GBA 5 ಪಾಲಿಕೆ ಚುನಾವಣೆ: ವಾರ್ಡ್ ವಾರು ಮೀಸಲಾತಿ, ಮಾರ್ಗಸೂಚಿ ಪ್ರಕಟಿಸಿದ ರಾಜ್ಯ ಸರ್ಕಾರ

ಬೆಂಗಳೂರು: ಗ್ರೇಟರ್ ಬೆಂಗಳೂರು ಪ್ರಾಧಿಕಾರ (GBA) ಅಡಿಯಲ್ಲಿ ಬರುವ ಐದು ಪುರಸಭೆಗಳಿಗೆ ವಾರ್ಡ್‌ ಗಳ ಮೀಸಲಾತಿಗಾಗಿ ರಾಜ್ಯ ಸರ್ಕಾರ ಶುಕ್ರವಾರ ಮಾರ್ಗಸೂಚಿಗಳನ್ನು ಹೊರಡಿಸಿದೆ.

ಇದರೊಂದಿಗೆ, ಸೆಪ್ಟೆಂಬರ್ 11, 2020 ರಿಂದ ಯಾವುದೇ ಕೌನ್ಸಿಲ್ ಇಲ್ಲದ ಬೆಂಗಳೂರಿನ ಸ್ಥಳೀಯ ಸಂಸ್ಥೆಗಳ ಚುನಾವಣೆಯನ್ನು ನಡೆಸುವ ಹಂತಕ್ಕೆ ಸರ್ಕಾರ ಬಂದಿದೆ.

ಶೇ. 80 ರಷ್ಟು ಸ್ಥಾನಗಳನ್ನು ಹಿಂದುಳಿದ ವರ್ಗಗಳಿಗೆ (BC) ವರ್ಗ 'A' ಅಡಿಯಲ್ಲಿ ಮತ್ತು ಶೇ. 20 ವರ್ಗ 'B' ಅಡಿಯಲ್ಲಿ ಮೀಸಲಿಡಲಾಗಿದೆ ಎಂದು ಆದೇಶದಲ್ಲಿ ತಿಳಿಸಲಾಗಿದೆ. ವರ್ಗ A ನಲ್ಲಿ,ಶೇ. 50 ಮಹಿಳೆಯರಿಗೆ ಮೀಸಲಿಡಲಾಗಿದೆ.

ಮಾರ್ಗಸೂಚಿಗಳ ಪ್ರಕಾರ, GBA ಮೀಸಲಾತಿಗಾಗಿ ಭಾರತ ಸರ್ಕಾರದ ಜನಗಣತಿ ನಿರ್ದೇಶನಾಲಯವು ಪ್ರಕಟಿಸಿದ 2011 ರ ಜನಗಣತಿಯನ್ನು ಪರಿಗಣಿಸಬೇಕು. ಪರಿಶಿಷ್ಟ ಜಾತಿ ಮತ್ತು ಪರಿಶಿಷ್ಟ ಪಂಗಡಗಳಿಗೆ (SC/ST) ಮೀಸಲಿಡಬೇಕಾದ ಸ್ಥಾನಗಳ ಸಂಖ್ಯೆಯನ್ನು ಗ್ರೇಟರ್ ಬೆಂಗಳೂರು ಪ್ರದೇಶದೊಳಗಿನ ಆಯಾ ಪುರಸಭೆಯ ಒಟ್ಟು ಜನಸಂಖ್ಯೆಗೆ ಅನುಗುಣವಾಗಿ ಮತ್ತು ಒಟ್ಟು ವಾರ್ಡ್‌ಗಳ ಸಂಖ್ಯೆಗೆ ಅನುಗುಣವಾಗಿ ನಿಗದಿಪಡಿಸಲಾಗುತ್ತದೆ. ಅದೇ ರೀತಿ ಮೀಸಲಾತಿಯ 1/3 ನೇ ಭಾಗವನ್ನು ಹಿಂದುಳಿದ ವರ್ಗಗಳಿಗೆ ಮೀಸಲಿಡಬೇಕು.

