್ದ ಗಂಡುಗಲಿ
ಇವನಾರೆಂದು ದಿಟ್ಟಿಸಿ ಕಕ್ಕಾಬಿಕ್ಕಿ!
ಇವನೆಲ್ಲಿಂದ ಉದ್ಭವಿಸಿದನೆಂಬುದು
ನಿಗೂಢ- ಚಿದಂಬರ ರಹಸ್ಯ

ಎರೆಮರೆಯ ಕಾಯಂತೆ ಮೂಲೆ ಸೇರಿದ್ದ
ಮೈಯ್ಯೊಳಗೆ ಹನಿಗೊಂಡ ವರ್ಣಮೇಳದಿ
ಅಸಾಮಾನ್ಯ ಏಕಲವ್ಯನ ಜನನ
ತಾನೇ ಆವಿರ್ಭವಿಸಿದ ಕೃತಿಯ
ಕೋನಕೋನಗಳಿಗೆ ದುರ್ಬೀನಿಟ್ಟು
ಒರೆಹಚ್ಚಿ ತೀರ್ಪಿಸಿದ ಪುಟವಿಟ್ಟ ಬಂಗಾರ

ತೀರ್ಪುಗಾರರ ಸೂಕ್ಷ್ಮ ವಿಶಿಷ್ಟ ಗ್ರಾಹ್ಯ
ಅಲೌಕಿಕ ಮಸೂರ ದೃಶ್ಯಕ್ತಿಗೆ
ಬೆಚ್ಚಿ ದಂಗಾದ ಕಲಾವಿದನ
ಅಣಕಿಸುತ್ತಿತ್ತು ಅವನ ಸೃಷ್ಟಿಯಲ್ಲದ ಸೃಷ್ಟಿ
ಸ್ವಯಂಭು ಮೇರುಕೃತಿ

ಕುಂಚದ ಬೆವರ ಹನಿಗೆ ಗರ್ಭಿಸಿ
ಶಿವೆಯ ಮೈ ಗಂಧಕೆ ಜೀವತಳೆದು
ಅಂಬೆಗಾಲಿಟ್ಟ ಕಂದನ ಬಾಲಲೀಲೆ
ಖಾಲಿ ಕ್ಯಾನ್ವಾಸಿನ ಹರಹು ಅಯೋವುಯ
ಅವನು ಹೆರದ ಹೆರಿಗೆ ಈ ಅನಾಥ
ಹೆಣೆದ ಅನೂಹ್ಯ- ಅಸಾಮಾನ್ಯ ಕಲ್ಪನೆ
ಬಿಚ್ಚಿಕೊಂಡ ಅಸಂಖ್ಯ ಅಂತರಾರ್ಥ
ಹೊಳಹು- ಸುಳುಹುಗಳು
ನಿಗೂಢ ವಿಸ್ಮಯ
ನಿಜವ ನುಂಗಿತ್ತು ಕಲೆಯ ನೆರಳು

- ವೈ.ಕೆ. ಸಂಧ್ಯಾಶರ್ಮ