ಕರಾವಳಿ ಕರ್ನಾಟಕದಲ್ಲಿ ಹಾಲಿನ ಕೊರತೆ: ಈರೋಡ್ ಹಸುಗಳಿಗೆ ಬೇಡಿಕೆ ಹೆಚ್ಚಳ!

ಮಂಗಳೂರು: ನಿರಂತರ ಹಾಲಿನ ಕೊರತೆಯನ್ನು ನೀಗಿಸುವ ಉದ್ದೇಶದಿಂದ, ದಕ್ಷಿಣ ಕನ್ನಡ ಮತ್ತು ಉಡುಪಿ ಜಿಲ್ಲೆಗಳ ಹೈನುಗಾರರು ಹೆಚ್ಚಿನ ಇಳುವರಿ ನೀಡುವ ಹಸುಗಳಿಗೆ ಹೆಸರುವಾಸಿಯಾದ ತಮಿಳುನಾಡಿನ ಈರೋಡ್ ಕಡೆಗೆ ಮುಖ ಮಾಡಿದ್ದಾರೆ.

ಕಳೆದ 18 ತಿಂಗಳುಗಳಲ್ಲಿ, ದಕ್ಷಿಣ ಕನ್ನಡ ಹಾಲು ಒಕ್ಕೂಟ ಲಿಮಿಟೆಡ್ (DKMUL) ಬೆಂಬಲದೊಂದಿಗೆ ಈರೋಡ್‌ನಿಂದ 360 ಕ್ಕೂ ಹೆಚ್ಚು ಹಸುಗಳನ್ನು ಕರಾವಳಿ ಜಿಲ್ಲೆಗಳಿಗೆ ತರಲಾಗಿದೆ. ಈ ಪ್ರದೇಶದಲ್ಲಿ ಹಾಲು ಉತ್ಪಾದನೆ ಮತ್ತು ಬೇಡಿಕೆಯ ನಡುವಿನ ಅಂತರವನ್ನು ಕಡಿಮೆ ಮಾಡುವ ಪ್ರಯತ್ನಕ್ಕೆ ಮುಂದಾಗಿದೆ..

ಜೆರ್ಸಿ ಹಸು ಸಾಮಾನ್ಯವಾಗಿ ದಿನಕ್ಕೆ 15 ಲೀಟರ್ ಹಾಲು ನೀಡುತ್ತದೆ ಆದರೆ, ಈರೋಡ್‌ನಿಂದ ತಂದ ಹಸುಗಳು ಸುಮಾರು ಎರಡು ಪಟ್ಟು ಹೆಚ್ಚು ಅಂದರೆ 30 ಲೀಟರ್ ಹಾಲು ನೀಡುತ್ತವೆ.

ಹಾಲಿನ ಉತ್ಪಾದನೆಯಲ್ಲಿನ ಈ ಗಮನಾರ್ಹ ವ್ಯತ್ಯಾಸವು ರೈತರಿಗೆ ಈರೋಡ್ ಅನ್ನು ಆದ್ಯತೆಯ ಮೂಲವನ್ನಾಗಿ ಮಾಡಿದೆ. DKMUL ಪ್ರತಿ ಗುರುವಾರ ಈರೋಡ್‌ನಲ್ಲಿ ನಡೆಯುವ ಜಾನುವಾರು ಮೇಳಕ್ಕೆ ವಾರಕ್ಕೊಮ್ಮೆ ಭೇಟಿ ನೀಡುತ್ತಾರೆ. ಅಲ್ಲಿ ಪಶುವೈದ್ಯರು ಸೇರಿದಂತೆ ಅಧಿಕಾರಿಗಳು ಆಸಕ್ತ ರೈತರೊಂದಿಗೆ ಹೋಗುತ್ತಾರೆ. ಈ ತಂಡಗಳು ಪ್ರಾಣಿಗಳ ಖರೀದಿಗೆ ಮುನ್ನ ಅವುಗಳ ಆರೋಗ್ಯ ಮತ್ತು ಉತ್ಪಾದಕತೆಯನ್ನು ಪರಿಶೀಲಿಸುವಲ್ಲಿ ಸಹಾಯ ಮಾಡುತ್ತವೆ. DKMUL ಸಾರಿಗೆ ಮತ್ತು ವಿಮಾ ವೆಚ್ಚವನ್ನು ಸಹ ಭರಿಸುತ್ತದೆ.

ಈರೋಡ್ ಹಸುವಿನ ಬೆಲೆ ರೂ. 60,000 ರಿಂದ ರೂ. 1.5 ಲಕ್ಷದವರೆಗೆ ಇರುತ್ತದೆ. ಹೆಚ್ಚುವರಿಯಾಗಿ, DKMUL ಭ್ರೂಣ ವರ್ಗಾವಣೆ ತಂತ್ರಜ್ಞಾನದಲ್ಲಿ ಮತ್ತಷ್ಟು ಹೂಡಿಕೆ ಮಾಡುತ್ತಿದೆ, ಇದರಲ್ಲಿ ಉತ್ತಮ ದಾನಿ ಹಸುಗಳಿಂದ ಪಡೆದ ಫಲವತ್ತಾದ ಭ್ರೂಣಗಳನ್ನು ಸ್ಥಳೀಯ ಜಾನುವಾರುಗಳಿಗೆ ಅಳವಡಿಸಲಾಗುತ್ತದೆ.