"ಹೀಗೆ ನಿಗದಿಪಡಿಸುವಾಗ, ಪರಿಶಿಷ್ಟ ಜಾತಿಗಳು, ಪರಿಶಿಷ್ಟ ಪಂಗಡಗಳು ಮತ್ತು ಹಿಂದುಳಿದ ವರ್ಗಗಳನ್ನು ಒಳಗೊಂಡಂತೆ ಒಟ್ಟು ಮೀಸಲಾತಿ ಶೇ. 50 ರಷ್ಟು ಮೀರಬಾರದು. ಒಟ್ಟು ಮೀಸಲಾತಿ ಶೇ. 50 ಮೀರಿದರೆ, ಹಿಂದುಳಿದ ವರ್ಗಗಳಿಗೆ ಮೀಸಲಾದ ಸ್ಥಾನಗಳನ್ನು ಪ್ರಮಾಣಾನುಗುಣವಾಗಿ ಕಡಿಮೆ ಮಾಡಲಾಗುತ್ತದೆ" ಎಂದು ಆದೇಶದಲ್ಲಿ ತಿಳಿಸಲಾಗಿದೆ.

ಜಿಬಿಎ ಅತಿ ಹೆಚ್ಚು ಎಸ್‌ಸಿ ಜನಸಂಖ್ಯೆಯನ್ನು ಹೊಂದಿರುವ ವಾರ್ಡ್‌ಗಳ ಪಟ್ಟಿಯನ್ನು ಪ್ರಕಟಿಸಬೇಕು. ನಂತರ ಅತಿ ಹೆಚ್ಚು ಎಸ್‌ಟಿ ಜನಸಂಖ್ಯೆಯನ್ನು ಹೊಂದಿರುವ ವಾರ್ಡ್‌ಗಳನ್ನು ಪ್ರಕಟಿಸಬೇಕು. ಎಸ್‌ಸಿ/ಎಸ್‌ಟಿಗಳಿಗೆ ಮೀಸಲಾಗಿರುವ ಸ್ಥಾನಗಳಲ್ಲಿ ಶೇ. 50 ರಷ್ಟು ಮಹಿಳೆಯರಿಗೆ ಮೀಸಲಿಡಲಾಗುತ್ತದೆ. ಆದೇಶದ ಪ್ರಕಾರ, ಮೀಸಲಾತಿ ರಹಿತ (ಸಾಮಾನ್ಯ) ವರ್ಗದ ಶೇ.50 ರಷ್ಟು ಸ್ಥಾನಗಳನ್ನು ಮಹಿಳೆಯರಿಗೆ ಮೀಸಲಿಡಲಾಗಿದೆ ಮತ್ತು ಬೆಸ ಸ್ಥಾನವಿದ್ದರೆ, ಪುರುಷರಿಗೆ ಸ್ಪರ್ಧಿಸಲು ನೀಡಲಾಗುತ್ತದೆ.

369 ವಾರ್ಡ್ ಗಳ ಪೈಕಿ ಮೂರನೇ ಒಂದು ಭಾಗ OBC ಸಮುದಾಯಕ್ಕೆ ಮೀಸಲಾಗಿದ್ದು ಅನುಸೂಚಿತ ಜಾತಿ, ಪಂಗಡ, OBC ಒಟ್ಟು ಮೀಸಲಾತಿ ಪ್ರಮಾಣ ಶೇ. 50 ರಷ್ಚು ಮೀರುವಂತಿಲ್ಲ. ಒಂದೊಮ್ಮೆ 50% ಮೀರಿದರೆ ಆಯಾ ಜಾತಿಗೆ ಅನುಗುಣವಾಗಿ ಮೀಸಲು ಸ್ಥಾನ ಇಳಿಕೆ ಮಾಡಲಾಗುತ್ತದೆ.

ಬೆಂಗಳೂರು ಕೇಂದ್ರ ನಗರ ನಿಗಮ, ಉತ್ತರ ನಗರ ನಿಗಮ, ಪೂರ್ವ ನಗರ ನಿಗಮ, ಪಶ್ಚಿಮ ನಗರ ನಿಗಮ ಮತ್ತು ದಕ್ಷಿಣ ನಗರ ನಿಗಮಗಳಲ್ಲಿ ಪರಿಶಿಷ್ಟ ಜಾತಿ/ಪಂಗಡಗಳು, ಹಿಂದುಳಿದ ವರ್ಗಗಳು ಮತ್ತು ಮಹಿಳೆಯರಿಗೆ ಮೀಸಲಾತಿ ಮತ್ತು ಸಾಮಾನ್ಯ (ಮೀಸಲಾತಿ ರಹಿತ) ಸ್ಥಾನಗಳ ಸಂಖ್ಯೆಯನ್ನು ಕಾಯ್ದುಕೊಳ್ಳಲಾಗುತ್ತದೆ ಎಂದು ಆದೇಶದಲ್ಲಿ ಉಲ್ಲೇಖಿಸಲಾಗಿದೆ.