ಉತ್ತರಾಧಿಕಾರಿ

ಶ್ರೀಕಾಂತ ಮುದಗಲ್ಲ, ಇಳಕಲ್ಲ
    'ತೂಕದ ಮಾತು' ಇರುವಂತೆ ತೂಕದ ಕೆಲಸ ಅಂತ ಇದೆಯಾ?
    -ತೂಕಡಿಸುತ್ತಾ ಮಾಡ್ತಾರಲ್ಲ ಅದೇ ತೂಕದ ಕೆಲಸ!

    ಸ್ವಾಮಿ ನಿರ್ಮಲಾ, ಉಡಿಗಾಲ
    ಇರುವೆಗಳು ಏಕೆ ಇಂದಿಗೂ ಸಾಲಲ್ಲೇ ಸಾಗುತ್ತವೆ ಸಾರ್?
    -ನಾವು ಎಂದೆಂದಿಗೂ ಶಿಸ್ತಿನಲ್ಲಿಯೇ ಇರುವೆ ಅಂತ ತೋರಿಸೋಕೆ!

    ಪೇಂಟರ್ ಪಾಪು, ಸಂತೇಮರಹಳ್ಳಿ
    ಪೋಸ್ಟ್‌ಮ್ಯಾನ್ ಇನ್ನೂ ಸೈಕಲ್ ತುಳೀತಾನೆ, ಸ್ಕೂಟರ್ ಯಾಕೆ ಕೊಡುತ್ತಿಲ್ಲ?
    -ಈ ಮೊಬೈಲ್ ಇಮೇಲ್ ಯುಗದಲ್ಲಿ ಮುಂದೆ ಸೈಕಲ್ ತುಳಿಯೋದೂ ಕಷ್ಟ!

    ಪಿ.ಜೆ. ರಾಘವೇಂದ್ರ, ಮೈಸೂರು
    ಚುನಾವಣೆಗೂ ಮುನ್ನ ಫ್ರೆಂಡ್ಲಿ ಮ್ಯಾಚ್ ಅಂತಿದ್ದ ಎಚ್. ವಿಶ್ವನಾಥ್, ಸೋತ ನಂತರ ಮ್ಯಾಚ್ ಫಿಕ್ಸಿಂಗ್ ಅಂತಿದ್ದಾರಲ್ಲ?
    -ಅವರ ಫ್ರೆಂಡ್ಸ್‌ಗಳೇ ಫಿಕ್ಸ್ ಮಾಡಿರಬೇಕು!

    ಎಂ.ಬಿ. ಕೃಷ್ಣಮೂರ್ತಿ, ಚಾಮರಾಜನಗರ
    ಮಾತನಾಡುವವನೇ ಮಹಾಶೂರನಂತೆ, ಮಾತನಾಡದವನು?
    -ಮಾಜಿ ಪ್ರಧಾನಿ ಮನ'ಮೌನ'ಸಿಂಗ್!

    ಆರ್.ಸಿ. ಪರಶುರಾಮ್, ಶಿಕಾರಿಪುರ
    ಗಂಡಸರ ಸಂಬಳ, ಹೆಂಗಸರ ವಯಸ್ಸು ಕೇಳಬಾರದಂತೆ ಯಾಕೆ?
    -ಅವೆರಡೂ ಇಪ್ಪತ್ತರೊಳಗೇ ನಿಂತಿರುತ್ತೆ!

    ಕಬ್ಬಳ್ಳಿ ಬಿ. ಚನ್ನಬಸಪ್ಪ, ಯಲಹಂಕ ಉಪನಗರ
    ರಾಹುಲ್ ಗಾಂಧಿ-ಕೇಜ್ರಿವಾಲ್ ನಡುವೆ ಯಾರು ಹೆಚ್ಚು 'ಎಬಡ'ರು ಗುರುವೆ?
    -ನಿಮಗೆ 'ತೃತೀಯ ರಂಗ'ದವರು ಯಾರೂ ಕಾಣಿಸ್ತಿಲ್ಲವೇ?

=  ಎಸ್.ವಿ. ಪದ್ಮನಾಭ