ಇಲ್ಲಿಯವರೆಗೆ, 40 ಹಸುಗಳು ಈ ಕಾರ್ಯವಿಧಾನಕ್ಕೆ ಒಳಗಾಗಿವೆ. ಪ್ರತಿ ಕಾರ್ಯವಿಧಾನಕ್ಕೆ ರೂ. 21,000 ವೆಚ್ಚವಾಗುತ್ತದೆ, ಇದರಲ್ಲಿ ರೈತರ ಕೊಡುಗೆ ಕೇವಲ ರೂ. 1,000 ಮತ್ತು ಉಳಿದದ್ದನ್ನು KMF, DKMUL ಮತ್ತು ರಾಷ್ಟ್ರೀಯ ಗೋಕುಲ್ ಮಿಷನ್ ಒಟ್ಟಾಗಿ ಭರಿಸುತ್ತವೆ. DKMUL ಪ್ರತಿದಿನ ಅಂದಾಜು 3.97 ಲಕ್ಷ ಲೀಟರ್ ಹಾಲು ಉತ್ಪಾದಿಸುತ್ತದೆ, ಆದರೆ ಬೇಡಿಕೆ ಸುಮಾರು 5 ಲಕ್ಷ ಲೀಟರ್‌ಗಳಷ್ಟಿದೆ. ವ್ಯತ್ಯಾಸವನ್ನು ಸರಿದೂಗಿಸಲು, ಹಾಸನ, ಮೈಸೂರು ಮತ್ತು ಧಾರವಾಡ ಸೇರಿದಂತೆ ಇತರ ಜಿಲ್ಲೆಗಳಿಂದ ಹಾಲನ್ನು ಸಂಗ್ರಹಿಸಲಾಗುತ್ತಿದೆ.

ಆದಾಗ್ಯೂ, ಪ್ರಸಕ್ತ ಹಣಕಾಸು ವರ್ಷದಲ್ಲಿ (2025–26), 2024–25ಕ್ಕೆ ಹೋಲಿಸಿದರೆ ದೈನಂದಿನ ಹಾಲು ಸಂಗ್ರಹಣೆಯಲ್ಲಿ ಶೇ. 16 ರಷ್ಟು ಹೆಚ್ಚಳವಾಗಿದೆ ಎಂದು ಡಿಕೆಎಂಯುಎಲ್ ವರದಿ ಮಾಡಿದೆ, ಈ ಹಿಂದೆ ಸರಾಸರಿ 3.42 ಲಕ್ಷ ಲೀಟರ್ ಆಗಿತ್ತು. ಹಾಲು ಸಂಗ್ರಹಣೆಗೆ ಉತ್ತಮ ಬೆಲೆ ನಿಗದಿ, ಸೈಲೇಜ್ (ಪೌಷ್ಠಿಕಾಂಶ-ಭರಿತ ಹಸಿರು ಮೇವು) ವಿತರಣೆ ಮತ್ತು ರೈತರಿಗೆ ಕಾರ್ಯತಂತ್ರದ ಬೆಂಬಲ ಮುಂತಾದ ಅಂಶಗಳ ಸಂಯೋಜನೆಯೇ ಈ ಏರಿಕೆಗೆ ಕಾರಣ ಎಂದು ಡಿಕೆಎಂಯುಎಲ್ ಅಧ್ಯಕ್ಷ ರವಿರಾಜ್ ಹೆಗ್ಡೆ ಹೇಳಿದ್ದಾರೆ.

ಶೇ. 4.4 ರಷ್ಟು ಕೊಬ್ಬು ಮತ್ತು ಶೇ. 8.5 ಎಸ್‌ಎನ್‌ಎಫ್ (ಘನವಸ್ತುಗಳು-ಕೊಬ್ಬಿಲ್ಲದ) ಹೊಂದಿರುವ ಹಾಲಿಗೆ ಡಿಕೆಎಂಯುಎಲ್ ಪ್ರತಿ ಲೀಟರ್‌ಗೆ 40.76 ರೂ.ಗಳಿಗೆ ಖರೀದಿ ಬೆಲೆಯನ್ನು ನಿಗದಿಪಡಿಸಿದೆ, ಇದು ರಾಜ್ಯದಲ್ಲಿ ಅತಿ ಹೆಚ್ಚು ಎಂದು ರವಿರಾಜ್ ಹೆಗ್ಡೆ ಹೇಳುತ್ತಾರೆ.